1 —Íderagua numuti giñe, ru au gurasu lun, dan meha lídanñein lubéi furumiñeti lirumudiri larúeihan Daríu le urúei Médiana.

2 Guentoti, nasubudiragüdaali inarüni bun:

—Añaheingua ǘrüwa urúeigu lun harúeihan Pérüsia; hárigiñeme, ábame larúeihan aban hagadürün, ani rísibei hawéi ǘrüwa ha lubaabaña. Dánmeti wéirihali lubafu ladüga lirisin, ábame láluahan lawuribuhan luma arúeihani le lani Güresia. 3 Gama lumoun lárigiñeme, larúeihaba aban urúei gawuribuhati, ábame lachawaraguni lugumadin lidoun aban óunwenbu fulasu, ábame ladügüni le labusenrun. 4 Gama lumoun danme le derebuguhali lidan larúeihan, ábame lagünrinchawagun, ábame lafanreinrawagun lidan gádürü murusun. Másügürünbei lubafu urúei ligía hamoun ladügawagun, maweirinhalime giñe lubafu arúeihani ligía kei meha furumiñe, ladüga lafanreinrawaguba ábame hagumadihan amu lidan lubara.

5 —Wéiribei lubafu urúei Ehiptuna, gama lumoun laweiriduba lubafu aban hádangiñe ábutigu sügǘ lau, ábame laweiridagun larúeihan. 6 Lárigiñeme fiu irumu, ábame ladügün urúei Ehiptuna luma urúei Síriana aban daradu, ábame líchugunu urúei Ehiptuna liráü lun tamarieidun luma urúei Síriana, lun hachoururuni darangilaü hádangua. Gama lumoun magunfulirunbei haransehan, ladüga dandu tuguya kei tiráü, túmari hama tumusuniña, háfarawaguba hilagubei. 7 Gama lumoun murusun dan lárigiñe le ábame larúeihan aban haduhe, lageindaguba hama súdaragu Síriana, ábame láfaraguniña, ábame ligía lan agumadiha. 8 Lanügübaña habungiutegu, haguariuan, luma burí amu ílagu lauti golu luma pülata Ehiptun. Lárigiñeme átiri irumu úouga wuribu hadan bián néchani ha, 9 láluguba urúei Síriana, lárügüdüni Ehiptu. Gama lumoun leferidirubei wuribu ábame lagiribudun lageiroun.

10 —Gama lumoun haranseruba lirahüñü urúei Síriana lun wuribu, ábame hóundarun saragu súdaragu. Lídiba aban hádangiñe áluga lagañeiruni Ehiptu, lagünrinchagubei sun le ñeinbei kei aban duna dan le láfuridun lau lere; lárigiñe ábayame lageindagun luma Ehiptu, ábame lachülürün lidoun luburugute urúei Ehiptuna le héretimabei. 11 Lagañiduba urúei Ehiptuna luagu katei le ladügübei urúei Síriana, ábame láfuridun urúei Ehiptuna ageindagua luma, ábame lagañeiruni sunsuinagubei. 12 Labuinchuba lau pantaü luagu lagañeiruni wuribu luma luagu láfaragun saragu hádangiñe láganiñu; gama lumoun madurabei lubafu saragu dan. 13 Lóundarayaba urúei Síriana saragu súdaragu luéi le furumiñeti, átirime irumu lárigiñe, aranseñu haba lun hábürühan luagun Ehiptu.

