1 Lidan lǘrüwan lirumudiri larúeihan Siru le Pérüsiana, aba gewenedü lan Danieli lememe gíribei Bélisasarü aban uénedü, gama lumoun hénrenguti gunfurandawa lan lanichigu. Lau sun lira aba letenirun Danieli lun buidu buidu aba gunfurandalani lanichigu uénedü ligía.

2 Lidoun dan ligía, au Danieli, ǘrüwañein dimaasu nau lau saragu íruni. 3 Méigintina éigini semeeti, mouchun au úi ni diwéin, máhurudagun au ibiñein nuougua darí sügühali ǘrüwa dimaasu ligía. 4 Weyu wein-gádürü lidan furumiñeti hati lidan irumu, láruñadina óunwenbu duna le Tígürisi. 5 Sódini, aba narihin aban wügüri linu fínutu ladaüragun luma aban béliti lauti golu liranaagua. 6 Ámirihati lúgubu kei topasiu, aduranhati ligibu kei labirihaniga, ítara liña lagu kamá tochi le durunguati, ámirihati larüna luma lugudi kei buronse, ítara liña lumalali kamá hamalali saragu gürigia.

7 Áurügüñein gewenedü uénedü ligía, gürigia ha númabaña mefentiña luagu ni kata, ladüga lárügüdüniña anufudei, aba héibaagun aramudagua. 8 Nábuguañadina dan le narihinbalin óunwenbu uénedü ligía. Aba lasansiragun nigibu, aba nasandirun kamá hamuga lalouguaduña nere. 9 Dan naganbunbalin ladimurehan, aba néiguadun, aba nerederun roun múarugu. 10 Lárigiñe, aba lárügüdünina aban úhabu, aba liñuragunina darí nerederun láurügü núhabu luma nigachürügü múarugu. 11 Aba lariñagun nun:

—Danieli, le hínsiñebei lun Wabungiute, aganbabéi le lunbei nariñaguni bun buidu: Saraba, ladüga nounahóuña bumoun.

Kei lagumuchun lariñaguni dimurei le, aba nararamun adadagareina. 12 Ábati lariñagun nun:

—Manufudedabá Danieli, ladüga lúmagiñe furumiñeti weyu le bálugunbei gunfuranda bani katei le burí hénrenguti, aranse buguya lun bǘnabudaguagüdün bungua ligibugiñe Wabungiute, aba laganbuni bafurieidun. Ligía lébubei niabin. 13 Ageindaguatina luma ánheli le ágüdahabalin arúeihani le lani Pérüsia luagu wein aban weyu; gama lumoun aba liabin Migeli le aban hádangiñe ánheligu ha íñutimabaña íderaguana, ladüga rédeihadina yebe nábugua hama urúeigu Pérüsiana. 14 Niábiña lubeiti ariñagei le lunbei lasuseredun houn bumutuniña bun, líteme, ladüga uénedü le buénedübei, luáguti dan le lunbei liabin.

15 Sun aniha lan adimureha nun, anaha aríagua múarugun, mariñagunga ni kata. 16 Sódini aba laguuruni aban lenege liráü wügüri niyumaaru. Ábati nariñagun lun le buga nigibugiñebei:

—Nabureme, buíngüda láadina uénedü le lau idiheri ani débiligüda láadina. 17 Ida lubagia nadimurehan buma? Ladüga méreedina, maguraasun au.

18 Le buga lenegebei liráü wügüri, ábaya laguurun nuagu, aba líchugun iseri erei nun, 19 lariñaga nun:

—Manufudedabá, madiheridun buguyame giñe. Hínsiñetibu lun Wabungiute; ragüba anigi!

Sun anihán lan adimureha nun, aba nasandirun néredun murusun murusun, aba nariñagun:

—Nabureme, badimureha nun, ladüga rúyaadibu erei nun.

20 Ábati lariñagun nun:

—Subuditi san bun ka lan uagu niábinbei arihabu? Ladüga gasu lan nageindagunya luma ánheli le ágüdahabalin arúeihani Pérüsiana. Dánmeti súnhali nageindagun luma, ábame liabin ánheli le ágüdahabalin arúeihani Güresia. 21 Guentó, nariñagaali le bürüwañubei tidan liliburuna inarüni bun: Lidan nawuribuhan hama, Migelirügüñein le ánheli le óunigirubalin Ísüraeli íderaguana.