1 Saul lafũ alɛɛ afosi atiɛ fiɛ aabale ɔka, aale sɛka di Israel alɛɛ afosi-ana-anyɔ.

2 Ni di Saul ladiki basuɔtɔ nkpe ntiɛ aakyeko Israel; nkpe nnyɔ lawɛ di ɔkyɛ nɔɔ di Mikmas ku Betel lekpenkpe kale nwu. Kakpe kanwii kafɔɔ ku Yonatan di Gibea di Benyamin kasɔ suoto. Aakplesa basuɔtɔ bule aasifiko ayo lɛma.

3 Yonatan lakpɛko Filisti batii kasikɔ nwu di Geba, ni di Filisti batii lanu nwu ole nɛ. Ninfɛ di Saul lata baafɛ dikukyoo baakyiko kasɔ nwu kamuu baabuɛ alɛ, "Bita Hebri batii banu!" 4 Nioso Israel batii bamuu lanu ɔlaa nwu alɛ, "Saul kɔkpɛko Filisti batii kasikɔ, ni nunua Israel ntookple akpofoe bɛɛta Filisti batii." Ni baalɛɛ batii nwu alɛ babakyakaa di Saul suoto di Gilgal nɛ.

5 Ni di Filisti batii lasi alɛ bɔɔkpɛ Israel ku bakeke ba di bapɔnkɔ nnanfi ni nkpe ntiɛ, bakeke bawantɛ nkpe nkuɔ ku bakpɛtɛ lɛpɔ fɛ lekpo kotoko ɔtɛnsia. Baakata baalaasiɛ di Mikmas, di Bet Awen kufĩ katunkɔ. 6 Obe wɔ di Israel batii lanya alɛ diɔwɛ ma ni osie, boomiina ni bakpɛtɛ lɛma osie kanya yi, baawofa di sifuɔntuu, abuu, afuɔ, abiɔ ku atubiɔ kamɛ. 7 Hebri batii bawo bia lawaalɛ Yordan baasifi Gad ku Gilead kasɔ suoto.

Saul laka di Gilgal, bakpɛtɛ ba bamuu ba kafɔɔ niawɛ ni di ɔkyɛ nɔɔ latootũtũkũ ku lɛyɛkɛ. 8 Aasiɛ ayi akuɛnsĩ, di obe wɔ di Samuel latɛ nii; kafɔɔ Samuel ditawa Gilgal. Ni di Saul batii lakyako ɔsamii nɛ. 9 Nioso aabuɛ alɛ, "Biwakoe ofiɛ asaaɔta nwu ku atoko ɔkyɛ ole asaaɔta nwu." Ni di Saul lata ofiɛ asaaɔta nɛ. 10 Aaloo oloo asaaɔta nwu ɔta, Samuel niamabuo, ni di Saul ladie aakyɛ aalaasɛɛsɔɔ nɛ.

11 Ni di Samuel lakaalɛ alɛ, "Obe fatɔɔbla nɛ?"

Saul ladiki kanya alɛ, "Lanya nlɛ batii nwu nfɛ kɔsamii ni, di afɔ kafɔɔ faawa ni di obe wɔ fɛɛtɛ ni kamɛ, di Filisti batii kafɔɔ latoosi ni di Mikmas, 12 lanyu nlɛ, ‘Nunua di Filisti batii kamasoo mamabuo mi di suoto di Gilgal, ninkaalɛ kafɔɔ SAATE nwu lɛkyakaako.’ Nioso layɔ latika di suoto nlɛ kɔta ofiɛ asaaɔta nɛ."

13 Ni di Samuel labuɛ alɛ, "Fɛɛbla dibuusaa, faale kufiofa ko di SAATE Yaa lɛfɔ lata fɔ nii. Nse fanle kufiofa nwu yi, nse atabatɛ sɛka kalekɔ lɛfɔ nwu di Israel suoto obe biala. 14 Kafɔɔ kanunua sɛka kalekɔ lɛfɔ dilɔbasinyila; SAATE nwu ntoomiɛ osuɔtɔ onwii di otu nɔɔ omu ntika nii. Atoodiki nwɔ tunletɛ ɛɛta batii nɔɔ, diekye faale SAATE nwu kufiofa."

15 Ninfɛ di Samuel ladie di Gilgal aakata aasifi Gibea di Benyamin kasɔ suoto nɛ. Ni di Saul laka basuɔtɔ ba niawɛ ni di ɔkyɛ nɔɔ nɛ. Lɛpɔ lɛma labla fɛ alafa akuɔ.

16 Saul ku obisuɔtɔbi nɔɔ Yonatan ku basuɔtɔ ba niawɛ ma ni di ɔkyɛ lasiɛ di Gibea di Benyamin kasɔ suoto. Filisti batii kafɔɔ lasi di Mikmas. 17 Ni di bakpɛtɛ akudi ladie di Filisti batii kasikɔ baasifi di akudi atiɛ kanya nɛ. Ninwii lakyɔɔ anu Ofra di Sual kasɔ suoto, 18 lɛbamba lakyɔɔ anu Bet Horon, ditiɛfa kafɔɔ lakyɔɔ anu kasɔ kɔmɛ ko mantɔɔnya ni di Seboim Ɔtaata wɔ niɛkyɔɔ ni ɔfaafuu anu.

19 Asaa-tukatɛ kuonwii ditawɛ di Israel kasɔ kamuu suoto. Diekye Filisti batii labuɛ alɛ, "Nse diele nkpo, Hebri batii nwu ntabatuka mpamii ee akplɔ!" 20 Nioso Israel batii bamuu nsoo mankyɛ Filisti batii nfũ manaalɔɔfɔ anwa, nkyɔɔku, nnfɛ́ ku nsaka lɛma. 21 Manfũ bagram banɛ nse bɛɛlɔɔfɔ anwa ku nkyɔɔku, bagram bana kafɔɔ nse bɛɛlɔɔfɔ nsaka, nnfɛ́ ku akplɔ se beese nya dituka.

22 Nioso di kakpɛ dii nwu suoto, bakpɛtɛ ba niawɛ ni ku Saul ku Yonatan ɔkyɛ kuonwii lɛma ditaklee kapamii ee lɛkplɔ di kɔnɛɛ nɔɔ. Saul ku obisuɔtɔbi nɔɔ Yonatan lete niaklee nya.

23 Nioso Filisti batii bakpɛtɛ dikudi ninwii ladie baafe Mikmas osuku ɔla.