14 —Danme lasuseredun katei le, saragubaña agarabaagutiña luagun urúei Ehiptuna. Ñéinbaña fiu wügüriña Ísüraelina ha wuribatiña hadan ítara kei larufudun lidan uénedü, gama lumoun heferidiruba. 15 Liábinba urúei Síriana, ábame ladügün aban baríeiru geyegua lau aban uburugu héreti, ábame lagañeiruni. Ni habuidun-agei lisudaranigu Ehiptu hásiñarubei hawanserun áganiñu eredera. 16 Le ebelurubei, ladügübei le labusenrun hau láganigu, úouga kaba lan agagibudagua luma, ábame lerederun lidan múa le füramase lubéi Wabungiute, agünrinchagueinei sun le ladarirun lubarua. 17 Bóugudin luéi lira, laranseruba lun lárügüdüni sun lumúan Ehiptu; lun ladügüni lira, ladügüba aban daradu luma urúei ligía, ábame líchugunu liráü lun lun lúmarime, lun lagünrinchagubei lan larúeihan; gama lumoun magunfulirunbei laransehan. 18 Lárigiñeme, ábame lageindagun hama burí ha lárubaña beya, ani saragubaña hádangiñe ábürühatiña labun lubafu; gama lumoun lagumuchaguagüdübei aban heneraali busiganu le, ábame líchuguni lurúeite Siria lidoun busiganu. 19 Ábame lagiribudun urúei ñéingiñe lun lábürühan luagun guánarügü luburugute; gama lumoun leferidiruba ábame lafarúniwa, ani maganbúnwayadigiaalime luagu.

20 —Ábameti liabin amu urúei lun larúeihan lidan lubara, le lunbei lóunahan aguburahei liseinsun gumadi lun larisidagüdüni larúeihan, ani fiume weyu lárigiñe ábame háfaruni hilagubei, ani mámaba wuriburugu háfarei.

21 —Larúeihaba aban wügüri mínsiñeguti lárigiñe, le yebe úabei yu lan lun lun larúeihan, laramudubei luriban laritagun, ábame lárügüdüni ubafu lau iyeeni. 22 Lagünrinchagubei sun erei le awügürihóuti lun sunsuinagubei, áfaraleime lábuti daradu. 23 Leyeedagubaña giñe ha adügübaña daradu lánina umadaguaü luma, ani lau sun míbebaña lan lánigu, lagañeiruba. 24 Lídanme magurabúniwa lan, lebeluruba lidoun fulasu burí le rísitimabei fulasurugu, ábame ladügüni le meha madügün habéi lagüchagu: Lafanreinhabei ílagu luma irisini le libihubei wuriburugu hadan lisudaranigu. Laransehaba lun lawuribuhan luma uburugu burí héreti íbini luágurügü átiri dan.

25 —Lárügüdüba gurasu luagu lubafu luma lere ábame lábürühan luagun urúei Ehiptuna lau hídemuei saragu súdaragu. Lóunabubati lurúeite Ehiptu manufudeuga lau erei, ábame lawuribuhan hau lisudaranigu ha gabafubaña, gama lumoun hagarabaaguba lánigu luagun ani siñaguabei lungua lun lawanduniña súdara hagía. 26 Háñaha lamisurahabaña eiga luagu lidabulan guánarügü, hagíaba aranseha günringuaü lubá, ladüga heferidirubei lánigu wuribu, ani hóunweguba saragu hádangiñe lisudaranigu. 27 Biángubeimeti urúeigu ha, lau hasaminarun lun hadügün damichi hóuniwagua, hañuuruba eiga luagu ábanmeme dábula, hadimurehame iyeeni hámagua aban lun le aban, gama lumoun úabei ni aban hádangiñe ibihiti le labusenrubei ladüga mámagilime dan. 28 Lagiribuduba lurúeite Siria luburuguterugun lau irisini le lárügüdübei wuriburugu, ábameti lagarabaagun luagun daradu le sándubei. Ladügübei laritagun, lárigiñeme, ábame lagiribudun lageiroun. 29 Danme lachülürün dan le ariñawagúaalibei, lóunahayabaña lánigu ageindagua luma Ehiptu, gama lumoun magañeirúnbei kei lidan furumiñeti wuribu. 30 Hageindaguba súdara Rómana ha anügǘtiña tidan waporu hama lánigu, lémeti hanufude, ábame héibaagun, ábameti larariraguagüdüni lurúeite Siria liyereehabu luagun daradu le sándubei, lafalarubaña huríu ha agarabaagubaña luagun daradu lun heseriwidun lun.

