1 Ninfɛ di Hana lapɛ ɔlaa aabuɛ alɛ,

"Otu nii, nnya suoto lɛyɔɔ di SAATE nwu kamɛ;

di SAATE nwu kamɛ bɛɛtakatɛsa lɛkya* nii katoo.

Kanya nii kɔkanta di balo nii suoto,

diekye mmpɔ di didiki lɛfɔ kamɛ.

2 "Kuonwii nnaa ate ni klekle* fɛle SAATE nwu;

kuonwii nnaa fɛ afɔ;

Difuɔnkpaa kuninwii nnaa fɛle Yaa loo.

3 "Tantɔɔkakatɛ lɛkanta kanya

ee fata kanya lɛfɔ katantoobuɛ sɛkanta-laa,

diekye SAATE nwu nle Yaa wɔ nin-ye nii,

nnwɔɔ kafɔɔ nimbudisa ɔlaa anta batii nɛ.

4 "Batoofefee bakpɛtɛ ataa,

kafɔɔ mankpee mba ninaa ni ɔnyɛɛ osie.

5 Mba niale baamiɛ ni saa, ntɔɔkyɛ bɔɔbla sɛkpɛ manta batii manfũ alɛsaa,

kafɔɔ kɔka diesinkle mba di kɔka laklee nii.

Ɔsanko wɔ niale ni ɔlɛma ntoolofo babi bakuɛnsĩ,

kafɔɔ ɔsanko wɔ niawɛ ni babisuɔtɔbi kpinwu nfɛ kɔsɔɔ anloo.

6 "SAATE nwu nwako kukpi, anta kafɔɔ mansiɛ nkpa;

nnwɔɔ ninkpaa batii ankpee di ɔkya kamɛ, antakatɛsa ma kafɔɔ.

7 SAATE nwu nta dipii ku lɛsaawɛ;

nnwɔɔ ninwakosa batii kasɔ, nnwɔɔ kafɔɔ nintakatɛsa ma katoo.

8 Nnwɔɔ nintakatɛsa bapiitɛ di kudu kamɛ,

ankɛnkɛ mba diefĩ ni kafɔɔ di ntɔ ditii suoto;

nnwɔɔ ninsiɛsa ma ku banɔɔfotii

anta ma kafɔɔ mansiɛ di dibu lɛkakpomii suoto.

"Diekye kasɔ nwu asɔse nle SAATE nwu ale;

nnya suoto ɛɛtɛ kayi nɛ.

9 Abanyu baklekletɛ nɔɔ nkpaa,

kafɔɔ abata basiensietɛ nlokanana di ditunu kamɛ.

"Diele suoto osie ninta otii nlenkee.

10 Bababibiɛ mba niesĩ ni SAATE nwu.

Abakpududuu ankyeko osi ankpete ma di suoto;

SAATE nwu kamakanko kasɔ nwu nyɛntɛlekɔ.

"Abata ɔka nɔɔ osie

antakatɛsa nnwɔ ɛɛpɛ ni ɔfɔɔ lɛkya katoo."

11 Ninfɛ di Elkana lasifi leyo nɔɔ di Rama, kafɔɔ osuɔtɔbi nwu latɔɔbla ɔkpɛ di SAATE nwu anu, di Eli ɔletatɛ nwu kalɔ.

12 Eli babisuɔtɔbi lale basuɔtɔ kpile; batawɛ dibu kuninwii baata SAATE nwu. 13 Ɔsaabla kuale kuata olebatatɛ ba mmle ku batii nɔɔ alɛ, obe lele di otii owo lɛta oleɔta, bɔɔwa ni sina nwu yi, oletatɛ kpɛmblatɛ nklee ɔwɛfɛ-futuwɛ nnya ntiɛ di kɔnɛɛ nɔɔ anwako. 14 An-yɔ ankpee di bɛɛsi ee ɔkakutu ee ladisɛ ee dibukii andiki sina. Oletatɛ kafɔɔ n-yɔ sina lele di ɔwɛfɛ nwu lediki nii. Nkpo mambla Israel batii bamuu ba ninwa ni Silo nɛ. 15 Kafɔɔ fiɛ bia babafiɛ ni lɛla nwu, oletatɛ kpɛmblatɛ nwu nkyɛ anaatɔkɔ otii wɔ nikɔta ni oleɔta alɛ, "Ta oletatɛ nwu sina sewo afiɛ; ɔlɔbafũ sina wanne di ɔkyɛ lɛfɔ, kafɔɔ sɛkɔnne lete."

16 Nse otii wɔ nikɔta ni oleɔta nwu lɛtɔkɔ nwɔ alɛ, "Ta bakasa lɛla nwu ofiɛ, fiɛ nfɛ faadiki selele foomiɛ yi," kpɛmblatɛ nwu ndiki kanya alɛ, "Oowo, yɔ sĩ fatɛɛ nunua; nse faatuna, kamayɔ osie ndiki sĩ."

