1 Ninfɛ di Samuel latɔkɔ Saul alɛ, "Ami ninle nnwɔ di SAATE nwu lakpee laba pɛ fɔ ni ɔfɔɔ fɛ ɔka di Israel batii nɔɔ suoto; nioso kanunua nu kanya ka niekye ni SAATE nwu nfũ. 2 Nnya ɔlaa wɔ di SAATE wɔ Ninlenke ni kobuɛ ni alɛ: ‘Kamananfi Amalek batii kootoko ta lɛsaa le baabla ni Israel batii, baadieko ma ni di osuku, di obe wɔ baadie ni di Egipte. 3 Kanunua tɔɔkyɛ faalaakpɛko Amalek batii, faawɔɔsa lɛsaa biala ninle ma ni lele fɛɛ. Tandiɛ ma; lo basuɔtɔ ku basanko, babisɔ ku babifɔɔle, banankyue ku bafoso, kapubapɔnkɔ ku babɔkɛɛ ba nintuka ni atoo.’ "

4 Nioso Saul lalɛɛ batii nwu, ni aaka ma di Telaim-bakpɛtɛ ba ninkyɛ ni ninkpaa labla nkpe alafa anyɔ ku bakpɛtɛ nkpe lefosi niakye ni Yuda. 5 Ni di Saul lakyɛ Amalek okpoo kplɛ aalaate kala di kɔwɛ kamɛ nɛ. 6 Ninfɛ di Saul latɔkɔ Ken batii alɛ, "Bidie biediɛ Amalek batii ta mmle ninamawɔɔsa ye nkpɔtɔɔsa ni ku mma. Diekye biale Israel batii bamuu sifutulɛ di obe wɔ baadie ni di Egipte." Nioso Ken batii ladie di Amalek batii suoto.

7 Ninfɛ di Saul lakpɛko Amalek batii diayɔ ni di Hawila dialaadu Sur di Egipte kufĩ katunkɔ. 8 Aamufũ Amalek ɔka Agag ku nkpa, ni aawɔɔsa batii nɔɔ bamuu fɛɛ ku kapamii nɛ. 9 Kafɔɔ Saul ku bakpɛtɛ nɔɔ ladiɛ Agag ku bafoso ku banankyue nwaa, anankyuebi ku afosobi ya niasiɛ ni lɛla-lɛsaa biala nialɛ onyu. N-ya mmle nya batatɛ alɛ bɔɔwɔɔsa nya fɛɛ. Kafɔɔ baawɔɔsa lɛsaa biala nitalɛ ni onyu ku n-ya nintawɛ ni osie amuu.

10 Ninfɛ di SAATE nwu ɔlaa lawa di Samuel ɔkyɛ alɛ: 11 "Diebuo mi suoto alɛ lɛbla Saul ɔka, diekye atookyi mi kamaa, aale kafɔɔ afiofa nii." Ni di Samuel labuo nyaami, ni aapɛ ɔlaa aata SAATE nwu ku kakyɛ nwu kamuu nɛ.

12 Kolesɛtũ Samuel lataka aakyɛ Saul ɔkyɛ, kafɔɔ baatɔkɔ nwɔ alɛ, "Saul lefe Karmel. Nfa eetofo ninyumasaa ɛɛta suoto nɔɔ dibu nɛ, kafɔɔ atookple eesoo eefe eesifi Gilgal."

13 Obe wɔ di Samuel ladu ni Saul nfũ, Saul latɔkɔ nwɔ alɛ, "Saate nwu awii fɔ lɛtɔtrɔ! Ntɔɔbla di SAATE nwu kufiofa kanya."

14 Kafɔɔ Samuel lakaalɛ alɛ, "Obe nfɛ ninle bafoso ba mmle diwi di atoko nii kamɛ nkpo? Obe ninle banankyue ba mmle diwi konu ni nkpo?"

15 Ni di Saul ladiki kanya alɛ, "Bakpɛtɛ niakyeko ma Amalek batii nfũ baawako. Baadiɛ bafoso ku banankyue biene alɛ babayɔ manta SAATE, Yaa lɛfɔ ole. Kafɔɔ buawɔɔsa babule fɛɛ."

16 Ninfɛ di Samuel latɔkɔ Saul alɛ, "Yila! Tɛɛ ntɔkɔ fɔ ɔlaa wɔ di SAATE nwu latɔkɔ mi ni kakyɛ ka mmle."

Ni di Saul alɛ, "Tɔkɔ mi."