31 —Hadaaguba lisudaranigu katei le moun lumuti ladügün ténpulurugu, hararamubei adagaragüdüni gudawarügüti le ságüti weyu, ábame híchuguni lagübüri guáriua ñein. 32 Láluguba urúei lagañeihaniña ha agarabaagutiña luagun daradu, gama lumoun gürigia ha hínsiñehabubaña lun Wabungiute, deregüdagu haba ani háfagubei le ñǘbuinti. 33 Harufudahaba chu tau ha fulasurugubaña houn saragu gürigia, gama lumoun lárigiñeme ábame háfaraguniña hilagubei, ábame háguduniña, ábame híweruhani sun hámati, ábame hanügüniña idamunime lidan fulasu terencha. Laduraruba katei le fiu dan. 34 Danme lachülürün oura lun éibaahouni, habihuba murusun íderawaguni, saragubaña óundarutiña hamoun lun hagañeirun somu katei. 35 Héibaahouba giñe hádangiñe háñaha arufudahabaña houn gürigia, lun lárigiñe lanme hóuchawagun, ábame harumadawagüdün aranserúa hagíame, darime lachülürün lagumuhóun dan le iridúaalibei.

36 —Ladügübei lurúeite Siria sun le labusenrun. Wéiribei lupantan, darime lun laritagun luagu wéirigutima lan sügǘ hau sun búngiugu, lanabagubei Wabungiute le inarünitibei; ani lasaliruba sun katei lun buidu darime lóunahani Wabungiute labeichún; ladüga lagunfulirubei Wabureme le lariñagubei. 37 Urúei le, meberesenbei hau habungiutegu lagüchagu, ni hau búngiugu ha únbaña háhuduragua würiña, ni lau amu bungiu, ladüga laritaguba luagu wéirigu lan hawéi. 38 Gama lumoun láhuduraguba lun bungiu le óunigirubalin uburugu derebuguti bungiu le meha masubudirun habéi lagüchagu, lunba láhuduragua, ladagaragüdüba golu lun, pülata dübü buíduburiti luma burí katei le gebegiti saragu. 39 Layusuruba gürigia ha áhuduragutiña houn búngiugu terencha lun hóunigiruni barieiru; ani sun ha áhuduragutiña lun urúei le, líchuguba katei buiti houn, líchugubaña lidan ubaraü íñuguti, ru ligíame fulasu burí houn keisi hafayeiruaha.

40 —Danme lachülürün leben dan, lageindaguba lurúeite Ehiptu luma lurúeite Siria; gama lumoun liábinba lurúeite Siria lubaroun kei aban guran huya, ábame lábürühan luagun Ehiptu, ábame labuluchagüdüni uburugu tau karü to lánina wuribu, súdara ha hawagutiña gabayu tuma saragu waporu. 41 Lebeluruba giñe lidoun uburugu le buídubei, ábame láfaragun saragu gürigia ñein; gama lumoun hesefuruba lílana Edomu luma Moabü, luma lueirin-agei lumúan Amón. 42 Hebeluruba lánigu lidoun amu burí ageiraü, ani íbini Ehiptu mesefubei. 43 Lanügübei golu luma pülata luma burí sun ílagu le buíduburibei Ehiptu. Lagañeirubei giñe Liwia luma Etiopía. 44 Gama lumoun libihuba uganu lídangiñe oubaü le ñéingiñe lubéi laboucha weyu luma luéigiñe nórute le lunti lalouchagüdüni; ábameti láfuridun lau igañi, lau aritaguni lun láfaragun saragu gürigia, 45 ábame líchugunu likianpun-agei labadinagua barana luma wübü wéiriguti ani sánduti. Gama lumoun ñein guánarügüba lachülüra lóurate lounwen, ani úabei ni aban lun líderaguni.