1 Efraim osuɔtɔ onwii lawɛ, aakye ni Ramataim, aale ni Sufi otii di Efraim kale lekpenkpe, leyooto nɔɔ niale Elkana nɛ. Yeroham obisuɔtɔbi aale, ɔwa nɔɔ niale Elihu. Elihu kafɔɔ niale Tohu obisuɔtɔbi, ɔwa nɔɔ niale Suf, Efriam otii aale. 2 Elkana lawɛ basɔfɔ banyɔ; onwii leyooto niale Hana, ɔnyɔɔfa kafɔɔ niale Penina. Penina lawɛ babi, kafɔɔ Hana ditawɛ kuonwii.

3 Lɛlɛɛ biala osuɔtɔ wɔ mmle nkata ankyɛ okpoo nɔɔ anaasumu, anta oleɔta anta SAATE wɔ Ninlenke nii di Silo, nfũ di Eli babisuɔtɔbi nwu banyɔ Hofni ku Pinehas lale ni SAATE nwu olebatatɛ. 4 Obe lele di dii lewo alɛ Elkana kata oleɔta yi, anta ɔsɔfɔ nɔɔ Penina ku babisuɔtɔbi ku babisankobi nɔɔ bamuu sina dikudi, dikudi. 5 Kafɔɔ Hana nnwɔɔ, Elkana ntɔɔ akudi anyɔ, diekye ambɔmbɔ nwɔ, kafɔɔ SAATE nwu lasɛɛ nwɔ olofofɔtɔ. 6 Ta SAATE nwu lasɛɛ nwɔ ni olofofɔtɔ oso yi, ɔsɔfɔwo nɔɔ ntoowolaa nwɔ kaanya, alɛ ookpee nwɔ ɔblɔ. 7 Nle mmle latɔɔwa lɛlɛɛ biala. Obe lele di Hana lɛkata ɛɛkyɛ SAATE nwu leyo, ɔsɔfɔwo nɔɔ nkpee nwɔ ɔblɔ ninta anwi, ansinle alesaa. 8 Ɔsa nɔɔ Elkana nkaalɛ nwɔ alɛ, "Hana, obe oso foowi? Obe oso fonoole alesaa? Obe oso feebuo nyaami nkpo? Ninlenke babisuɔtɔbi lefosi nta fɔ?"

9 Dii ninwii, baaloo ni ole ku onyi di Silo, Hana lataka aayila. Obe nwu oletatɛ Eli lasiɛ leekpomii di SAATE nwu olekatakɔ kayoko owoso ɔlɔɔkɔ. 10 Ni di Hana labuo nyaami, aawi nwaa, ni aapɛ ɔlaa aata SAATE nwu nɛ. 11 Ni aaka ntam aabuɛ alɛ, "Oo SAATE wɔ Ninlenke ni, nse fabanyu kpɛmblatɛ lɛfɔ dibuo fannyuma mi, fanan-yee kpɛmblatɛ lɛfɔ, kafɔɔ fɛɛtɔɔ obisuɔtɔbi yi, ni kamayɔ nwɔ nta SAATE nwu, di nkpa nɔɔ ayi amuu kamɛ. Disi kakpaasupamii kukanwii dilɔbakyɛ nwɔ disi diidii."

12 Di Hana latɔɔpɛ ɔlaa aatɔɔta ni SAATE nwu yi, Eli latoonyu nwɔ kaanya. 13 Hana latɔɔpɛ ɔlaa di otu nɔɔ kamɛ, kafɔɔ anyasibi nɔɔ latɔɔpɛpɛɛ, kafɔɔ batanu nwɔ sɛlɔ. Nioso Eli lanyu alɛ nta oosiɛ, 14 ni aakaalɛ nwɔ alɛ, "Ɔmɛmbe fabasiɛ nta fanaase? Diɛ nta onyi."