17 Ninfɛ di Samuel lakaalɛ nwɔ alɛ, "Kuntɛ faate biibii di afɔ omu anu, fadibakple disi fata ana nwu di Israel? SAATE nwu lase fɔ ɔka di Israel suoto. 18 Ni aakpee fɔ osuku aabuɛ alɛ, ‘Kyɛ faalaawɔɔsa amumu batii nwu fɛɛ, Amalek batii nwu; kpɛko ma diɛlaase di obe wɔ feelo ma ni bamuu.’  19 Be oso fanaanu SAATE nwu ɔlaa? Be oso fɛɛlɛ asaa nwu, fɛɛbla okpile di SAATE nwu anu?

20 Ninfɛ di Saul labuɛ alɛ, "Kafɔɔ lakyɔɔ SAATE nwu ɔlaa kotoko. Lakyɛ osuku wɔ di SAATE nwu lakpee mi nii. Lawɔɔsa Amalek batii nwu, ni lakpaa ɔka lɛma Agag lawako nɛ. 21 Bakpɛtɛ nwu niayɔ kakpɛ kamɛ bafoso ku banankyue ku asaa nwaa ya beediki bɛɛta ni Yaa, alɛ bɔɔyɔ nya manta oleɔta manta ni SAATE nwu di Gilgal."

22 Kafɔɔ Samuel ladiki kanya alɛ,

"SAATE nwu nnya suoto lɛyɔɔ di ofiɛ asaaɔta ku oleɔta suoto

ninlenkee mmle baakyɔɔ ni SAATE nwu sɛlɔ kotoko?

Kotoko ɔkyɔɔ nlɛ dilenke oleɔta,

ɔlaa onu kafɔɔ nlɛ dilenke akunumuu lɛla.

23 Diekye ɔtaka oyila di otii suoto nte fɛle sɛbɔ ɔpɛ okpile,

suoto katoo ɔtakatɛsa kafɔɔ nte fɛle afiɔ ɔtɔ okpile.

Ta feesĩ ni SAATE nwu ɔlaa oso yi,

atoosĩ fɔ fɛ ɔka."

24 Ninfɛ di Saul latɔkɔ Samuel alɛ, "Lɛbla okpile. Lɛwaalɛ SAATE nwu kufiofa ku sɛlɔ lɛfɔ ɔtannu. Latɔɔyɛkɛ batii nwu oso latuna lata ma nɛ. 25 Nunua lekoto kotikiti fɔ, yɔ sikpile nii fakyɛ mi, faakple fawa buɔkyɛ ku ami, alɛ kalaasumu SAATE nwu."

26 Kafɔɔ Samuel latɔkɔ Saul alɛ, "Namakple nkyɛ ku afɔ. Fatoosĩ SAATE nwu ɔlaa, SAATE nwu kafɔɔ ntoosĩ fɔ fɛ ɔka di Israel batii suoto!"

27 Di Samuel lamunikĩi alɛ oosifi nii, Saul lamumfũ Samuel awukyɔ nwu kotokosi, ni aabɛ nɛ. 28 Ninfɛ di Samuel latɔkɔ Saul alɛ, "SAATE nwu ntɔɔbɛ Israel sɛka kalekɔ nwu di suoto lɛfɔ miɛ. Atɔɔyɔ ka kafɔɔ ɛɛta owo lɛfɔ onwii-nnwɔ ninlɛ alenke fɔ nii. 29 Nnwɔ ninle ni Israel Lɛkpa ninlaa ee akyɛlɛnsa disibu nɔɔ; diekye aale otii, alɛ aakyɛlɛnsa disibu nɔɔ."

30 Ni di Saul ladiki kanya alɛ, "Lɛbla okpile. Kafɔɔ lɛkoto tɛɛ dibu di batii nii banɔɔfo ku Israel anu; kple fawa buɔkyɛ ku ami alɛ kalaasumu SAATE, Yaa lɛfɔ nwu." 31 Nioso Samuel lakple aasifi ku Saul, ni di Saul lasumu SAATE nwu nɛ.

32 Ninfɛ di Samuel labuɛ alɛ, "Bikpaa Amalek batii ɔka Agag biwakoe."

Ni di Agag lawa ɔkyɛ nɔɔ ku suoto lɛyɔɔ, aatoonyu alɛ, "Nwaako kukpi dibuo nwu ntoofe."

33 Kafɔɔ Samuel labuɛ alɛ,

"Fɛ mmle di kapamii lɛfɔ lɛta basanko ditawɛ ni babi,

nkpo di yaafɔ dilɔbawɛ obi di basanko kamɛ nɛ."

Ninfɛ di Samuel lalo Agag di SAATE nwu anu di Gilgal nɛ.

34 Ninfɛ di Samuel ladie aasifi Rama, kafɔɔ Saul lasifi leyo nɔɔ di Gibea. 35 Diɛlaase ni di dii le di Samuel lakpi nii, atasinkyɛ aalaanya Saul fiɛ aakpi, nu di Samuel lawi aatɔɔ. Ni diabuo SAATE nwu suoto alɛ aabla Saul ɔka di Israel suoto nɛ.