1 SAMUEL 10

Samuel Lapɛ Saul Ɔfɔɔ Fɛ Ɔka

1 Ninfɛ di Samuel ladiki kakɔkɔɛ ku ɔfɔɔ aanyɛɛnɛ aakpete di Saul disi, ni aafĩfĩɔ nwɔ akpoo aabuɛ alɛ, "Diele SAATE nwu niɛpɛ fɔ ɔfɔɔ alɛ le tunletɛ di atesaa nɔɔ suoto?" 2 Nse feediɛ mi miɛ feesifi, fabakyakako basuɔtɔ banyɔ di Rahel ɔkya ɔlɔɔkɔ di Selsa di Benyamin kasɔ kɔmɛ suoto. Babatɔkɔ fɔ alɛ, ‘Batɔɔnya babɔkɛɛ ba nintuka ni atoo ba feedie fɛɛkyɛ foowolaa nii. Nioso nunua teefɔ ntoodiɛ ma disi obu. Afɔ disi nfɛ oobu. Teefɔ kɔkaalɛ alɛ, "Lɛ kamabla di obisuɔtɔbi nii suoto?" ’

3 "Ni fabadie ninfa fansifi ninaase di obe wɔ fablaadu ni Tabor kowoso kplɛ katũ. Basuɔtɔ batiɛ ba nikɔkata manfe ni Yaa nfũ di Betel makyakako fɔ ninfa. Onwii matuka kutiebii kutiɛ, ɔbamba bloblo akudi atiɛ, ɔbamba kafɔɔ nta dikuuku. 4 Babasɛɛsa fɔ manta fɔ bloblo akudi anyɔ, fabafũ nya fankyeko ni ɔkyɛ lɛma.

5 "Nni sɛmaa faabakyɛ Gibea Yaa nfũ, lɛba le di Filisti batii kasiɛkɔ nkpe nii. Foobuo ni okpoo nwu yi, fabakyakako Yaa ɔlaa babuɛtɛtɛ dikudi kosoo mankye olekatakɔ nwu manwa ku basanku ku akasa ku kukyukyue ku bakyitaa, manle fɔ katũ mantɔɔfɛ nya, mantoobuɛ sɛlaa mantɔɔtɛ. 6 Nse SAATE nwu Ninwuna ntoobuo fɔ di suoto ku osie, fababuɛ sɛlaa fantɛ ku mma; babakyisa fɔ fambla otii bamba. 7 Nse atuosaa ya mmle ntɔɔwa kaanya, bla lɛsaa lele di nnɛɛ lɛfɔ lenyu alɛ diɔbla ni, diekye Yaa nsiko fɔ.

8 "Le mi katũ faasoo fasifi Gilgal. Nwaako kamasoo nwa fɔ ɔkyɛ nimata ofiɛ asaaɔta ku atoko ɔkyɛ ole asaaɔta. Kafɔɔ dikpeni feesoko ayi akuɛnsĩ diɛlaase di obe wɔ lɛwa fɔ ni ɔkyɛ lɛbatɔkɔ fɔ ni lɛsaa le fababla nii."

9 Di Saul lamunikĩi alɛ oodiɛ Samuel ansifi nii, Yaa lakyɛlɛnsa nwɔ otu, ni di atuosaa ya mmle amuu lawa kaanya di dii nwu nkpo nɛ. 10 Obe wɔ baabuo ni Gibea, Yaa ɔlaa babuɛtɛtɛ dikudi nwu lakyakako nwɔ; Yaa Ninwuna labuo nwɔ di suoto ku osie, ni aakpɔtɔɔ di sɛlaa obuɛ ɔtɛ lɛma nwu kamɛ nɛ. 11 Obe wɔ di mba nin-ye nwɔ ni saa lanyɔɔ oobuɛ sɛlaa antɛ ni ku ɔlaa babuɛtɛtɛ nwu, baakaalɛ bawo alɛ, "Obe ninle nle nintɔɔwa ni di Kis obisuɔtɔbi nwu suoto? Saul kafɔɔ nsi di ɔlaa babuɛtɛtɛ kamɛ?"

