1 Ninfɛ di Filisti batii lakpɛko Israel; ni di Israel batii latoso di anu lɛma nɛ, baalo ma kpinwu di Gilbea Kobokote suoto. 2 Filisti batii lanwini baatikanko Saul ku babisuɔtɔbi nɔɔ, ni baalo babisuɔtɔbi nɔɔ Yonatan, Abinadab ku Malki-Sua nɛ. 3 Kakpɛ nwu kanya labawɛ osie kaamana Saul kaakyi, obe wɔ di akplɔ bataatɛ ladu nwɔ nii, baatika nwɔ nkɔ osie kanya.

4 Ninfɛ di Saul latɔkɔ akpɛsaa-kleetɛ nɔɔ alɛ, "Diki kapamii lɛfɔ faalo mi, nse diele nkpo batii ba mmle ninankyɛlɛnsa ni suoto kamawa mamalo mi mantɔɔma mi."

Kafɔɔ lɛyɛkɛ lapɛ akpɛsaa-kleetɛ nɔɔ oso atabla nkpo; nioso Saul labɔkɔtɛ kapamii nɔɔ kamu, ni aanɔɔ ka di suoto nɛ. 5 Di akpɛsaa-kleetɛ lanya alɛ Saul ntookpi nii, ninfɛ di nnwɔɔ kafɔɔ aanɔɔ di kapamii nɔɔ suoto aakpi ku nnwɔɔ nɛ. 6 Nioso Saul ku babisuɔtɔbi nɔɔ batiɛ ku akpɛsaa-kleetɛ nɔɔ ku batii nɔɔ bamuu lakyɛkyɛ baakpi dii ninwii.

7 Obe wɔ di Israel batii ba di ɔtaata kotoko ku mba di Yordan sɛmaa lanya alɛ Israel batii bakpɛtɛ ntootoso nii, Saul ku babisuɔtɔbi nɔɔ kafɔɔ ntookpi nii, baadie di sekpoo lɛma baatoso baasifi. Ni di Filisti batii labasiɛ di sekpoo nwu kamɛ nɛ.

8 Kaleesɛ, di Filisti batii lakyɛ alɛ bɔɔlaadiki ni asaa di bakpi nwu suoto, baanya Saul ku babisuɔtɔbi nɔɔ batiɛ nwu lakpi di Gilboa Kobokote suoto. 9 Baabudi Saul disi, baadiki aakpɛsaa nɔɔ, ni baakpee batɔkyɛntɛ di Filisti batii kasɔ kamuu alɛ bayie lɛkya bafenko di afiɔ-yo lɛma ku batii lɛma kamɛ nɛ. 10 Baayɔ akpɛsaa nɔɔ baatɛ di Astoret difiɔ-yo, baayɔ kpi nɔɔ baasaka di Bet San oyoyiɛ.

11 Di Yabes Gilead batii lanu ni lɛsaa le di Filisti batii labla ni Saul, 12 sɛkambi basuɔtɔ lɛma bamuu lakyɛ kakyɛ nwu kamuu baakyɛ Bet San. Baalaayɔ Saul kpi ku babisuɔtɔbi nɔɔ bakpi nwu di Bet San seyoyiɛ baasifiko Yabes baalaafiɛ ma ninfa. 13 Ninfɛ baayɔ akufi lɛma baakookaa di kowoso ko manlɛɛ ni tamarisk kalɔ di Yabes, ni baanii kanya ayi akuɛnsĩ nɛ.