1 Lidan libiaman lirumudiri larúeihan Nabukodonosoru, aba gewenedü lan saragu uénedü, ani ladüga burí uénedü ligía, aba laweiridun lidiheri darí lun siñá lan larumugun. 2 Ábati lóunahan hawagu chu tau, garíaahatiña, gabiñarahatiña hama aturiahatiña waruguma, lun hafuranguagüdüni lanichigu burí uénedü ligía lun. Aba hayabin ligibugiñoun urúei, 3 lariñaga urúei houn:

—Gewenedütina aban uénedü, ani anahán oucha lun gunfurandanani.

4 Aba hariñagun chu tau lun urúei:

—Gabagari humá urúei súnwandan! Abahüdagua huméi huénedü woun, ábame wariñaguni lanichigu hun.

5 Lariñaga urúei houn:

—Anihán katei le lunbei nadügüni. Anhein mariñagun humá nun ka lan nuénedübei luma ka lan lanichigubei, hamurusuhóuba, gudawame huban. 6 Gama lumoun anhein hariñaga nun ka lan nuénedübei luma ka lan lanichigubei, hibihuba idewesei númagiñe, fulesei luma uéiriguni. Ariñaga huméi lubeiti nun ka lan nuénedübei luma lanichigu.

7 Ábaya hariñagun chu tau:

—Abahüdagua huméi huénedü woun urúei, ábame wariñaguni lanichigu hun.

8 Lariñaga urúei houn:

—Subudi numuti luagu busén humá hagañeirun dan, ladüga aganba humaali le naritagubei nadügün. 9 Anhein lubeiti mariñagun humá nun ka lan nuénedübei, sun huguya hasufurirubei siadiméme ligía, ladüga adimurehaadün húmagua lun hóunabunina lau iyeeni, agurabaha nasansiruni naritagun. Ariñaga huméi lubeiti nuénedü nun, ítara luba nasubudiruni luagu gayaraabei lan giñe hariñaguni lanichigu nun.

10 Hariñaga chu tau:

—Úati ni aban gürigia ubouagu gayaraati lariñaguni le labusenrubei urúei lasubudirun. Ábaya katei, úagili ni aban urúei íbini weiri lan luéirigun luma lubafu amuriahati katei líbeina le luma ni aban garíaahati o chu tau. 11 Hénrenguti katei le hamuriahabei urúei, ani úati ni aban lun gayara lan lariñaguni hun, haweidigia búngiugu; gama lumoun hagía, maganóuntiña haganagua gürigia!

12 Dan laganbunbalin urúei katei le, aba lagañidun, aba láfaraguagüdüniña sun chu tau Babilóniana. 13 Lárigiñe lichugúniwa dimurei le, aba giñe láluahoun Danieli hama líbirigu lun háfarawagun.

14 Ábati ladimurehan Danieli lau saragu duari luma Arioku le hábuti lisudaranigu urúei, le yebe aranselibei lun láfaraguniña chu tau. 15 Aba lariñagun lun:

—Ka san lébubei líchuguni urúei lúrudu le?

Aba labahüdaguni Arioku lébuna lun. 16 Ábati lidin Danieli lumoun urúei, aba layumuragun lun, lun líchugun dan lun, lun lariñaguni luénedü lun luma lanichigu. 17 Lárigiñe aba lidin lúbiñoun, aba labahüdaguni katei le houn lupaanágu, Ananíasi, Misaeli luma Asaríasi, 18 lun hamuriahan luma Wabungiute lun lídehan lidan katei le, lun máfarawagun hamá úara hama híbiri chu tau Babilóniana. 19 Áriebu ligía, aba larufudún katei ligía lun Danieli lidan luénedü, aba labiniruni Danieli Wabungiute 20 lau dimurei burí le:

«Biniwalá liri Wabungiute lun súnwandan,

ladüga ligía laburemebei lichú aau luma ubafu.

21 Sánsigua lumuti dan;

ligía agidahabaliña urúeigu ligía íchaahaña,

ruti lichú aau houn chu tau

luma lualin ichügü houn huali tichügü.

22 Furanguagüda lumuti burí katei aramudaguati;

subudi lumuti katei le lídanbei luburiga ladüga lúmañein larugounga.

23 Rútina seremei luma uéiriguni bun,

Habungiute nagübürigu,

ladüga rúhadibu lichú aau luma erei nun;

ani guentó, subudigüda baali le wamuriahabei nun:

Subudigüda baali le labusenrubei urúei lasubudirun woun».

24 Lárigiñe katei le, aba lidin Danieli lumoun Arioku, le buga unbei líchiga urúei lúrudu lun láfaraguniña chu tau Babilóniana, aba lariñagun lun:

—Máfaraguabaña chu tau, barübana ligibugiñóun urúei, nariñagubei sun luénedü lun.

25 Aba lanügüni Arioku Danieli ligibugiñoun urúei Nabukodonosoru, aba lariñagun lun urúei:

—Darihadina aban wügüri hadan huríu ha asagarúbaña hageiragiñe, le lunbei lariñaguni lanichigu huénedü hun urúei.

26 Ábati lariñagun urúei lun Danieli:

—Gayaraati bariñaguni le nuénedübei nun luma lanichigu?

