1 Di Saul kukpi kamaa, Dawid lakple di Amalek batii kalenkeekɔ, ni aasiɛ di Siklag ayi anyɔ nɛ. 2 Di dii tiɛfa, osuɔtɔ onwii lakye Saul kasikɔ aawa ku akpeele bɛbɛɛle ku kudu di disi nɔɔ. Obe wɔ aabadu ni Dawid, aase katũ kaasɔ aatɔɔ dibu.

3 Ni di Dawid lakaalɛ nwɔ alɛ, "Ɔfɛ feekye?"

Ni aadiki kanya alɛ, "Otoso letoso di Israel batii kasikɔ."

4 Ni di Dawid lakaalɛ nwɔ alɛ, "Tɔkɔ mi, obe niɛwa?"

Ni aabuɛ alɛ, "Bakpɛtɛ letoso di kakpɛ nwu. Kpinwu lɛma lɛnɔnɔɔ beekpi. Saul ku obisuɔtɔbi nɔɔ Yonatan kafɔɔ ntookpi."

5 Ninfɛ di Dawid lakaalɛ okosopo nwu niawako nwɔ ni kanya alɛ, "Lɛ fɛɛbla feetofo falɛ Saul ku obisuɔtɔbi nɔɔ Yonatan ntookpi?"

6 Ni di okosopo nwu labuɛ alɛ, "Lawɛ di Gilboa Kobokote osi, nfa di Saul lakulaa di lɛkplɔ nɔɔ suoto, di bakeke ku bakatɛ laloo ni otika di suoto nɔɔ. 7 Obe wɔ aamunikĩi aanyɛɛ nii, aalɛɛ mi, ni lakaalɛ nlɛ, 'Obe kamafuo ɔbla?’ 

8 "Ni aakaalɛ mi alɛ, 'Owe fale?’ 

Ni labuɛ nlɛ, 'Amalek otii nle.’ 

9 "Ninfɛ aatɔkɔ mi alɛ, 'Yila di suoto nii faalo mi! Nsi di kukpi kamɛ, kafɔɔ lekple nkpe nkpa.’ 

10 "Nioso layila di suoto nɔɔ lalo nwɔ, diekye latofo nlɛ atɔɔnɔɔ ni kamaa, ɔlɔbasinwɛ nkpa. Ni layɔ lɛkakoto le di disi nɔɔ ku okyinkla wɔ di kanɛɛtũ nɔɔ, ni lɛyɔ nya lɛwako saate nii nɛ."

11 Ninfɛ di Dawid ku batii ba bamuu di ɔkyɛ nɔɔ lamufũ akpeele lɛma baabɛbɛɛ nɛ. 12 Baawi, baabla kaku, baanii kanya baata Saul ku obisuɔtɔbi nɔɔ Yonatan ku SAATE nwu bakpɛtɛ ku Israel leyo dialaadu kɔtɔɔfɔ. Diekye baanɔɔ di kapamii kanya.

13 Ni di Dawid lakaalɛ okosopo wɔ niawako nwɔ ni kanya alɛ, "Ɔfɛ feekye?"

Ni aadiki kanya alɛ, "Amalek otii onwii ɔfɔɔ obisuɔtɔbi nle."

14 Dawid lakaalɛ nwɔ alɛ, "Be oso fatayɛkɛ kɔnɛɛ lɛfɔ ɔtakatɛsa ɔwɔɔsa nnwɔ di SAATE nwu lɛpɛ ni ɔfɔɔ?"

15 Ninfɛ di Dawid lalɛɛ bakpɛtɛ nɔɔ onwii aatɔkɔ alɛ, "Kyɛ faalaasafɔ nwɔ fatɛ kaasɔ!" Nioso aalaasasafɔ nwɔ aatɛ kaasɔ, ni aakpi nɛ. 16 Diekye Dawid latɔkɔ nwɔ alɛ, "Ntɔ lɛfɔ ditika di afɔ omu nsintɛɛ. Kanya lɛfɔ kamu nielo fɔ lɛpɔɔ, di obe wɔ faabuɛ ni falɛ, 'Ami nialo ni nnwɔ di SAATE nwu lɛpɛ ni ɔfɔɔ.’ "

17 Ni di Dawid lasa sikunu se mmle di Saul ku obisuɔtɔbi nɔɔ Yonatan suoto nɛ, 18 ni aabuɛ alɛ batuo Yuda batii kɔtaa sikunu se mmle (bɛɛkpana sĩ di Yasar Kukũ kamɛ):

19 "Oo Israel, beelo dibu lɛfɔ batii bɛɛtɛ di ntakalekɔ lɛfɔ suoto.

Lɛ di basientɛ nwu lɛnɔɔ!

20 "Bitambuɛ nwu di Gat,

bitanyie nwu lɛkya di Askelon akpaka,

alɛ Filisti batii babisankobi bapɔ́,

alɛ mba ninankyɛlɛnsa ni suoto babisankobi banya suoto lɛyɔɔ.

21 "Oo Gilboa abokote,

bitanwɛ oblokyi ee kanto

ee afe ya ninta ni asaaɔta atitabi.

Diekye nfa baakpɔnɔfɔsa basientɛ kubidifunsaa nɛ,

Saul kubidifunsaa-blɔbasinfifia ni ku nnɔnyi.

22 Di mba baalo ni ntɔ kamɛ,

di basientɛ nwu suoto sina kamɛ,

di Yonatan kɔtaa nwu ditasinkple kuawa,

Saul kapamii nwu ditasinkple kafukuti.

23 "Saul ku Yonatan-

di nkpa lɛma kamɛ, baabɔmbɔ ma, baatoobuo kafɔɔ batii anu,

di kukpi kamɛ kafɔɔ, batablá ma di suoto.

Baawɛ sɛwa baalenkee baklikpo,

baawɛ osie baalenkee bakyata.

24 "Oo Israel babisankobi,

biwi bita Saul,

nnwɔ nianyukunsa ye ni abula sɛɛle ku asaa ya nialɛ ni onyu,

nnwɔ niaklɛɛ ni akleesaa lee ku koto sɛɛle anyɛnɛ.

25 "Lɛ di basientɛ nwu lɛnɔɔ di kakpɛ kamɛ!

beelo Yonatan bɛɛtɛ di ntakalekɔ lɛfɔ suoto.

26 Obiloo Yonatan, kowi nta fɔ;

faatɛ faafũ kɔya faatɛɛ.

Lɛbɔmbɔ lɛfɔ le faatɛɛ ni labla ɔkpɛ,

diatɛ diabla ɔkpɛ dialenkee basanko lè le.

27 "Lɛ di basientɛ nwu lɛnɔɔ!

Kakpɛ akpɛsaa nwu ntɔɔwɔɔ!"