1 Nioso Kiriat Yearim batii lakyɛ baalaayɔ SAATE nwu lɛlakaa. Ni baayɔ ni baasifiko Abinadab leyo di lekpenkpe osi, ni baakleklesa obisuɔtɔbi nɔɔ Eleasar suoto alɛ atoonyu SAATE nwu lɛlakaa nɛ.

2 Diale obe kpinwu, omuu labla alɛɛ afosi-anyɔ di lɛlakaa nwu lawɛ ni di Kiriat Yearim. Ni di Israel batii bamuu lawi baalɛɛ SAATE nwu nɛ. 3 Ninfɛ di Samuel latɔkɔ Israel leyo nimuu alɛ, "Nse biokple minwa SAATE nwu nfũ ku situ lee simuu, ni bikyisa anu lee di bafɔɔ afiɔ ku Astarot suoto, biɛyɔ suoto lee bita SAATE nwu, biesumu nnwɔɔ lete, ni abadiki ye ankyeko Filisti batii nnɛɛ." 4 Nioso Israel batii lakyisa Baal ku Astarot lɛma baatɛ, ni baasumu SAATE nwu lete nɛ.

5 Ninfɛ di Samuel labuɛ alɛ, "Bisiisa Israel batii bamuu di Mispa nimpɛ ɔlaa nta SAATE nwu nta ye." 6 Obe wɔ baasi ni di Mispa, baadu ntu baanyɛɛnɛ baatɛ di SAATE nwu anu. Di dii nwu nkpo baanii kanya, baadiki sikpile lɛma baabuɛ ninfa alɛ, "Buɔbla okpile di SAATE nwu suoto." Samuel niale Israel tunletɛ di Mispa.

7 Obe wɔ di Filisti batii lanu alɛ Israel batii ntoosi ni di Mispa, ni di Filisti batii batunletɛ lawa alɛ bɔɔbadieko ma nɛ. Di Israel batii lanu nwu ni ole yi, baayɛkɛ, ta Filisti batii nwu oso. 8 Ni baatɔkɔ Samuel alɛ, "Tandiɛ ɔlaa ɔpɛ ɔta SAATE, Yaa loo ɔta wo, alɛ aadiki wo ankyeko Filisti batii nnɛɛ." 9 Ninfɛ di Samuel layɔ lefosobi le nikɔnyɛɛfu ni, aayɔ ni aata SAATE nwu fɛ ofiɛ asaaɔta aata nɛ. Aapɛ ɔlaa aalɛɛ SAATE nwu di Israel batii disi, ni di SAATE nwu latuna aatɔɔ nɛ.

10 Obe wɔ di Samuel n-yɛ ɔɔta ni ofiɛ asaaɔta nwu, Filisti batii lakpukuti baatɛɛtɛɛ Israel batii alɛ bɔɔkpɛko ma. Kafɔɔ dii nwu nkpo SAATE nwu lakplalaa ku ɔplalaa osie kanya di Filisti batii suoto, diata alɛ baakpɔkpɔtɔ, baanɔnɔɔ di Israel batii anu. 11 Ni di Israel batii lakusa baadie di Mispa baatikanko Filisti batii, baaloloo ma baatɛ di osuku baalaadu Bet Kar okpoo kalɔ.

12 Ninfɛ di Samuel layɔ difuɔ aatɛ di Mispa ku Sen ntɛɛ nɛ. Ni aatika ni leyooto alɛ, Ebeneser,* aabuɛ alɛ, "Nfũ di SAATE nwu lɛkyakaako wo ɛɛbadu nɛ." 13 Nioso baalenkee Filisti batii, batasinkple baataka di Israel batii kasɔ suoto.

Di Samuel nkpa mmuu osiɛ kamɛ, SAATE nwu letoko naanfi latika di Filisti batii suoto. 14 Baakplesa sekpoo se di Filisti batii lafũ ni di Israel batii nnɛɛ, diayɔ ni di Ekron dialaase ni di Gat baata Israel. Israel batii lafũ kafɔɔ nsɔ be niɛtɛɛtɛɛ ma ni di Filisti batii nnɛɛ. Nioso atoko ɔkyɛ ole lawɛ di Israel batii ku Amori batii ntɛɛ.

15 Samuel lakple aatoole tunletɛ di Israel suoto di nkpa nɔɔ ayi amuu kamɛ. 16 Lɛlɛɛ biala Samuel nkyɛ ankyi diayɔ ni di Betel dialaadu ni Gilgal, diesifi ni Mispa anaantɔɔka aka antɔɔta Israel di aba ya mmle amuu. 17 Kafɔɔ obe lele ankple ansifi Rama, nfũ niale ni okpoo nɔɔ. Nfa kafɔɔ aatɔɔka aka aatɔɔta Israel nɛ. Ni aapɛ oleɔta akyikye ninfa aata SAATE nwu nɛ.