1 Ni di Dawid ladie di Gat, ni aatoso aasifi Adulam ofuɔntuu nɛ. Obe wɔ di babilɛma-suɔtɔbi ku ote leyo kamɛ batii lanu nwu ni ole, baasoo baakyɛ ɔkyɛ nɔɔ ninfa. 2 Mba bamuu niasiɛ ni di nimiina kamɛ ee baasiɛko ni ato ee suoto ditatɔɔyɔɔ ma ni lamana nwɔ baakyi, ni aabakple kanyayilatɛ lɛma nɛ. Baabla fɛ basuɔtɔ alafa-ana di ɔkyɛ nɔɔ.

3 Aadie ni ninfa, Dawid lakyɛ Mispa di Moab, ni aalaakaalɛ Moab ɔka alɛ, "Fabata teemi ku yaami nnwa mammasiɛ di ɔkyɛ lɛfɔ ninaase di obe wɔ kamatofo ni lɛsaa le di Yaa kamabla antɛɛ ni?" 4 Nioso aadiɛ ma di Moab ɔka ɔkyɛ, ni baasiɛ di ɔkyɛ nɔɔ di obe wɔ di Dawid lasiɛ ni di ofuɔntuu nwu kamɛ nɛ.

5 Kafɔɔ Yaa ɔlaa buɛtɛtɛ Gad latɔkɔ Dawid alɛ, "Tansiɛ di ofuɔntuu nwu kamɛ. Tɔɔkyɛ Yuda kasɔ suoto." Nioso Dawid ladie aasifi Heret lepoo kamɛ.

6 Ninfɛ di Saul lanu alɛ batɔɔnya Dawid ku batii nɔɔ nɛ. Saul laklee lɛkplɔ kɔɔnɛɛ, aasiɛ di kowoso ko manlɛɛ ni tamarisk kalɔ di lekpenkpe osi di Gibea. Banɔɔfotii nɔɔ bamuu kafɔɔ layila baakyi nwɔ. 7 Ninfɛ di Saul latɔkɔ ma alɛ, "Benyamin basuɔtɔ, binu! Yese obisuɔtɔbi nwu kamata bamuu lee afe ku nta awosobi afe? Ababla bamuu lee kakpɛ kanya bayilatɛ anta di nkpe ku alafa kanya? 8 Nkpo oso di bamuu lee biekũ kanwumbe di suoto nii nɛ? Kuonwii diɛtɔkɔ mi obe wɔ di obisuɔtɔbi nii kɔbla ni kanya ninii ku Yese obisuɔtɔbi. Kuonwii lee diɛyɔ nwu ole di suoto nii ee atɔkɔ mi alɛ obisuɔtɔbi nii lekpee kpɛmblatɛ nii alɛ ate asoko mi, fɛ mmle ɔɔbla ni miɛ."

9 Kafɔɔ Doeg, Edom otii nwu niayila ni ku Saul banɔɔfotii nwu labuɛ alɛ, "Lanya Yese obisuɔtɔbi nwu lawa Ahitub obisuɔtɔbi Ahimelek ɔkyɛ di Nob. 10 Ni di Ahimelek lawolaa kamɛ aakyeko SAATE nwu nfũ aata Dawid nɛ; aatɔɔ kafɔɔ alesaa asaa ku Goliat, Filisti otii nwu kapamii nɛ."

11 Nioso ɔka lakpee baalɛɛ Ahitub obisuɔtɔbi Ahimelek oletatɛ nwu ku ote leyo kamɛ batii bamuu ba niale ni olebatatɛ di Nob. Ni di bamuu lɛma baawa ɔka nfũ nɛ. 12 Saul latɔkɔ ma alɛ, "Ahitub obisuɔtɔbi, kyɔɔ atoko nunua."

Ni aatuna alɛ, "Yioo, saate nii."

13 Ninfɛ di Saul lakaalɛ nwɔ alɛ, "Be oso biekũ kanwumbe di suoto nii, afɔ ku Yese obisuɔtɔbi. Fɛɛtɔɔ bloblo ku kapamii, feewolaa kafɔɔ asaa kamɛ di Yaa nfũ fɛɛtɔɔ, diɛta alɛ atɔɔtaka ayɛ mi di suoto, ate asoko mi, fɛ mmle ɔɔbla ni miɛ?"

14 Ni di Ahimelek ladiki kanya alɛ, "Owe di bakpɛmblatɛ lɛfɔ bamuu kamɛ ninkpe onukwale fɛ Dawid, ɔka ɔlɔ nwu, banyuntɛ lɛfɔ kanyayilatɛ, boobu nwɔ ni nwaa di leyo lɛfɔ batii kamɛ? 15 Dii nwu lete niale lɛkasale lawolaa ni asaa kamɛ di Yaa nfũ latɔɔ ni nɛ? Nwaako, oowo! Ɔka atan-yɔ ɔlaa aatika di kpɛmblatɛ lɛfɔ suoto ee ote leyo kamɛ otii kuonwii suoto. Diekye kpɛmblatɛ lɛfɔ dieye lɛsaalɛsaa di nle mmle nimuu suoto saa."

16 Kafɔɔ ɔka labuɛ alɛ, "Ahimelek, nwaako fabakpi, afɔ ku teefɔ leyo kamɛ batii bamuu."

17 Ninfɛ di ɔka ladiki banyuntɛ ba di ɔlɔɔkɔ nɔɔ kanya alɛ: "Bimunikĩi bielo SAATE nwu olebatatɛ, diekye mma kafɔɔ bɛɛbla kanya kanwii ku Dawid. Baatofo alɛ otoso aatootoso, kafɔɔ batatɔkɔ mi."

Kafɔɔ ɔka banɔɔfotii nwu ditamiɛ alɛ boodiki kɔnɛɛ mankpanko SAATE nwu olebatatɛ.

18 Ninfɛ di ɔka ladiki Doeg kanya alɛ, "Afɔ munikĩi faalo olebatatɛ nwu." Nioso Doeg, Edom otii nwu lamunikĩi aalo ma. Dii nwu nkpo, aalo basuɔtɔ afosi-anɛ-banɔɔ ba niakpee ni simu akpeele fɛnɛnɛɛ. 19 Aalo kafɔɔ Nob, olebatatɛ okpoo nwu ku basuɔtɔ ku basanko lɛma, babisɔ, babifɔɔle ku banankyue, babɔkɛɛ ba nintuka ni atoo ku bafoso lɛma ku kapamii.

20 Kafɔɔ Ahitub obisuɔtɔbi obi Ahimelek obisuɔtɔbi Abiatar ladie aatoso aalaakyakaa di Dawid suoto. 21 Ni aatɔkɔ Dawid alɛ Saul ntoolo SAATE nwu olebatatɛ. 22 Ninfɛ di Dawid latɔkɔ Abiatar alɛ: "Di dii nwu nkpo, di Doeg, Edom otii nwu lawɛ ni ninfa, latofo nlɛ nwaako abatɔkɔ Saul. Ami ninkyɛnko di teefɔ leyo kamɛ batii bamuu kukpi kamɛ. 23 Siɛ di ɔkyɛ nii; tan-yɛkɛ; osuɔtɔ wɔ nikomiɛ alɛ alo fɔ nii, oomiɛ alɛ alo mi kafɔɔ. Fabawɛ nkpa di ɔkyɛ nii."