17 Bakosopo ba mmle okpile latɛ kuamuɔ di SAATE nwu anu, diekye batatɔɔyɔ dibu baatɔɔta SAATE nwu asaaɔta.

18 Kafɔɔ Samuel latɔɔbla ɔkpɛ di SAATE nwu anu-osuɔtɔbi wɔ niekpee ni simu akpeele fɛnɛnɛɛ. 19 Lɛlɛɛ biala Samuel ɔya nkaa akpeele kyɔ biibii ankyɛnko nwɔ, nse ɔɔkata ankyɛ nfa ku ɔsa manaata lɛlɛɛ kaanya oleɔta. 20 Eli nwii Elkana ku ɔsɔfɔ nɔɔ lɛtɔtrɔ ambuɛ alɛ, "Saate nwu ata fɔ babi di ɔsanko wɔ mmle suoto, di nnwɔ aapɛ ɔlaa aakaalɛ ni aayɔ nwɔ aata ni SAATE nwu kanya." Nse batoosifi leyo. 21 Ni di SAATE nwu lale Hana sibualɛ nɛ; ni aakple aalofo babisuɔtɔbi batiɛ ku babisankobi banyɔ nɛ. Di obe nwu kamɛ, osuɔtɔbi Samuel nwu latoomuɔ di SAATE nwu anu.

22 Ni di Eli wɔ nintoobe ni nwaa lanu lɛsaa biala le di babisuɔtɔbi nɔɔ latɔɔbla ni di Israel batii bamuu suoto nɛ. Mmle mantenko ni basanko ba nintɔɔbla ni ɔkpɛ di Lɛkpaayo le Mansi ni kayoko. 23 Nioso aatɔkɔ ma alɛ, "Obe oso biɔbla asaa nwu nkpo okle? Konu nkyeko batii bamuu nfũ di ɔsaabla kpile lee wɔ mmle suoto. 24 Oowo, babisuɔtɔbi nii; diele ɔlaa biene konu, kuɔkpɛ kunkyaka ni di SAATE nwu batii kamɛ. 25 Nse otii lɛbla okpile di otii bamba suoto, Yaa nle kpanaatɛ* antɔɔ; kafɔɔ nse otii lɛbla okpile di SAATE nwu suoto, owe nimale kpanaatɛ antɔɔ?" Kafɔɔ babi nwu ditanu ote lɛma kɔkà, diekye SAATE nwu dibiesaa diale alɛ aalo ma.

26 Ni di osuɔtɔbi Samuel nwu latoomuɔ di suoto sina kamɛ, ni aabuo SAATE nwu ku batii anu nɛ.

27 Ninfɛ di Yaa otii onwii lawa Eli nfũ aabatɔkɔ nwɔ alɛ, "Nnya ɔlaa wɔ di SAATE nwu kobuɛ ni alɛ: ‘Ntatɛ ladiki suoto nii latuo teefɔ leyo, di obe wɔ baasiɛ ni di Egipte di Farao kalɔ? 28 Ladiki teefɔ lakyeko ana nwu amuu kamɛ di Israel nlɛ ale mi oletatɛ, alɛ aakata ankyɛ oleɔta akyikye nii anaafiɛ olufui, ankpee kafɔɔ simu akpeele di anu nii. Layɔ kafɔɔ asaaɔta ya di Israel batii lata ni ku ɔtɔ amuu lata teefɔ leyo. 29 Obe oso minoobu oleɔta ku asaaɔta nii wɔ lɛbla lɛta ni kasiɛkɔ nii? Obe oso foobu babisuɔtɔbi lɛfɔ fanlenkee mi, minle aba ya ninlɛ ye ni di asaaɔta biala ya di Israel batii nii kɔta ni, minwɛ suoto?’

30 "Nioso SAATE nwu, Israel Yaa nwu lebuɛ alɛ: ‘Laka ntam nlɛ teefɔ leyo ku leyo lɛfɔ kamabla ɔkpɛ di anu nii dinaa ni kaloo.’ Kafɔɔ kanunua SAATE nwu kobuɛ alɛ: ‘Dikyɛ di okyo di suoto nii! Mba niɛtɛɛ ni dibu kamabu ma, kafɔɔ mba niekyidi mi nii, kamasĩ ma. 31 Obe kɔwa kamabudi osie lɛfɔ ku teefɔ leyo osie kakuu, alɛ ɔnɔɔfo beene dilɔbasinwɛ di leyo lɛfɔ batii kamɛ. 32 Fabanya kafɔɔ dibuo di kasiɛkɔ nii. Nu bababla dibiene manta Israel yi, leyo lɛfɔ kamɛ nni, ɔnɔɔfo beene dilɔbawɛ diidii. 33 Olele lee ninambudi ndiki di oleɔta akyikye nii suoto, kamawɛ nkpa alɛ aata anu lɛfɔ n-yii ku nnumɛɛ, ninta otu lɛfɔ mbuo sɛnyaami. Banantii lɛfɔ bamuu kamakpi di sekosopo lɛma obe kamɛ.

34 "‘Lɛsaa le kafɔɔ nimabla ni babisuɔtɔbi lɛfɔ banyɔ nwu, Hofni ku Pinehas, kamale dituosaa ninta fɔ-banyɔ lɛma nwu kamakpi dii ninwii. 35 Kamadiki onukwale oletatɛ nta suoto nii, nnwɔ nimabla ni di lɛsaa le ninsi ni di otu nii ku disibu nii kamɛ. Kamase leyo nɔɔ kpinkpĩ, ababla ɔkpɛ kafɔɔ di nnwɔ lɛpɛ ni ɔfɔɔ anu obe lele. 36 Nse otii biala niebu ni di leyo lɛfɔ kamɛ ntɔɔwa ɛɛbawa kasɔ di anu nɔɔ ɛɛkaalɛ koto fututu ku alesaa akloo, antikiti kafɔɔ lekoto alɛ, "Tɛɛ oletatɛ ɔkpɛ owo mbla, alɛ kawɛ alesaa nle."’"