1 Ñeinñein meha aban wügüri aganóuti lóubawagu Usu, gíriti Hobu. Hobu ligía, suruti meha labagaridun ligibugiñe Bungiu, seriwiti lun Bungiu lau úarani ani hóuchati súnwandan lun madügün lan wuribani ni ka un. 2 Sédüñanu meha lirahüñü Hobu wügüriña hama ǘrüwa würiña, 3 sedü-míluñanu lilügüniña mudún, ǘrüwa-milu kameyu, milu bulu bágasu hama seingü-san burigü würiña. Gíbetiña giñe lidamun. Ligíatima wügüri le rísitimabei lidan sun oubaü le ñéingiñe lubéi laboucha weyu.

4 Súnwandantiha hefeduhan lirahüñü Hobu lúbiñe kada aban hádangiñe lidan haweyuri, ani súnwandan giñeha hagunbirahaniña ǘrüwagubei hátunu. 5 Dántiha le lagumuchun hefeduhan, ábaha lagúarun Hobu houn, ábaha ladagaragüdün le gudawarügüti luagu kada aban hádangiñe lubaroun larugan, lun harumadun lídangiñe hafigoun. Ladügünbalin Hobu ítara súnwandan, ladüga lariñagun lúnguarügü háfuga lan afigouha hamá lirahüñü íñaraguei Bungiu lidan hasaminan.

6 Luagu aban weyu le lidaani harufudagun lubúeingu Aburemei* houngua ligibugiñe, aba giñe liabin Mafia haganagua. 7 Aba lariñagun Bungiu lun Mafia:

—Angia buguya, halíagiñedibu san?

Lariñaga Mafia:

—Negeyedaguñein ubóu luéigiñe aban oubaü luagun le aban.

8 Lariñagati Bungiu lun:

—Ariha bumuti san Hobu, le nubúein? Úati ni aban gürigia kei ligía ubouagu, seriwi lumutina lau úarani ani suruti labagaridun, ani áfaaguati lun madügün lan wuribani ni ka un.

9 Lariñaga Mafia lun:

—Mama ítaraguarügü leseriwidunbei Hobu lau úarani bun. 10 Ladüga mígiruntibu lun laguurun ni aban luagu, ni hawagu liduheñu, ni luagu ni kata lídangiñe le lánibei, biní bumuti sun le ladügübei, ani ligía gíbetimabaña ibiñanigu hádangiñe sun lílana fulasu. 11 Gidabei san sun le lúmabei luéi, ariha báamugei líñaragunibu bigibuagun.

12 Lariñaga Aburemei lun Mafia:

—Adügabéi le babusenrun lau sun le lúmabei Hobu, gama lumoun maguurabá luagu.

Ábati lidin Mafia liñúarürugugiñe Bungiu.

13 Luagu aban weyu dan le añaha lubéi lirahüñü Hobu efeduha lúbiñe liráü le íbugañaü, 14 aba lachülürün aban wügüri lúbiñoun Hobu, lariñaga lun:

—Ñéinñadiwa awouha; 15 sódini ligía hayabin Sabeugu, aba híweruhaniña ilügüniñaü, áfaragua hamaña wügüriña tau gusiñu. Áurügüñein esefura lun niabin lau uganu bun.

16 Másugili yebe ladimurehan wügüri ligía, ligía liabin ábanya, lariñaga lun:

—Ábürühati aban lidübüri wayuhuru, aba láfaraguniña mudún hau sun hóuniri. Áurügüñein esefura lun niabin lau uganu bun.

17 Másugiliya ladimurehan wügüri ligía, ligía liabin aban, lariñagaya lun:

—Aba hábürühan ǘrüwa sétanu Kalüdéana wawagun, aba híweruhaniña kameyu, áfaragua hamaña wügüriña. Áurügüñein esefura lun niabin lau uganu bun.

18 Másugiliya yebe ladimurehan wügüri ligía, ábaya liabin aban, lariñaga:

—Ñéinñanu birahüñü efeduha lúbiñe biráü le íbugañaü, 19 sódini ligía láfuragun aban garabali héreti, aba lágurunu muna hawagun birahüñü, hilaguatiña súngubei. Áurügüñein esefura lun niabin lau uganu bun.

20 Ábati lásaarun Hobu, buin lau igarigu, aba laheiridagunu ladaüragun luougua, aba lásaruni lídiburi, aba labuluchagun arufudei linebenehabu lun Bungiu. 21 Ábati lariñagun:

—Surusu niabin ñahoun ubouagun, surusuba giñe nidin yáagiñe. Bungiu íchugubalin sun buga le númabei nun, Bungiu giñe agidarubalin nuéi. Biniwalá liri Bungiu!

22 Ítara liña lubeiti, lau sun le susereelibei, mafigounhanti Hobu, mariñagun ligía ni kata wuribati luagu Bungiu.