1 Ni di SAATE nwu lakpee Natan, Dawid ɔkyɛ nɛ. Aakyɛ ni ɔkyɛ nɔɔ, aatɔkɔ nwɔ alɛ, "Basuɔtɔ banyɔ banwii lawɛ di okpoo onwii. Onwii saawɛntɛ, ɔnyɔɔfa kafɔɔ piitɛ. 2 Saawɛntɛ nwu latɛ aawɛ bafoso ku banankyue sɛlambu kplɛ. 3 Kafɔɔ piitɛ nwu ditawɛ lɛsalɛsaa, diediki lefosobi-sanko biibii ninwii aaya nii. Aanyu ni disi, diamuɔ ku nnwɔɔ ku babi nɔɔ. Nintoole alesaa nɔɔ, nintoonyi di opũ nɔɔ, bia nintoote di nnɛɛ nɔɔ kamɛ. Lefosobi nwu late fɛle obisankobi diatɔɔ.

4 "Ninfɛ di ɔfɔɔ onwii labuo saawɛntɛ nwu nɛ, kafɔɔ saawɛntɛ nwu lasĩ nnwɔɔ omu nɔɔ foso ee nankyue ɔyɔ ɔwa alesaa ɔta ɔfɔɔ nwu niawa ni ɔkyɛ nɔɔ. Kafɔɔ, aayɔ lefosobi-sanko le niale ni piitɛ nwu ole aalo, aawa alesaa aata ɔfɔɔ nwu niawa ni ɔkyɛ nɔɔ."

5 Ɔblɔ lafiɛ Dawid di saawɛntɛ nwu suoto, ni aatɔkɔ Natan alɛ, "Nwaako, di SAATE nwu lɛnya akpe ni nkpa, dikaatɛ alɛ osuɔtɔ wɔ niabla ni nle mmle kakpi! 6 Dikpe nii anta lefosobi nwu koto di sɛna kanya, ta ɛɛbla ni lɛsaa le mmle, ananya ni nyaami oso."

7 Ninfɛ di Natan latɔkɔ Dawid alɛ, "Afɔ ninle osuɔtɔ nwu nɛ! Nnya ɔlaa wɔ di SAATE, Israel Yaa nwu kobuɛ ni: ‘Lapɛ fɔ ɔfɔɔ fɛ ɔka di Israel suoto, ni ladiki fɔ di Saul nnɛɛ nɛ. 8 Layɔ saate lɛfɔ leyo lata fɔ, saate lɛfɔ basɔfɔ lekpee di nnɛɛ lɛfɔ. Layɔ Israel ku Yuda leyo lata fɔ. Ni nse n-ya mmle diɛpɔ fɔ mɔ, ntabata fɔ nkyakaa bia. 9 Be oso feenyu SAATE nwu ɔlaa nyakatãa, fɛɛbla nle ninle ni okpile di anu nɔɔ? Feelo Uria, Heti otii nwu ku kapamii, ni fɛɛyɔ ɔsɔfɔ nɔɔ fɛɛbla ole fɔ omu. Faalo nwɔ ku Amon batii kapamii. 10 Nioso, kanunua, kapamii nwu dilɔbadie di leyo lɛfɔ. Diekye faanyu mi nyakatãa, ni faayɔ Uria, Heti otii nwu ɔsɔfɔ faabla ole fɔ omu nɛ.’ 

11 "Nnya ɔlaa wɔ di SAATE nwu kobuɛ ni: ‘Kamata ɔlaa kpile nkye leyo lɛfɔ nimu kamɛ kunwa di suoto lɛfɔ. Di anu lɛfɔ amuamu kamafũ basɔfɔ lɛfɔ, n-yɔ ma nta otii wɔ niɛtɛɛtɛɛ fɔ nii, antenko basɔfɔ lɛfɔ nwu di kakũ kplamantãa. 12 Faabla ni di lewofa kamɛ, kafɔɔ kamabla nle mmle di kakũ kplamantãa di Israel omuu anu.’ "

13 Ninfɛ di Dawid latɔkɔ Natan alɛ, "Lɛbla okpile di SAATE nwu suoto."

Ni di Natan latɔkɔ Dawid alɛ, "SAATE nwu ntɔɔyɔ okpile lɛfɔ nwu ɛɛkyɛ fɔ. Flɔbakpi. 14 Kafɔɔ ta fɛɛbla ni nle mmle, fatɔɔta SAATE nwu balo konyu nwɔ ni nyakatãa oso yi, obisuɔtɔbi nwu beelofo bɛɛta fɔ ni kamakpi."

15 Di Natan lasifi ni leyo kamaa, SAATE nwu lapɛ obisɔ wɔ di Uria ɔsɔfɔ lalofo aata ni Dawid, ni aabuo ɔfiɛ nɛ. 16 Dawid latikiti Yaa lekoto aata obisɔ nwu. Ni asifi leyo nɔɔ kamɛ, ni aasiɛ nkyɛ nwu, aanii kanya, aatoote kaasɔ. 17 Leyo nɔɔ kamɛ banɔɔfo layila di ɔlɔɔkɔ nɔɔ alɛ bɔɔtakatɛsɔɔ kaasɔ, kafɔɔ aasĩ, atale alesaa kuanwii kafɔɔ ku mma.

