1 Aba lagunbirahan Bélisasarü, le urúei Babilóniana milu hádangiñe gürigia ha íñugubaña fulasurugu lun aban adineruni; lidan héigiña lan, aba latun urúei saragu diwéin hama agunbirahóutiña. 2,3 Dan bacharuaali urúei Bélisasarü, aba lóunahan anügei kopu burí lauti golu luma pülata le lanügübei Nabukodonosoru ténpulurugugiñe Herusalén aba lanügǘn lun, aba latun lidan, ligía hau sun lúmarigu, lubúaligu hama sun ha amisurahóubaña lidoun adineruni. 4 Sun hagía añaha ata diwéin, añaha eremuha houn haguariuangu, ha adügǘbaña lau golu, pülata, buronse, gürabu, wewe luma dübü.

5 Lidan oura ligía, aba lasaliragun aban lúhabu wügüri, aba lagumeserun abürüha luagu touba muna le harubei lau aban lifinga lúhabu. Dan larihinbalin urúei úhabu le abürühabei, 6 aba lasansiragun ligibu, aba lagumeserun adadagara lúmagiñe lugudi lumoun lichügü le lanufude. 7 Aba lagúarun houn garíaahatiña, chu tau hama ha subudibaña hawaguti waruguma Babilónia, lariñaga houn:

—Le aliihati le bürüwañubei ñein, ariñagaléime nun ka lan mini lan, ladaüraguba tau daüguaü guchu, daüwa ligíame aban iñari golu luagu ligiina, ani lárügüdübei lǘrüwan ubaraü lidan narúeihan.

8 Aba hebelurun sun chu tau ha eseriwidubaña lun urúei rúmurugun, gama lumoun úati ni aban gayaraati gunfurandalani le abürühóubei ni lun lariñaguni lanichigu lun urúei. 9 Ábati lebelurun óunwenbu anufudei lidoun urúei Bélisasarü, aba lasansiragun ligibu sunsuinagubei. Gürigiati ha lánigu urúei, ibidiñeha houn kaba lan hadüga, 10 gama lumoun dan le taganbuni urúei úguchuru lagúarahan tiráü le urúei hau sun amisurahóutiña, aba tebelurun lidoun rumu le ñein lubéi adineruni aba tariñagun:

—Gabagaribá urúei lun sun dan! Madiheridabá, masansiragun ligíame bigibu, 11 ladüga lábugiñe barúeihan, anihein aban eyeri, lani Bungiu le Sándubei Sífiri adundehabalin. Dan meha le urúei lan búguchi, arufuda lumuti meha eyeri ligía luagu harugounga lan lisaminan, huali lichügü, chu lau kei híbiri búngiugu. Ligía líchugunbalin urúei Nabukodonosoru le búguchi eyeri ligía hábutime sun garíaahatiña, chu tau hama subusetiña hawagu waruguma ha fulasurugubaña, 12 ladüga anihein aban sífiri hanarimeguti, lualin ichügü luma lichú aau lun gunfurandawa lan lanichigu uénedü, lun lariñawagún mini lan dimurei burí le aramudaguati, luma lun laranserun burí katei cháguati lidan Danieli le láchubei urúei, Bélitüsasarü. Waba lun Danieli, lariñagubei le mini lubéi katei le bürüwañubei luagu touba muna bun.

13 Aba lanügǘn Danieli ligibugiñoun urúei, aba lariñagun urúei lun:

—Buguya san Danielibei, le aban hádangiñe huríu ha adaürǘtiña hagüra ha lanügübaña núguchi le urúei Nabukodonosoru Hudaagiñe? 14 Ariñawagúaali nun luagu anihein lan lani Bungiu Sífiri bidan, luagu harugounga lan bisaminan, luagu weiri lan lualin bichügü ani chu lan bau. 15 Ñǘbuinhaña wügüriña ha chútimabaña aau ya lun haliihani dimurei le, luma lun hariñaguni lanichigu nun gama lumoun úagubeiti gunfuranda hamani. 16 Gama lumoun aganbaadina luagu gayara lan bafuranguagüdüni katei aramudaguati luma burí katei hénrenguti. Anhein gayara lubéi baliihani dimurei le, ariñagabéime lanichigu nun, nadügüba lun badaüragun daüguaü to guchu, rúa ligíame aban iñari golu luagu bigiina, ábame bárügüdüni lǘrüwan ubaraü lidan narúeihan.

17 Ábati lariñagun Danieli lun:

—Redei humá lau hidewese, ru huméi giñe uéiriguni lun amu lau lerederun tidan hani palasiu. Lau sun luwuyeri, nariñagaali hun ka lan mini lan dimurei burí le bürüwañubei luagu touba muna.

18 —Bungiu le íñutimabei íchugubalin arúeihani lun Nabukodonosoru le húguchi. 19 Ladüga ubafu le buga líchugubei lun, inebeti houn lílana sun fulasu, adadagara hagía ligibugiñe. Áfaragua lumutiña ha labusenrun láfaragun, ígiralaña ha labusenrun habagaridun lun habagaridun; ru lumutiña híbiri iñu ru laña híbiri ǘnabu. 20 Gama lumoun dan le laweiridunbei lanaagun lungua, aba ladügüni katei lau maganbadi luma pantaü, aba lagidarún ubafu luma uéiriguni le buga luágubei kei urúei. 21 Aba ladireirúniwa hádangiñe gürigia, aba lerederun kei aban hawuyeri animaalugu; aba laganóun hama animaalugu áraabuna, aba leigin sagadi kei bágasu, aba lagoun serenu darí lasubudiruni luagu gabafu lan Bungiu le íñutimabei luagu sun harúeihan gürigia, ani ru lani agumadihani lun le unti labusenra líchuguni. 22 Guentoti, huguya Bélisasarü, le liráü, lau sun subudi humani le buga asuseredubei lun, mabagariduntün giñe lau ǘnabugubuni. 23 Lubaragiñe lira, adügarügü huguya bula lau Bungiu le siélubei, lau hóunahan anügei burí weru luma kopu wéinamuti le tídanbei ténpulu, aba hatun diwéin lidan hama ha hamisurahabaña, aba heremuhan houn búngiugu ha adügǘtiña lau golu, pülata, buronse gürabu, wewe, luma dübü; búngiugu ha marihintiña, maganbun, ibidiñe ni kata houn. Meremuhantün lun Bungiu le gámabalin hibagari lúhaburugu, le subudihabúbei lun sun le hadügübei. 24 Ligía lóunahanbalin úhabu le abürühabalin dimurei le, 25 MENÉ, MENÉ, TEKELI luma PARSIN.

26 —Mini lan MENÉ: Abahüda laali Bungiu luéyuri burí harúeihan urúei, ani lagumuchaguagüdaali; 27 TEKELI: Amisuraha laadün lidan balansu ani huálitün sügǘ lau le lunbei hihürübei lan; 28 PARSIN: Fánreinwagua harúeihan urúei, lederegerúa houn Médiana hama Pérüsiana.

29 Aba lariñagun urúei Bélisasarü lun hadaüraguagüdüni Danieli tau daüguaü guchu, daüwa ligíame aban iñari golu luagu ligiina, aba lasubudiragüdüni houn súngubei luagu lúmagiñe lan oura ligía, Danieli lan laubei lǘrüwan ubaraü lidan arúeihani.

30 Áriebumeme ligía, aba lafarún Bélisasarü, le harúeite Kalüdéana hilagubei, 31 aba lárügüdüni Daríu le Médiana arúeihani. Ǘrüwa-wein-biama irumu lau Daríu dan ligía.