1 —Au, le urúei Nabukodonosoru, ayumahatina darangilaü luma awanseruni houn lílana sun fulasu, néchani luma tuwuyerigu iñeñein ha ubouagubaña. 2 Busentina lun hasubudiruni sun huguya katei buíduburiti le adüga láalibei Wabungiute le íñugubei nun. 3 Wéinamuti lani milaguru! Laduraruba larúeihan lun sun dan, lasigiruba lubafu hadan sun ha lúnbaña hayabin ubouagun.

4 —Au Nabukodonosoru, darangiluti meha naganóun núbiñe ani buiti meha lidin sun katei nun. 5 Gama lumoun luagu aban áriebu, balañu niña, aba gewenedü nan aban uénedü le anufudedaguagüdübalina, ru ligía saragu saminaü luma burí luenedǘniwa katei le abuinchagüdübalina lau anufudei.

6 —Ábati nagúaragüdün hawagu sun chu tau Babilóniana, lun hariñaguni lanichigu nuénedü nun. 7 Aba hayabin sun burú, garíaahatiña, chu taugu hama Babilóniana ha subudibaña hawagu waruguma, aba nabahüdaguni nuénedü houn, gama lumoun siñá hamuti lanichigu ariñaga nun. 8 Lárigiñe aba liabin Danieli lememe giñe gíribei Bélitüsasarü kei liri nubungiute, Danieli le labugurubei lani Bungiu le Sándubei Sífiri libagari, aba nabahüdaguni nuénedü lun nariñaga lun: 9 «Bélitüsasarü, hábuti garíaahatiña, subudi numuti luagu lani lan Bungiu le Sándubei Sífiri abugurubalibu, luagu giñe subudi lan sun katei aramudaguati bun. Aganbabéi lubeiti nuénedü, bariñageime lanichigu nun. 10 Anihán burí katei le narihubei sun anaha lan roun:

"Lamidangua ubóu, ñeinñein aban tídibu wewe íñuti.

11 Aba laweiridun lídibu wewe ligía, aba lagaranadun saragu;

dagati sielu, ani gayaraati larihín lídangiñe lidise-agei ubóu.

12 Wéiriti lubuidun burí lubana ani gíbeti lin,

darí lun buídurügü lan lun heigin súngubei.

Ábaha hamuñadirún animaalugu áraabuna lábugiñe,

hayabinha dunuru adüga hamasa luagu lilimun,

lídangiñe habagarida sun lílana ubóu".

13 —Sódini, aba narihin lidan nuénedü lararirun aban ánheli óunigiruti siélugiñe, 14 aba lagúarahan lau umalali héreti:

"Chaün huméi lídibu wewe,

chaün huméi lilimun burí luéi,

gidá huméi lubana, chagagua huméi lin.

Anuraha hamá animaalugu áraabuna ha lábugiñebaña lamuñadiri

hama dunuru ha luágubaña lilimun.

15 Gama lumoun ígira huméi lugudina luma lílagüle múarugu

hagüreime lau güringüri lauti gürabu luma buronse,

ábame hígiruni laganagua sagadi le áraabubei,

lábürühame serenu luagun,

léigame sagadi úara hama animaalugu áraabuna.

16 Ábame lálülüdün lau,

ábame lerederun kei aban animaalu,

ladurarame wuribani le lun luagu sedü irumu.

17 Anihán siadi le híchugubei ánheligu óunigirutiña,

lun hasubudiruni sun wügüriña

luagu gabafu lan Bungiu Suntigabafu luagu harúeihan gürigia,

luagu ru lani agumadihani lun le unti labusenra líchuguni,

ani adüga ligía lun le lan ǘnabugutimabei hádangiñe wügüriña

ligía lan lábuti aban néchani".

18 —Ligía uénedü le nuénedübei, au urúei Nabukodonosoru. Guentoti Bélitüsasarü, ariñagabéi lanichigu nun, ladüga úati gunfurandalani ni aban hádangiñe chu taugu ha lábugiñebaña narueihan; gama lumoun buguya basubudirubei lanichigu, ladüga anihein lani Bungiu le Sándubei Sífiri bidan.