18 Dii kuɛsinle suoto, obisɔ nwu lakpi. Dawid batɔkyɛntɛ layɛkɛ nwɔ ɔtɔkɔ alɛ obisɔ nwu ntookpi, diekye baanyu alɛ, "Di obe wɔ di obisɔ nwu lawɛ ni nkpa, buakakatɛ buata Dawid, kafɔɔ atanu wo ɔlaa. Lɛ nfɛ bubatɔkɔ nwɔ bulɛ obisɔ nwu ntookpi? Loobia ababla suoto lɛsaa."

19 Dawid lanya alɛ bakpɛmblatɛ nɔɔ kɔkakatɛ sɛwɛɛwɛɛ ninma, ninma, ni aatofo alɛ obisɔ nwu ntookpi nɛ. Ni aakaalɛ alɛ, "Obisɔ nwu ntookpi?"

Ni baatuna alɛ, "Yii, atookpi."

20 Ninfɛ di Dawid lataka kaasɔ nɛ. Aakpee ntu, aafifia nnɔnyi aaloo nii, aakyɛlɛnsa akpeele nɔɔ, ni aasifi SAATE nwu lɛkpaayo aalaasumu nɛ. Ninfɛ aasifi leyo nɔɔ nimu, ni di nnwɔɔ omu aakaalɛ alesaa, baawako nwɔ nya aale nɛ.

21 Ni di bakpɛmblatɛ nɔɔ lakaalɛ nwɔ alɛ, "Be oso fɔɔbla asaa nkpo? Obe wɔ di obisɔ nwu lasiɛ ni nkpa, faanii kanya, faawi kaku. Kafɔɔ nunua di obisɔ nwu ntookpi nii, fatɔɔtaka feele alesaa!"

22 Ni di Dawid ladiki kanya alɛ, "Obe wɔ di obisɔ nwu lasiɛ ni nkpa, lanii kanya, lawi kaku. Lanyu nlɛ, ‘Owe nin-ye? Loobia SAATE nwu kamale mi sibualɛ aanta obisɔ nwu nsiɛ nkpa.’ 23 Kafɔɔ nunua atookpi nii, be oso nfɛ kanii kanya? Kamafuo nwɔ nkpa okplesa ɔta? Ami nimakyɛ ɔkyɛ nɔɔ, kafɔɔ nnwɔɔ ɔlɔbakple awa ɔkyɛ nii."

24 Ninfɛ di Dawid lakpee ɔsɔfɔ Batseba kɔnɛɛ kaafutu, ni aakyɛ aalaate di ɔkyɛ nɔɔ nɛ. Ni aalofo obisuɔtɔbi, aatɔɔ leyooto alɛ Solomon. SAATE nwu labɔmbɔ obisɔ nwu. 25 Ta SAATE nwu labɔmbɔ ni obisɔ nwu oso, aata kanya aafenko di Yaa ɔlaa buɛtɛtɛ Natan suoto alɛ alaatika obisɔ nwu leyooto alɛ Yedidia*.

26 Ninfɛ di Yoab lakpɛko Amon batii di Raba, aafũ lɛkayo katanikokɔ nwu. 27 Ni di Yoab lakpee batɔkyɛntɛ Dawid nfũ alɛ, "Ntɔɔkpɛko Raba lefũ nwu ntu kadukɔ. 28 Nunua, siisa bakpɛtɛ bule baabamana okpoo kplɛ nwu baafũ nwu. Se diele nkpo, kamayɔ okpoo kplɛ nwu, man-yɔ leyooto nii mantika nwu."

29 Nioso Dawid lasiisa bakpɛtɛ bamuu, ni baakyɛ Raba, baalaakpɛko nwu baafũ nwu nɛ.

30 Ni aatekete lɛkakoto nwu di ɔka lɛma disi nɛ- onutũ nini niale koto sɛɛle bakilo afosi-atiɛ bana, baaklɛɛ ni ku afuɔ ya niefũ ni kɔya-ni baayɔ baatũkũsa Dawid diisi nɛ. Aayɔ kakpɛ kamɛ asaa kpinwu di okpoo kplɛ nwu kamɛ. 31 Ni aakpaa batii ba niawɛ ni di okpoo nwu kamɛ, aata ma baatɔɔbɛ sewoso, abɔɔsaa owola, batɔɔbɛ ntɔɔni ku nfɛ, aata ma kafɔɔ baatɔɔpɛ atɛnkudi. Aabla nle mmle di Amon batii sekpoo simuu kamɛ. Ninfɛ di Dawid ku bakpɛtɛ nɔɔ bamuu lakple baasifi Yerusalem nɛ.