15 Ni di Hana ladiki kanya alɛ, "Diele nkpo kute, saate nii, ɔsanko wɔ nikonu ni dibuo osie kanya nle. Ninnyi nta ee nta siene; otu nii kamɛ ɔlaa kodiki ntɔkɔ SAATE nwu. 16 Tannyu falɛ kpɛmblatɛ lɛfɔ nle ɔsanko ditiipɛ; kɔpɛ ɔlaa ninfũ nkyeko dibuo kplɛ ninyinyi kamɛ."

17 Ni di Eli ladiki kanya alɛ, "Tɔɔkyɛ di atoko ɔkyɛ ole kamɛ, di Israel Yaa nwu ata fɔ lɛsaa le fɛɛkaalɛ nwɔ ni."

18 Ni di Hana labuɛ alɛ, "Ta kpɛmblatɛ lɛfɔ awɛ sibualɛ di anu lɛfɔ." Ninfɛ di ɔsanko nwu lasifi aalaale alesaa, ni di anu nɔɔ lafukuti nɛ.

19 Kaleesɛ kuyitatũ, Elkana ku leyo nɔɔ batii lataka baasumu di SAATE nwu anu, ni baakple baasifi leyo lɛma di Rama nɛ. Ninfɛ di Elkana latenko ɔsɔfɔ nɔɔ Hana, ni di SAATE nwu lanyuma nwɔ nɛ. 20 Nioso di obe nwu kamɛ Hana lalaka lɛmɛ ni aalofo obisuɔtɔbi nɛ. Ni aatika nwɔ leyooto alɛ Samuel, aabuɛ alɛ, "Diekye SAATE nwu nfũ lakaalɛ nwɔ lakyeko."

21 Obe wɔ di osuɔtɔ nwu, Elkana ku leyo nɔɔ batii lakata baakyɛ alɛ bɔɔlata ni lɛlɛɛ oleɔta manta ni SAATE nwu, ambla ni di ntam nɔɔ be aaka nii kanya yi, 22 Hana ditakyɛ. Ni aatɔkɔ ɔsa nɔɔ alɛ, "Nse osuɔtɔbi nwu ntoobudi lɛnyɛɛ yi, kamakpaa nwɔ nkyɛnko di SAATE nwu anu, ansiɛ ninfa obe lele."

23 Ni di ɔsa Elkana latɔkɔ nwɔ alɛ, "Bla nle nimalɛ ninta fɔ ni, siɛ ninfũ dilaase di obe wɔ fatoobudisɔɔ ni lɛnyɛɛ; SAATE nwu ablako ɔlaa nɔɔ nwu ɔkpɛ nwaa." Nioso Hana lasiɛ leeyo aaklee obisuɔtɔbi nɔɔ diaalase di obe wɔ aabudisɔɔ ni lɛnyɛɛ.

24 Aabudisɔɔ lɛnyɛɛ aaloo nii, aakpaa osuɔtɔbi nwu ale ni obisɔ, aaklee kafɔɔ nankyue-suɔtɔ wɔ niafũ ni alɛɛ atiɛ ku nnaafũ efa* onwii ku nta dikuuku aakyɛnko SAATE nwu leyo di Silo. 25 Baalo nankyue nwu baaloo nii, ni baakpaa osuɔtɔbi nwu baawako Eli, 26 ni di Hana latɔkɔ nwɔ alɛ, "Di nwaako saate nii, fɛɛnya fakpe ni nkpa, ami ninle ɔsanko wɔ niayila ni ninfũ di ɔlɔɔkɔ lɛfɔ latɔɔpɛ ɔlaa latɔɔta ni SAATE nwu nɛ. 27 Lapɛ ɔlaa lakaalɛ obi wɔ mmle, ni di SAATE nwu latɛɛ lɛsaa le lakaalɛ nwɔ ni nɛ. 28 Nioso kanunua lɛyɔ nwɔ lɛta SAATE nwu. Nkpa nɔɔ mmuu babayɔ nwɔ manta SAATE nwu." Ni di Elkana ku leyo nɔɔ batii lasumu SAATE nwu ninfa nɛ.