1 Obe wɔ di ɔka nwu nfɛ nsi ni di lɛka-yo nɔɔ, di SAATE nwu ntɔɔtɔɔ ɔɔtɛ ni ɔnyɛɛ di balo nɔɔ bamuu niamana nwɔ baakyi ni suoto yi, 2 ni aatɔkɔ Yaa ɔlaa buɛtɛtɛ Natan alɛ, "Nyu, ami nsi di sida sewoso lɛka-yo kamɛ, kafɔɔ Yaa lɛlakaa nwu lɛka di lɛkpaayo kamɛ."

3 Ni di Natan latɔkɔ ɔka alɛ, "Lɛsaa lele ninsi fɔ diisi, nwini faabla ni, diekye SAATE nwu nsiko fɔ."

4 Kafɔɔ kakyɛ nwu, SAATE nwu ɔlaa lawa Natan nfũ kuabuɛ alɛ:

5 "Kyɛ faalaatɔkɔ kpɛmblatɛ nii Dawid falɛ, ‘Nnya ɔlaa wɔ di SAATE nwu kobuɛ ni: Feenyu falɛ afɔ nimatofo leyo fantɛɛ nsiɛ ni kaamɛ? 6 Diayɔ ni di dii le lakpaa Israel batii ladieko ni di Egipte diabadu ni dii le baakpana ni kukũ ko mmle, ami ninnsiɛ di leyo kamɛ. Nkyɛ kokyi aba aba ku lɛkpaayo fɛ kasiɛkɔ nii. 7 Kakɔ lele ledie lɛkyɛ ku Israel batii bamuu, dii lewo latɔkɔ ɔka lɛma owo wɔ latɔkɔ nlɛ anyu ni batii nii Israel nlɛ, "Be oso fanaantofo sida leyo fatɛɛ?" ’ 

8 "Nioso nunua, tɔkɔ kpɛmblatɛ nii Dawid falɛ, ‘Nnya ɔlaa wɔ di SAATE wɔ Ninlenke ni kobuɛ ni: Ami niakpaa fɔ lakyeko bafoso ɔkpa ku sɛfa kaweekɔ nlɛ bale sɛka di batii nii Israel suoto. 9 Ntoosiɛko fɔ di kakɔ lele fɛɛkyɛ, ntootososa kafɔɔ balo lɛfɔ bamuu di anu lɛfɔ. Kanunua kamata leyooto lɛfɔ mmuɔ, fɛle batii kplɛ ba ayooto kaasɔ suoto. 10 Kamata kafɔɔ batii nii Israel lɛba. Kamatɛ ma alɛ baawɛ kafa lɛma kamu alɛ balaasinkpee ma ni kubuɛ. Amumu batii dilɔbasinnyinka ma diidii, fɛ mmle baabla ni di kasɔ kakyekɔ, 11 ntoodibla ni kafɔɔ bia obe wɔ lase ni batunletɛ di batii nii Israel suoto. Kamata fɔ kafɔɔ fantɛ ɔnyɛɛ di balo lɛfɔ bamuu nnɛɛ.

" ‘SAATE nwu kɔtɔkɔ fɔ alɛ, SAATE nwu omu kamatɛ sɛka ole nta leyo lɛfɔ: 12 Nse ayi lɛfɔ ntooloo, nfɛ fɔɔtɛ ɔnyɛɛ ku bate lɛfɔ yi, kamata kafutu lɛfɔ obi an-yila fɔ kaanya. Nnwɔ nimakye ni ntɔ lɛfɔ mmu kamɛ, kamatɛ kafɔɔ sɛka kalekɔ nɔɔ. 13 Nnwɔɔ ninle nnwɔ nimatofo leyo anta ni Leyooto nii nɛ, kamase kafɔɔ sɛka kalekɔ nɔɔ lekpomii dinaa ni kaloo. 14 Kamale nwɔ kote, nnwɔɔ kafɔɔ abale mi obisuɔtɔbi. Nse ɛɛbla okpile, kamayɔ batii mpɛ nwɔ fɛ letoko nanfi ku lɛpɛ le okle mampɛ ni batii. 15 Kafɔɔ lɛbɔmbɔ nii dilɔbadie di suoto nɔɔ diidii, fɛ mmle ladiki nini di Saul suoto, nnwɔ lakyisa ni di anu lɛfɔ. 16 Leyo lɛfɔ ku sɛka kalekɔ lɛfɔ kamate dinaa ni kaloo di anu nii; babase lekpomii lɛfɔ dinaa ni kaloo.’ "