12 Ninfɛ di osuɔtɔ onwii niakye ni nfa ladiki kanya alɛ, "Ni owe ninle ote lɛma?" Nioso diabakple ɔlaa dibuɛbi alɛ: "Saul kafɔɔ nsi di ɔlaa babuɛtɛtɛ kamɛ?" 13 Di Saul ladiɛ ni sɛlaa obuɛ ɔtɛ ni sɛmaa, ni aasifi olekatakɔ nwu nɛ.

14 Ninfɛ di Saul ote bisɔnle lakaalɛ nwɔ ku kpɛmblatɛ nɔɔ nwu alɛ, "Ɔfɛ biekye?"

Ni di Saul ladiki kanya alɛ, "Babɔkɛɛ ba nintuka ni atoo buɔlaawolaa. Kafɔɔ obe wɔ buanya bulɛ bulɔbanya ma nii, ni buasifi Samuel nfũ nɛ."

15 Ni di Saul ote obilɛma latɔkɔ nwɔ alɛ, "Tɔkɔ mi ɔlaa wɔ di Samuel latɔkɔ fɔ ni."

16 Saul ladiki kanya alɛ, "Aatɔkɔ wo aatikiti alɛ batɔɔnya babɔkɛɛ ba nintuka ni atoo nwu." Kafɔɔ atatɔkɔ ote bisɔnle ɔlaa wɔ di Samuel latɔkɔ nwɔ ni di sɛka ole suoto.

Baadiki Saul Baatuo Fɛ Ɔka

17 Ni di Samuel lalɛɛ Israel batii di SAATE nwu nfũ di Mispa 18 aatɔkɔ ma alɛ, "Nnya ɔlaa wɔ di SAATE, Israel Yaa nwu kobuɛ ni alɛ: ‘Ami niakpaa Israel ladieko di Egipte, ami kafɔɔ niadiki ye lakyeko Egipte osie nwu ku sɛka nlekɔ mmuu be niabla ye ni amumu kamɛ.’ 19 Kafɔɔ kanunua bitoosĩ Yaa lee wɔ niafũ ye ni nkpa di dibuo ku amiina lee amuu kamɛ. Ni biebuɛ bilɛ, ‘Oowo, se ɔka fata wo.’ Nioso nunua biwa di SAATE nwu anu di ana ku nfaabi lee kanya."

20 Di Samuel lata Israel ana nwu amuu lakpukuti baatɛɛtɛɛ nii, Benyamin kɔna baadiki. 21 Ninfɛ di Samuel lata Benyamin kɔna lawa sitũ di kafaabi, kafaabi kanya, ni baadiki Matri kafaabi nɛ. Yɛntɛ, yɛntɛ Kis obisuɔtɔbi Saul baadiki. Kafɔɔ baawolaa nwɔ, batanyɔɔ. 22 Nioso baakple baase SAATE nwu ɔkaalɛ alɛ, "Osuɔtɔ nwu lɛwa nfũ fiɛ."

Ni di SAATE nwu alɛ, "Yii, eewofasa suoto nɔɔ di atoo nwu kamɛ."

23 Ni baatoso baalaadiki nwɔ baawako nɛ. Aabaayila ni di batii nwu kamɛ, aakaana diayɔ ni di amuusi nɔɔ aalenkee obiala lɛma. 24 Ni di Samuel latɔkɔ batii nwu bamuu alɛ, "Bitɔɔnya osuɔtɔ wɔ di SAATE nwu ntoodiki ni? Okle nɔɔ kuonwii nnaa di batii nwu bamuu kamɛ."

Ninfɛ di batii nwu lataasiwidi baabuɛ alɛ, "Ɔka asiɛ nkpa aklɛ!"

25 Ni di Samuel ladiki sɛka ole afiofa kamɛ aata batii nwu nɛ. Aakpana nya di kukũ suoto aalaatɛ di SAATE nwu anu. Ninfɛ di Samuel ladiki batii nwu osuku, obiala lasifi leyo nɔɔ nɛ.

26 Saul kafɔɔ lasifi leyo nɔɔ di Gibea, basuɔtɔ ku sɛkambi ba situ di Yaa lakpanko ni latikanko nwɔ. 27 Kafɔɔ kudú bakpeetɛ labuɛ alɛ, "Lɛ di otii wɔ mmle kafuo wo odiki?" Baanyu nwɔ nyakatãa, batawako nwɔ lɛkyɛsaa kuniwii kafɔɔ. Kafɔɔ Saul lalo kanana.