1 Obe onwii kamɛ baatɔkɔ Dawid alɛ, "Nyu, Filisti batii nwu nfɛ kɔkpɛko Keila okpoo, man-yu asaa di kakpaa," 2 ni aawolaa kamɛ di SAATE nwu nfũ, aakaalɛ alɛ, "Nkyɛ ninaakpɛko Filisti batii ba mmle?"

Ni di SAATE nwu latɔkɔ nwɔ alɛ, "Kyɛ falaakpɛko Filisti batii nwu faafũ Keila nkpa."

3 Kafɔɔ Dawid batii latɔkɔ nwɔ alɛ, "Yuda ninfũ buɔyɛkɛ nɛ. Ni lɛ nfɛ dibate, nse buɔkyɛ Keila buɔlaakpɛko Filisti bakpɛtɛ!"

4 Ninfɛ di Dawid lakple aawolaa kamɛ di SAATE nwu nfũ, ni di SAATE nwu latɔkɔ nwɔ alɛ, "Soo fakyɛ Keila, diekye kamanaayɔ Filisti batii nwu nkpee fɔ ninnɛɛ." 5 Nioso Dawid ku batii nɔɔ lakyɛ Keila baalaakpɛko Filisti batii, baakpaa babɔkɛɛ sele lɛma baasifiko. Aalo Filisti batii kpinwu, ni aafũ Keila batii nkpa nɛ. 6 (Ahimelek obisuɔtɔbi Abiatar layɔ simu akpeele aawako, di obe wɔ aatoso aasifi ni Dawid nfũ di Keila.)

7 Ni baatɔkɔ Saul alɛ Dawid ntoosifi Keila, ni aabuɛ alɛ, "Yaa ntɔɔyɔ nwɔ eekpee mi ninnɛɛ. Diekye Dawid ntɔɔtɛ suoto nɔɔ leeyo, ta atoobuo ni di okpoo wɔ ninkpe ni n-yoko ku abɔɔsaa kamɛ oso." 8 Ninfɛ di Saul lalɛɛ bakpɛtɛ nɔɔ bamuu aasiisa alɛ basoo bakyɛ Keila baalaakpɛ Dawid ku batii nɔɔ nɛ.

9 Di Dawid lanu alɛ Saul kokũ ni kawumbe di suoto nɔɔ, ni aatɔkɔ oletatɛ Abiatar alɛ, "Yɔ simu akpeele nwu fawako." 10 Ni di Dawid labuɛ alɛ, "Oo SAATE, Israel Yaa, kpɛmblatɛ lɛfɔ ntɔɔtɛ eenu alɛ Saul komiɛ alɛ ɔɔwa Keila amaawɔɔsa okpoo nwu ta ami oso. 11 Keila okpoo nwu batii kamadiki mi mantɔɔ? Saul kamasoo anwa, fɛ mmle di kpɛmblatɛ lɛfɔ ntoonu ni? Oo SAATE, Israel Yaa, tɔkɔ kpɛmblatɛ lɛfɔ."

Ninfɛ di SAATEnwu labuɛ alɛ, "Abawa."

12 Dawid lakple aakaalɛ alɛ, "Keila batii kamadiki ami ku batii nii manta Saul?"

Ni di SAATE nwu labuɛ alɛ, "Babadiki ye manta."

13 Nioso Dawid ku batii nɔɔ lɛpɔ labla ni fɛ alafa-akuɔ, ladie di Keila baakyɛ baatookyi aba, aba. Obe wɔ baatɔkɔ ni Saul alɛ Dawid ntootoso ni di Keila yi, atasinkyɛ nfa.

14 Dawid lasiɛ di ɔfaafuu sifuɔntuu kamɛ ku Sif Ɔfaafuu akpenkpe suoto. Dii biala Saul nwolaa nwɔ, kafɔɔ Yaa ditayɔ Dawid aakpee di nnɛɛ nɔɔ.

15 Obe wɔ di Dawid lawɛ ni di Hores di Sif Ɔfaafuu nwu yi, aanu alɛ Saul ntoodie alɛ ɔɔbalo nwɔ. 16 Ni di Saul obisuɔtɔbi Yonatan lakyɛ Dawid ɔkyɛ di Hores aalaakyakaako nwɔ aakpee nwɔ osie di Yaa kamɛ nɛ. 17 Ni aatɔkɔ nwɔ alɛ, "Tan-yɛkɛ, teemi Saul dilɔbadiki kɔnɛɛ akpanko fɔ. Fabale ɔka di Israel suoto, afɔ kamaa, ami. Bia teemi Saul n-ye nle mmle." 18 Banyɔ lɛma nwu labla kanya ninii di SAATE nwu anu. Ninfɛ di Yonatan lasifi leyo nɛ, kafɔɔ Dawid lasiɛ di Hores.

19 Ni di Sif batii lakata baakyɛ Saul nfũ di Gibea baalaakaalɛ alɛ, "Diele Dawid niewofa kaamɛ loo di sifuɔntuu kamɛ di Hores di Hakila lekpenkpe di Yesimon kala-kasɔ nɛ? 20 Oo ɔka, nunua soo fawa, obe lele dilɛ fɔ, awo bubadiki nwɔ munkpee di ɔka nnɛɛ."

21 Ni di Saul labuɛ alɛ, "Saate nwu awii ye lɛyɔɔ ku mmle biɛyɔ nwu ni ole di suoto nii. 22 Bitɔɔkyɛ biɛlaawolaa kamɛ nwaa. Biwolaa nfũ di Dawid ndie ankyɛ ni obe lele ku otii wɔ niɛnyɔɔ ni ninfa. Bɛɛtɔkɔ mi alɛ ɛɛtɛ eebe anu. 23 Biwolaa nwofakɔ nɔɔ mmuu anwofa ni, biekple biwa bibatɛɛ letofo nwaa. See ntɔɔkyɛ ku aye; nse asi di obo nwu, kamatɛtɛɛ nwɔ di Yuda nfaabi nwu mmuu kamɛ."

24 Nioso baale Saul katũ baasifi Sif. Obe nwu kamɛ Dawid ku batii nɔɔ lawɛ di Maon Ɔfaafuu di Araba di Yesimon kala-kasɔ. 25 Saul ku batii nɔɔ lakye nwɔ owlaa kasɔ. Obe wɔ baatɔkɔ ni Dawid, ni aasoo aasifi difuɔnkpaa nwu aalaasiɛ di Maon Ɔfaafuu nɛ. Di Saul lanu nwu nii, aasifi Maon Ɔfaafuu nwu alɛ ɔɔlaawolaa Dawid.

26 Saul latoofe di kobokote nwu lɛkyɛ ninwii, Dawid ku batii nɔɔ kafɔɔ di lɛkyɛ bamba, batɔɔpɛsɛwa alɛ boosifi mandiɛ Saul. Di Saul ku bakpɛtɛ nɔɔ latɔɔtɛɛtɛɛ ni Dawid ku batii nɔɔ alɛ boomufũ ma nii, 27 tɔkyɛntɛ onwii lawa Saul nfũ aabatɔkɔ nwɔ alɛ, "Wa wla! Filisti batii ntɔɔwa kale nwu ɔkpɛko." 28 Ninfɛ di Saul ladiɛ Dawid owolaa nwu nɛ, aasifi aalaakyakako Filisti batii. Nkpo oso bɔɔlɛɛ lɛba nwu alɛ Sela Hamahlekot nɛ. 29 Ni di Dawid ladie ninfa aakata aasifi aalaasiɛ di En Gedi sifuɔntuu kamɛ nɛ.