1 Ninfɛ di Filisti batii lasiisa bakpɛtɛ lɛma bamuu di Afek nɛ. Israel kafɔɔ lasiɛ di ntu kataakɔ di Yesreel. 2 Di Filisti batii batunletɛ nkyɛ ni ku akudi lɛma di alafa ku nkpe kanya yi, Dawid ku batii nɔɔ kafɔɔ latɔɔkyɛ sɛɛmaa ku Akis. 3 Ninfɛ di Filisti batii bakpɛtɛ kanyabayilatɛ lakaalɛ alɛ, "Ni Hebri batii ba mmle mɔ?"

Ni di Akis ladiki kanya alɛ, "Diele Dawid wɔ niale ni ɔka Saul ɔnɔɔfotii onwii di Israel nɛ?" Atoosiɛ di ɔkyɛ nii dielenkee lɛlɛɛ. Diayɔ ni kafɔɔ di dii le aadie ni di Saul nfũ diɛbase ni nunua, ninnya okpile kuonwii di suoto nɔɔ."

4 Kafɔɔ Filisti batii kakpɛ kanyabayilatɛ lanya ɔblɔ baakpeeko Akis baatɔkɔ nwɔ alɛ, "Kplesa osuɔtɔ nwu, aakple asifi lɛba le fɛɛtɔɔ ni. Diɛkaatɛ alɛ ɛɛkyɛ kakpɛ ku awo, se diele nkpo, abamunikĩi ankpɛko wo di kakpɛ nwu kamɛ. Ɔmɛnsuku biene suoto abafe ankple anwɛ saate nɔɔ sibualɛ, ninlekee batii loo bamu asi obudi?" 5 Diele Dawid nwu suoto baasa sinu, baatũ ntũ lɛma alɛ:

" ‘Saul lalo nkpe nɔɔ,

kafɔɔ Dawid nkpe afosi nɔɔ’?"

6 Nioso Akis lalɛɛ Dawid aatɔkɔ nwɔ alɛ, "Nwaako di SAATE nwu lɛnya akpe ni nkpa, fakpe onukwale, nioso dibayɔɔ mi kafutu alɛ faasiɛ ku ami di bakpɛtɛ kamɛ. Diayɔ ni di dii le faawa ni ɔkyɛ nii diɛbaase di nunua, ninnya okpile kuonwii di suoto lɛfɔ, kafɔɔ batunletɛ nwu diefũ fɔ bakpee. 7 Munikĩi, faatɔɔkyɛ ku atoko ɔkyɛ ole; tambla lɛsaalɛsaa nimabuo ni Filisti batii batunletɛ suoto."

8 Ni di Dawid lakaalɛ alɛ, "Kafɔɔ obe lɛbla? Obe fɛɛnya di kpɛmblatɛ lɛfɔ suoto diayɔ ni di dii le lawa ni ɔkyɛ lɛfɔ diɛbase ni di nua? Be oso ninankyɛ nnaakpɛko saate nii ɔka balo?"

9 Ni di Akis ladiki kanya alɛ, "N-ye nlɛ foobuo mi anu fɛ Yaa tɔkyɛntɛ; kafɔɔ, Filisti batii kakpɛ kanyabayilatɛ niebuɛ alɛ, ‘Diɛkaatɛ alɛ ɛɛkata ɛɛkyɛ kakpɛ ku awo.’ 10 Nunua taka ku olesɛ, minko saate lɛfɔ bakpɛmblatɛ ba niawa ni ku afɔ, biedie ku kolesɛtũ nse kayi lɛkpa ɔkpa."

11 Nioso Dawid ku batii nɔɔ lataka ku kolesɛtũ alɛ bookple mansifi Filisti batii kasɔ suoto, ni di Filisti batii lakata baasifi Yesreel nɛ.