Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
Nioso Yaa latɔkɔ Noa alɛ, <<Kamawɔɔsa batii ba mmle bamuu, diekye kasɔ kamuu ntooyii pɔ ku amumu lɛma ɔbla. Nioso mawɔɔsa ma ku kasɔ nwu. Nioso yɔ sewoso siene fawola lɛlakaa fata suoto faasɛ kamɛ ku ayo, faayɔ kɔmaa fatĩi kamɛ ku kayi. Nnya mmle okle faawola nini. Lɛlakaa nwu lɛkaana dibla nkpaa alafa ana afosi anɔɔ. Lɛblɛfɛ kafɔɔ dibla nkpaa afosi akuɛnsĩ nkpaa nnɔɔ, lɛɛtaka kafɔɔ dibla nkpaa afosi ana nkpaa nnɔɔ. Faaba ni, faadiki obo kɔkpaa kunwii ku ɔfã di osi. Faadiki kayoko di lɛlakaa nwu nkpo ɔlɔɔkɔ, faabla ni sitika sitiɛ, kalɔ, ntɛɛ ku osi.
Ninfɛ di Saate latɔkɔ Noa alɛ <<Buo di lɛlakaa nwu nkpo kamɛ, afɔ ku leyo lɛfɔ batii bamuu, diekye lete lɛfɔ lɛnya nlɛ fale otii tinini di akyɛnfɔɔle lee ya mmle kamɛ nɛ.
Di kanto kamanɔɔ an-yii ni kasɔ ka mmle oso, Noa ku babisuɔtɔbi nɔɔ ku ɔsɔfɔ ku babisɔfɔ nɔɔ labuo di lɛlakaa nwu nkpo kamɛ. Babɔkɛɛ ba nieklekle ni ku mba ninanklekle ni akyuu anyɔ, bakansiɛ ku asaa ya amuu ninkpɔkɔ ni kaasɔ suoto, basuɔtɔ ku basanko lawa Noa nfũ, baabuo di lɛlakaa nwu nkpo kamɛ fɛ mmle okle di Yaa latɔkɔ ni Noa. Di ayi akuɛnsĩ sɛmaa ntu oyii nwu lawa kaasɔ ka mmle suoto.
Babɔkɛɛ ba niabuo ni di lɛlakaa nwu kamɛ lale osuɔtɔ ku ɔsanko ku lɛsaa biala ninkpe ni nkpa, fɛ mmle di Yaa latɔkɔ ni Noa. Ni di Saate lasɛɛ nwɔ aakpee kaamɛ nɛ.
Ntu latooyii kasɔ suoto ayi afosi ana, di ntu nwu latɔɔpɔ nii, diakɛnkɛ lɛlakaa nwu nkpo diatika di ntu nwu osi. Di ntu nwu latooyii diatɔɔpɔ ni kaasɔ suoto, ni di lɛlakaa nwu nkpo latika di ntu nwu osi diatookyi nɛ.
Baawɔɔsa lɛsaa biala niawɛ ni nkpa kaasɔ suoto. Batii ku babɔkɛɛ ku asaa ya ninkpɔkɔ ni kaasɔ suoto ku bakansiɛ, baawɔɔsa ma kaasɔ suoto. Noa ku batii ba niasiɛ ni di lɛlakaa nwu kamɛ lete niabu.
Ntu nwu lakyako ɔsɔɔ kaasɔ suoto buɛbuɛ, di ayi kɔlafa afosi-anɔɔ sɛmaa ntu nwu lasɔɔ. Di kɔwɛntɛ kuɛnsinle lefosi dii kuɛnsinle kamɛ, ni di lɛlakaa nwu nkpo lalatika di Ararat kobokote suoto nɛ.
Di ayi afosi ana sɛmaa Noa lasɛkɛtɛ sɛfele wɔ aadiki ni di lɛlakaa nwu nkpo suoto. Ni aadiki kwakwalobi onwii aasifi kayi nɛ, ni aatɔɔflɛlɛtɛ aatoofe katoo ku kala dialaase di obe wɔ di ntu nwu nkpo laloo ni ɔsɔɔ nɛ. Ninfɛ aadiki ablonuma aasifi kayi alɛ oonyu nse ntu nwu ntɔɔsɔɔ di kasɔ suoto nɛ. Kafɔɔ ablonuma nwu nkpo ditawɛ lɛba aasoo, diekye ntu late di kasɔ kamuu suoto, nioso aakple aasifi lɛlakaa nwu kamɛ di Noa nfũ. Ni aakyɔɔ kɔnɛɛ aakpaa nya aakpee di lɛlakaa nwu kamɛ nɛ. Aasoko ayi akuɛnsĩ sɛmaa ni aakple aadiki ablonuma nwu di lɛlakaa nwu kamɛ nɛ. Obe wɔ di ablonuma nwu lakple aawa ni ɔkyɛ nɔɔ ku kɔtɔɔfɔ yi, aatũ nnɔnyi kowoso lɛfata kɔɔnle di kanya! Ninfɛ di Noa latofo alɛ ntu nwu ntɔɔsɔɔ kaasɔ suoto nɛ. Ninfɛ aakple aasoko ayi akuɛnsĩ kafɔɔ nɛ, ni aakple aadiki ablonuma nwu nɛ, kafɔɔ atasinkple aawa ɔkyɛ nɔɔ.
Dii le di Noa lafũ ni alɛɛ alafa akuɔ lɛlɛɛ ninwii di kɔwɛntɛ kasale dii kasale yi, ni di ntu nwu lasɔɔ dialoo kaasɔ suoto nɛ. Ninfɛ di Noa latikiti lɛlakaa nwu nkpo nsintɛɛ aanyu, ni aanya alɛ kasɔ ntookoso nɛ.
Ninfɛ di Yaa latɔkɔ Noa alɛ, <<Die di lɛlakaa nwu kamɛ, afɔ ku ɔsɔfɔ lɛfɔ ku babisuɔtɔbi lɛfɔ ku basɔfɔ lɛma. Faadiki lɛsaa biala le ninkpe ni nkpa di ɔkyɛ lɛfɔ di lɛlakaa nwu kamɛ. Bakansiɛ, babɔkɛɛ ku asaa ya amuu ninkpɔkɔ ni kaasɔ suoto alɛ baalofo mankpɛ man-yii kasɔ suoto.>>
Ninfɛ di Yaa latɔkɔ Noa ku babisuɔtɔbi nɔɔ nwu alɛ, <<Lenii kanya ku aye ku banantii lee ba nimawa ni sɛɛmaa lee ku lɛsaa biala niawɛ ni nkpa di ɔkyɛ lee, bakansiɛ ku babɔkɛɛ sele ku lepoo kamɛ babɔkɛɛ bamuu ku mba bamuu niadie ni di lɛlakaa nwu nkpo kamɛ ku aye, ku lɛsaa biala ninkpe ni nkpa kaasɔ suoto. Lenii kanya ku aye nlɛ, diidii namasinwɔɔsa asaa ya amuu ninkpe ni nkpa ku ntu oyii. Diidii ntu dilasin-yii kasɔ dilalaasa asaa.>>
Ntɔɔta kolosansa nii lɛtaa koolo, nni nimale dituosaa le nimasiɛ ni munko kasɔ ntɛɛ di kanya ka lenii ni nɛ.