1 Lidan lǘrüwan lirumudiri larúeihan Bélisasarü, au Danieli, ábaya gewenedü nan aban uénedü amu luéi le furumiñeti. 2 Laganóun nun lidan uénedü ligía, kamá hamuga uburuguñadina Susa, lumúanrugu Elamü, laru duna le gíribei Ulái. 3 Sódini, aba narihin aban mudún laru duna. Ñeinñein bián ganchu íñuti luagu, gama lumoun aban lídangiñe ganchu ligía, lárigiñehali laboucha luagu, ani íñuti luéi le aban. 4 Aba narihin labukuhan mudún ligía lau liganchun luagun oubaü le ñeinhin lubéi lálüda weyu, nórute luma luagun suru, siñati lararamuni ni amu animaalu, ni lun lesefurun luéi labuleseihan. Adüga lumuti le labusenrun, ani aganwoundeina liña lere.

5 Anahagua asaminara luagun katei le ariha náalibei, ligía narihin liabin aban gábara luéigiñe oubaü le ñeinhin lubéi lálüda weyu éibaagueina, fureseti léibaagun darí lun madaga lan lugudi múarugu. Ñeinñein aban óunwenbu ganchu labadinagua lagu gábara ligía, 6 dan le lachülürünbei lurugabu mudún, aba labukuruni lau sun lere 7 aba láhalachuni bián liganchun, méreuga mudún ligía lun lageindagun luma lárigiñe, aba láhuchuruni gábara mudún múarugun, aba ladügüraguni úouga kaba lan esefurei.

8 Eibu dan, éredeinatima gábara ligía, gama lumoun lidan oura le gabafutima lubéi, aba láhalachagun liganchun le wéiribei, leweñegua, aba lasaliragun gádürü ganchu arufuda luagun gádürügubei oubaü. 9 Aba láfuridun ábanya liraüraü ganchu luéigiñe aban lídangiñe liganchun, aba laweiridun saragu luagun suru, luagun oubaü le ñéingiñe lubéi laboucha weyu luma luagun Lumúan Magadiñein. 10 Aba laweiridun saragu darí lun lachülürün hamoun súdaragu ha siélubaña, chagati hádangiñe waruguma aba ladügüraguniña; 11 álugati giñe lageindagun luma hábuti súdaragu hagía; redei lumuti adagaragüdüni le adügǘbei sagü weyu, adügaléi le labusenrun lidan fulasu le lánina alawahani. 12 Aba lerederagüdüniña lánigu lidan fulasu le lánina adagaragüdüni fuiléi inarüni múarugun. Adüga lumuti sun le labusenrubei ani saliti sun katei lun buidu.

13 Lárigiñe aba naganbun lariñagun aban ánheli lun ábaya ánheli:

—Ídaba san lagumucha katei le, le arihúbei luagu latarü le lánina adagaragüdüni le ságüti weyu? Átiribei san dan ladurarun lanarime figóu le lánina tederegerun lani Wabureme sanduariu hau sun afiñetiña ha tídanbaña lun hadügürawagun?

14 Lariñaga lun:

—Darí bián-milu ǘrüwa-san rábounweyu luma binaafin, lárigiñeme le, ábame tarumadun sanduariu.

15 Sun anaha lan au Danieli, gewenedei uénedü le, oucha lun gunfurandanani, aba lasaliragun aban kamá wügüri nigibugiñe sódini, 16 aba naganbun lariñagun aban umalali lídangiñe duna Ulái:

—Gabüriéli, furanguagüdabéi luáguti uénedü le lun wügüri le.

17 Ábati layarafadun nun. Aba nalouchun, aba nélemuchun dagá nerebe múarugu, gama lumoun aba lariñagun nun:

—Liráü wügüri, subudibéi luagu luáguti lan lagumuchun dan uénedü le.

18 Sun aniha lan adimureha nun, aba néiguadun, aba nerederun roun múarugu; gama lumoun aba laguurun nuagu, aba lararamagüdünina, 19 aba lariñagun nun:

—Nasubudiragüdaali bun le lunbei lasuseredun danme lagumuchun lidaani ligañi Wabungiute, ladüga luáguti lagumuchun dan uénedü le. 20 Mudún ligía lau bián liganchun, lurúeitegu Media luma Pérüsia. 21 Gábara, le barihubei lurúeite Güresia, le óunwenbu ganchu le labadinaguabei lagu, furumiñeti urúei. 22 Gádürü ganchu le asaliragubei dan le láhalachagunbei furumiñeti ganchu, mini lan luagu láfuridayaba lan gádürü arúeihani lídangiñe néchani le, gama lumoun mítaranbei lubafu kei le furumiñeti.

23 «Danme lagumuchun lagumadihan arúeihani burí le,

danme gíbeguaali wuribani,

ábame lárügüdüni aban urúei wuribati ani marasualuguti ubafu.

24 Lachülürüba aban dan lun gabafubei lan,

gama lumoun mama lau lubafu guánarügü;

lagünrinchaguba katei lidan aban igaburi le hénrenguti lafiñerun,

ani lagañeiruba lidan sun le lunbei ladügüni.

Lagünrinchaguba wügüriña gabafutiña,

hama saragu hádangiñe lánigu Wabungiute.

25 Ladüga libibun,

lagañeiruba burí leyeehan,

labuinchuba lau pantaü,

saragubaña gürigia ha yebe awinwandutiña hemenigiñu

láfaragubaña hanagangiñe.

Lageindaguba luma Bungiu,

luma Harúeite urúeigu,

gama lumoun leferidirubei wuribu».

26 —Subudigüdawaali luáguti uénedü le luáguti rábounweyu luma binaafin bun, ani inarüniti; gama lumoun buguya mabahüdaguabéi ladüga lǘgili lagunfulirun.

27 —Au Danieli, aba nasandirun lalouguadun nere, aba nerederun sándiñu átiri weyu. Lárigiñe aba násaarun aba nasigiruni nuadigimari luma urúei. Gama lumoun wéiriti bugaha nidiheri ladüga uénedü le buga nuénedübei, ladüga siñá nani gunfuranda.