19 —Ábati lerederun Danieli asaminara luagu murusun dan, luagu burí saminaü le ñǘbuinbei lichügüwagun. Aba lariñagun urúei lun: "Bélitüsasarü, madiheridabá luagu nuénedü ni luagu lanichigu". Aba lóunabun Bélitüsasarü, lariñaga: "Hawagunlá láganiñu urúei lábürüha lanichigu uénedü le! 20 Tídibu wewe íñuti ani garana le larihubei urúei, le achülürübei dagá sielu ani gayara larihín lídangiñe lidise-agei fulasu, 21 le buíduburibei lubana ani gibe lin, darí lun buídurügü lan lun heigin súngubei, le ábugiñebei hamuñadirúa animaalu áraabuna, adüga hagía dunuru hamasa luagu lilimun. 22 Huguya tídibubei wewe ligía urúei, huguya le wéirihalibei ani gabafu huguya. Wéirihali huéirigun darí lun lachülürün sielun, chülühali hagumadihan lidoun sun ubóu. 23 Arihatün giñe lararirun aban ánheli siélugiñe le ariñagubei: Chaün huméi tídibu wewe, günringua huméi, gama lumoun ígira huméi lugudina luma lílagüle múarugu; gürá huméi lau güringüri le lauti gürabu luma buronse, ábame hígiruni lidan sagadi le áraabubei. Ábürühala serenu luagun, léigame sagadi úara hama animaalugu áraabuna luagu sedü irumu. 24 Mini lan lira, siadi le líchugubei Bungiu le íñutimabei huagun, urúei. 25 Hadireirúaba hawéi gürigia, ábame haganóun hama animaalugu; héigiba sagadi kei bágasu; ábame hagoun serenu. Ítara luba hawinwandun luagu sedü irumu, darime hasubudiruni luagu gabafu lan Bungiu le íñutimabei luagu sun arúeihani le hani gürigia, luma luagu ligía lan íchugubalin arúeihani lun le unti labusenra líchuguni. 26 Lariñawagun lun ligirún lugudina wewe luma lílagüle múarugu, mini lan luagu lichugúayaba lan arúeihani hun lárigoun, danme le subudi humaali luagu Bungiu lan gabafubei. 27 Falá huméi lubeiti eweridiruni le: Adüga huméi sun katei lau úarani, hebé hafigouhan; redei huméi huriban, íderagua humaña gudemetiña. Fagua ítara, gayaraabei hasigirun abagarida lidan darangilaü luma lidan awanseruni".

28 Sun burí katei le, le asubudirawagüdübei lun urúei Nabukodonosoru, gúnfuliwati: 29 Aban irumu lárigiñe, dan anihán lan urúei éibuga tábulugu lani palasiu Babilónia, 30 aba lariñagun:

—Ariha humá lueirin Babilónia! Au adügübalin lau óunwenbu nubafu lun ligíaba lan furumiñeti fulasu lidan narúeihan, lun larihín nuéirigun.

31 Ñéingili urúei adimureha, ligía laganbun lariñagun aban umalali siélugiñe:

—Aganbabéi katei le urúei Nabukodonosoru. Mámaali bani barúeihan; 32 badireirúa hádangiñe gürigia, ábame baganóun hadan animaalugu; béigiba sagadi kei bágasu luagu sedü irumu, darime basubudiruni luagu gabafu lan Wabungiute le íñugutimabei hawagu sun néchanigu ha ubouagubaña, ani ligía lan íchugubalin le labusenrun lun ligía lan gumadimati.

33 Lidan oura ligía, aba lagunfulirun siadi le ariñawagúbei, aba ladireirún Nabukodonosoru hádangiñe gürigia; aba leigin sagadi kei bágasu, aba lagoun serenu darí lun lamiginagudun lídiburi luma lúbara kamá tiyu luma túbara ágila.

34 —Dan lagumuchunbei dan le lánina nasiadirun, au Nabukodonosoru, aba narihin sielun, aba nasandirun luagu areidaguaadina lan lídangiñe lílülün nau; ábati nabiniruni Bungiu le íñutimabei, aba neremuhan lun le gabagaribei lun súnwandan, nariñaga:

"Laduraruba lubafu lun súnwandan;

magumuchaguadibei larúeihan.

35 Ni kata lílana ubóu ligibugiñe.

Adüga lumuti sun katei kei labusenrun,

dandu sielu kei ubouagu.

Úati ni aban lun gayara lan lawügürihóun lun lubafu,

ni lun lálügüdüni ka lan uagu ladügei katei kei ladügüni".

36 —Lidan oura ligía, aba lareidagun lílülün nau, aba liabin luéirigun narúeihan lárigoun, niri luma nuéirigun. Aba hayabin nánigu hama gürigia ha íñugubaña lidan nugumadin áluahana, ábaya nárügüdüni gumadi nageira, aba weiri lan nubafu sügǘ lau buga furumiñe. 37 Guentó lubeiti, au, Nabukodonosoru, rútina uéiriguni lun Urúei le siélubei, ladüga inarüniti sun katei le ladügübei ani richati, ani gayaraati giñe lǘnabudagüdüniña ha wéirigubaña lidan haritagun.