Arca de noé

13 Nguluwi nakamlonjela Nuhu, "Nanuwila kuwadumya wanhu weng’ha kwa vila nawaimemeza isi wihe. Ena, ndowadumya ng’hatu hamwe na isi yeng’ha. 14 Lelo ugongomanye safina kwa mbawo zinojile. Ugawanule vihengo mgati na ubakalize lami mgati na kunze. 15 Koidita iwe kota hino, ulefu uwe wa utali wa mita miya imwe na makumi gadatu na zidatu na ugazi wa mita makumi meli na mbili na mita kumi na zidatu kuluta kuchanya. 16 Safina ayo iwe na vinduwiko vidatu. Hagati mwa safina ayo kuwe na chiswiswili cha fudi sentimita makumi gane na zine kwa nzingo za hafungo mwa chinduwiko acho na lwizi hafungo.

Mazi tendema

1 Mkulu Nguluwi nakamlonjela Nuhu, "Winjile mgati mwa safina hamwe na ivyazi lyako lyeng’ha, kwa vila kuli lulelo lweng’ha, nandikona hegwe uliyeka utanganiche hali heni.

7 Nuhu na mche wake hamwe na wanage na wache zawo nawenjila mgati mwa safina leka kuibilima nhonya imemeze mazi. 8 Migongolo johajikokomoche na migongolo jikokomoche na videje na vilumbigwe vyeng’ha vilingutambala, 9 navinjila mgati mwa safina hamwe na Nuhu kota Nguluwi vyoyalajize. 10 Logapulute mazuwa saba, mazi nagaluka kuigubika isi.

16 Chila nhanzi nachinjila chilumbigwe chilume na chidala kota Nguluwi vyoyamlajize Nuhu. Hamba Mkulu Nguluwi nakahinda lwizi lwa safina.

17 Nhonya naitowa kwa mhela wa mazuwa makumi gane. Mazi nagonjezeka na kwinula safina, nayelela mchanya mwa isi. 18 Mazi nagalutilila konjezeka lukami muisi na safina nayelela mchanya mwake.

23 Nguluwi nakachidumya chila chilumbigwe muisi, wanhu na migongolo na vilumbigwe vilingutambala na videje vya kilanga. Vyeng’ha navidumigwa muisi. Ila Nuhu hamwe na wala wanji wawele mgati mwa safina ndo nawasigala wakomu.

3 Mazi nagalutilila kupungula mhole mhole muisi. Logakolile mazuwa miya imwe na makumi gahano (150), mazi nagapungula lukami. 4 Kuli zuwa lya kumi na saba lya mwezi wa saba, safina nayima mchanya mwa vidunda vya Alalati.

6 Mazuwa makumi gane logakwete, Nuhu nakachumula itubuli lyoyawichile kuli yila safina, 7 nakalilavya ibondwa kunze, ila naliguluka liluta na kuhiluka mumula kwa mhela winji mbaka mazi logakalile muisi. 8 Hamba Nuhu nakailavya ng’hunda leka ilole kota mazi gaswina mchanya mwa isi. 9 Ila kwa vila mazi nagang’hali gagubiche isi yeng’ha, ayo ng’hunda haiwene honhu ha kudulika, naihiluka kwa Nuhu kuli safina. Nuhu nakagolola moko, kaibata na kuihilusa mgati mwa safina. 10 Nuhu nakabeteza mazuwa ganji saba, hamba nakailavya kahi ayo ng’hunda kunze mwa safina. 11 Ng’hunda ayo naimhiluchila Nuhu matinazo iwele na ihamba lidodi lya mzeituni mumlomo mwake. Kwa chiwalo acho Nuhu nakavizela kota mazi nagali haduhu. 12 Hamba nakabeteza mazuwa ganji saba, nakailavya kahi yila ng’hunda, zuwa ali ng’hunda nahaihiluche kahi.

13 Nuhu loyawele na miyaka miya sita na umwe (601), zuwa lya mwaluko lya mwezi wa mwaluko, mazi nagakala muisi. Nuhu nakagubula chigubiko cha safina na loyalolile, nakona kota isi naikala.

15 Nguluwi nakamlonjela Nuhu hino, 16 "Ulawe kuli safina hegwe na mche wako, hamwe na wanago na wache wawo. 17 Kahi uvilavye vilumbigwe vyeng’ha viwele na ukomu viwele hamwe na hegwe, viwele ndo videje na migongolo na chila chilumbigwe chilingutambala, leka vikalele kwa winji muisi na konjezeka na kwenela honhu heng’ha muisi."

Ipinde lya nhonya

8 Hamba Nguluwi nakamlonjela Nuhu na mwanage, 9 "Ndanguwika ilagano lya heni na hemwe na lulelo lwa hemwe 10 na vilumbigwe vyeng’ha viwele na ukomu na videje na migongolo ja kudimigwa na ja kisolo, vilumbigwe vyeng’ha vilawile mli safina hamwe na hemwe. 11 Ndanguwika ilagano lya heni na hemwe kota sividumya kahi vilumbigwe vyeng’ha viwele na ukomu ama kudumya chila chinhu muisi kwa mazi tendema kota vyonditile aho hamwande."

13 Ndanguwika ipinde lya heni kuli ng’hungugu kuli ulanga. Nawo wowa ulajilo wa ilagano lya heni na isi yeng’ha.

7 Kwa makundo Nuhu nakakanyigwa na Nguluwi kwa mbuli za hamba zohambe zoneche. Nakamhulichiza Nguluwi, nakazenga ila safina moyaloholigwe heye hamwe na ivyazi lyake. Kulawila kwa ago, isi yeng’ha naitagusigwa kwa wihe, naye Nuhu nakatanganika kwa makundo.

20 Hewo ndo wala nawalemile kumhulichiza Nguluwi loyawabeteze kwa kwimilila, mhela Nuhu loyali yogongomanya itumbwi ikulu lilinguchemigwa safina. Mgati mwa itumbwi alyo ikulu lilinguchemigwa safina, ndo wanhu wachefu hela, mina wanhu nane ndo waloholigwe kuli mazi, 21 uwele ulajilo wa kubatizigwa kuli kuwalohola hemwe sambi. Kubatizigwa hakuwele ndo mbuli ya kusa chikwe mlukuli, ila ndo ilagano lya wanhu kwa Nguluwi lilinguditikwa kuli nhumbula inojile. Ako kubatizigwa ndo kulinguwalohola kukolela uzilipuko wa Yesu Kilistu. 22 Yawele yalutile kilanga na sambi kekala nzingo ya kudilo kwa Nguluwi, kangulongoza wahilisi wa kilanga, wakulu na wawele na ludali na mong’ho.

37 Kota vila vyonaiwele mhela wa Nuhu, ndo vyoiwa kuya kwa Mwana wa munhu. 38 Kwa vila mhela awo, kug’hali mazi tendema haganalawila, wanhu nawali wolya na kunwa, wohesa na kuholeka, mbaka Nuhu loyenjile mgati mwa itumbwi ling’hangala. 39 Nahawavizelele nakwali na choni mbaka gala mazi tendema logawaholile weng’ha. Ahyo ndo vyoiwa mhela Mwana wa munhu hoyokuya. 40 Mhela awo wanhu weli wowa kumgunda, yumwe koholigwa na yumwe kolechigwa. 41 Wadala weli wowa wobalasa sokolo, yumwe koholigwa na yumwe kulechigwa.