27 Lariñaga Danieli lun:

—Úati ni aban chu tau, ni garíaahati, ni gabiñarahati lun gayara lan lariñaguni le labusenrubei urúei lasubudirun lun. 28 Gama lumoun anihein aban Bungiu sielu le asubudiragüdübalin katei le, ani subudigüda laali katei le lunbei lasuseredun hun urúei. Nariñagaali huénedü hun: 29 Ñéinñadün higabananrugu, urúei; aba herederun asaminara luagun burí katei le lunbei lasuseredun, ani subudigüda laali le asubudiragüdübalin katei burí aramudaguati hun. 30 Subudigüdawaali giñe katei le nun: Gama lumoun mama ladüga chu lan nau hawéi sun wügüriña, lasubudirawagüdünbei nun, lun nariñaguni lanichigu uénedü ligía lun urúei, gayara láamuga gunfurandalani saminaü le ñǘbuinhalibei lisaminanrugun.

31 —Lidan luénedü urúei, aba larihin lasaliragun aban óunwenbu guáriua miriti ligibugiñe, hanarimeti. 32 Golu lábulugu guáriua ligia; laniguagu luma larüna lauti pülata; luragei luma liyada, buronse; 33 larüna, gürabu; gürabu líbiri lugudi, múa le líbiri. 34 Sun anihán lan urúei aríaguei guáriua ligía, aba lábürühan aban dübü luéigiñe aban wübü úouga ligía ádaruti, aba liabin adagara luagun lugudi guáriua, aba lagünrinchaguni. 35 Lidan murusun oura, aba lasaliragun gürabu, múa, buronse pülata luma golu lun kalikime, kei le arihúbei irumurugu dan le lewenihóun türigu, aba lanügüni garabali, mígirunti ni life. Ánheinti dübü le ábürühabei luagun guáriua, aba lasaliragun ábame óunwenbu áraabu, aba ladouragun lau sun múa.

36 —Anihán uénedü ligía. Guentoti, nariñagaali lanichigu uénedü hun, urúei. 37 Urúei, huguya wéirigutimabei hadan sun urúeigu, ladüga ru laali Bungiu le siélubei arúeihani, ubafu, erei luma uéiriguni hun, 38 luma gumadi lidan sun fulasu le ñein lumuti añahein lan gürigia aganóua, animaalugu áraabuna hama dunuru, ru laali Wabureme sun katei lábugiñe hubafu urúei, huguya le abulugúbei golu. 39 Lárigiñeme harúeihan, urúei, ñeinbei aban arúeihani ǘnabuti luéi harúeihan, lárigiñeme, ñéinyabei aban lǘrüwan arúeihani lauti buronse le lunbei lagumadiruni sun ubóu. 40 Lárigiñeme, liábinba aban ligadürün arúeihani, héreti kei gürabu; ani ítara kei lagünrinchaguni gürabu sun katei, ítara luba lagünrinchaguni arúeihani ligía sun líbiri arúeihani ubouagu.

41 —Arihati giñe urúei luagu múa lan líbiri lugudi guáriua lau sun lifinga lugudi, gürabu líbiri; mini lan lira, luagu ábanbei lan arúeihani fánreinguati, lau sun ñeinbei lan murusun erei libe lere gürabu lidan, ítara kei larihini urúei luagu mígisigua lan gürabu luma múa. 42 Lifinga lugudi guáriua ligía, gürabu líbiri múa líbiri, mini lan lira, luagu here luba lan arúeihani ligía, mere ligíame. 43 Ani ítara kei larihini urúei gürabu mígisiñu luma múa, ítara luba hamigisiragun agumadihatiña lánina arúeihani ligía hámagua lau maríei; gama lumoun siñabei hadügün ábanrügü úgubu hádangua, ítara kei siñá lan lamigisirún gürabu luma múa. 44 Lídanme lidaani harúeihan urúeigu ha, ladügüba Bungiu le siélubei aban arúeihani le siñabei lagünrinchaguni ni lagumadiruni ni aban néchani, günringuarügü lubéi arúeihani ligía sun líbiri arúeihani sunsuinagubei, ábame ladurarun lun súnwandan. 45 Anihán katei le mini lubéi dübü le larihubei urúei ábürüha luéigiñe wübü, mádarungalei ni aban; dübü le asaliraguagüdübalin gürabu, buronse, múa, pülata luma golu kalikime. Subudigüda laali Bungiu le wéirigubei katei le lunbei lasuseredun hun urúei. Inarüniti uénedü le, inarüni giñe lanichigu.

46 Ábati láhuduragun urúei Nabukodonosoru ligibugiñe Danieli, aba lélemuchun dagá lerebe múarugu, aba lariñagun lun lichugún adagaragüdüni luma kupali lun Danieli. 47 Lárigiñe aba lariñagun lun Danieli:

—Bungiu le tímatimaati, le Hubungiute ligía wéirigutimabei hádangiñe sun búngiugu; ligía Haburemebei urúeigu, ligía giñe afuranguagüdübalin katei aramudaguati, ladüga darí baali lanichigu.

48 Aba líchuguni urúei Nabukodonosoru Danieli lidan aban ubaraü íñuti, aba líchugun edewehani le gebegiti lun; aba giñe líchuguni lun ligía lan gumadimati Babilónia, luma lun ligía lan furumiñeti ábuti houn sun chu tau ha Babilóniabaña.

49 Aba lichugún Sadürákü, Mesakü luma Awedi-negó lidan ubaraü íñuguti Babilónia kei lamuriahani Danieli luma urúei. Ánheinti Danieli, aba lerederun luma urúei.