17 Nioso Natan latɔkɔ Dawid sɛlaa nwu simuu di odiki otuo omuu wɔ mmle kamɛ.

18 Di obe owo kamaa, Ɔka Dawid labuo lɛkpaayo le aapɛ aata ni Yaa lɛlakaa nwu kamɛ, aalaasiɛ di SAATE nwu anu, ni aabuɛ alɛ:

"Oo SAATE Kplɛ, owe nle, obe kafɔɔ di leyo nii batii nle, alɛ fatɔɔkpaa mi fɛɛbadunko nfũ mmle? 19 Oo SAATE Kplɛ, ta nle mmle diɛpɔ ni di anu lɛfɔ oso, fatɔɔkakatɛ kafɔɔ di kpɛmblatɛ lɛfɔ leyo di dii kaamaa suoto. Oo SAATE Kplɛ, nkpo kanya fambla fanta batii obe lele nɛ?

20 "Oo SAATE Kplɛ, obe nfɛ di Dawid kabuɛ antɔkɔ fɔ ankyakaa? Diekye faye kpɛmblatɛ lɛfɔ. 21 Ta ɔlaa lɛfɔ nwu ku nle fɛɛtɛ ni ɔbla kanya oso, fatɔɔbla lɛsaa kplɛ le mmle, fɛɛta kpɛmblatɛ lɛfɔ letofo ni.

22 "Oo SAATE Kplɛ, nyu mmle feemuɔ ni! Kuonwii nnaa fɛle afɔ, Yaa kuonwii nnaa kafɔɔ, diediki afɔ, fɛ mmle butoonu ni ku atoko loo amu. 23 Bawe kafɔɔ ninte fɛle batii lɛfɔ Israel- kale ka kanwii kaasɔ suoto di Yaa ladie aakyɛ aalaadiki ni fɛ batii aata ni suoto nɔɔ. Alɛ oofũ leyooto anta ni suoto nɔɔ, ambla ni asaa kplɛ ku ayɛkɛsaa ya niɛbla ni ɔkpɛ, aatososa ni nnle ku afiɔ lɛma aadiki ni di batii lɛfɔ anu, mba faadiki faakyeko ni Egipte? 24 Oo SAATE, fatoose batii lɛfɔ Israel fɛ mba niɛtɛ bale ni bale fɔ bamu dinaa ni kaloo, ni di afɔ fatookple Yaa lɛma nɛ.

25 "SAATE Yaa, ni kanunua, klee ntam lɛfɔ nwu dinaa ni kaloo. Ɔlaa wɔ faabuɛ faatɛ faata ni kpɛmblatɛ lɛfɔ ku leyo nɔɔ kanya. Bla fɛ mmle faabuɛ faatɛ ni, 26 alɛ leyooto lɛfɔ kamakpɛ ni, dinaa ni kaloo. Ni batii kamabuɛ alɛ, ‘SAATE wɔ Ninlenke ni ninle Yaa di Israel suoto!’ Ni kpɛmblatɛ lɛfɔ Dawid leyo kamate di anu lɛfɔ.

27 "Oo SAATE wɔ Ninlenke ni, Israel Yaa, fatoodiki nle mmle feetuo kpɛmblatɛ lɛfɔ feebuɛ falɛ, ‘Kamatɛ sɛka ole nta leyo lɛfɔ.’ Nioso kpɛmblatɛ lɛfɔ ntɔɔwɛ sɛkambi, ɔɔpɛ ɔlaa wɔ mmle anta fɔ. 28 Oo SAATE Kplɛ, afɔ ninle Yaa! Sɛlaa lɛfɔ nle disitikasaa, fatɔɔka ntam di asaa biene ya mmle fɛɛta kpɛmblatɛ lɛfɔ. 29 Nioso nunua, ta dile fɔ dibiesaa, faawii kpɛmblatɛ lɛfɔ leyo lɛtɔtrɔ, alɛ baakyɛ sitũ di anu lɛfɔ dinaa ni kaloo. Oo SAATE Kplɛ, diekye afɔ nintɔɔkakatɛ, ku lɛtɔtrɔ lɛfɔ nwu, kpɛmblatɛ lɛfɔ leyo kamawɛ lɛtɔtrɔ dinaa ni kaloo."