1 Di ayi nwu kamɛ, Filisti batii lasiisa bakpɛtɛ lɛma alɛ bɔɔlaakpɛko Israel. Ni di Akis latɔkɔ Dawid alɛ, "Dikpeni feenu kasɔ falɛ afɔ ku batii lɛfɔ kamakyakaa di bakpɛtɛ nii kamɛ."

2 Ni di Dawid latɔkɔ nwɔ alɛ, "Ni afɔ omu fabanyu lɛsaa le di kpɛmblatɛ lɛfɔ kamafuo ni ɔbla."

Akis ladiki kanya alɛ, "Dilɛ nwaa, kamabla fɔ suoto nii nyuntɛ di nkpa nii mmuu kamɛ."

3 Samuel lakpi, ni di Israel omuu lawi nwɔ nɛ, baalaakookaa nwɔ di okpoo nɔɔ omu Rama. Ni di Saul latososa babɔmpɛtɛ ku bafatɛ di kasɔ nwu suoto nɛ.

4 Ninfɛ di Filisti batii lasi baatɛ kasikɔ di Sunem, Saul kafɔɔ lasiisa Israel batii bamuu baatɛ kasikɔ di Gilboa. 5 Di Saul lanya ni Filisti batii bakpɛtɛ yi, aayɛkɛ; ɔfɔɔ lasifi nwɔ. 6 Ni aawolaa kamɛ di SAATE nwu nfũ, kafɔɔ atatuna aatɔɔ di alaafɔ ee Urim ee Yaa ɔlaa bubuɛtɛtɛ suoto. 7 Ninfɛ di Saul latɔkɔ bakpɛmblatɛ nɔɔ alɛ, "Bimiɛ ɔsanko wɔ ninle ni bɔmpɛtɛ bitɛɛ, ninkyɛ ninaawolaa kamɛ di ɔkyɛ nɔɔ."

Ni baabuɛ alɛ, "Onwii nkpe di Endor."

8 Nioso Saul lakpee aklesaa bamba alɛ batantofo nwɔ, ni di nnwɔɔ ku basuɔtɔ banyɔ baakyɛ ɔsanko nwu nfũ ku kakyɛ nɛ. Ni aatɔkɔ ɔsanko nwu alɛ, "Kaalɛ asaa fatɛɛ, faata nnwɔ leyooto kamalɛɛ ni adie awa."

9 Kafɔɔ ɔsanko nwu latɔkɔ nwɔ alɛ, "Nwaako, faye lɛsaa le di Saul lɛbla nii. Atoodiki babɔmpɛtɛ ku bafatɛ di kasɔ nwu suoto. Be oso fɛɛkyɔɔ mi okũ alɛ kuyɔ kukpi kuwakoe?"

10 Ni di Saul layɔ SAATE nwu aaka ntam aatɔɔ alɛ, "Nwaako, di SAATE nwu lɛnya akpe ni nkpa, blɔbananfi fɔ kootoko di nle mmle suoto."

11 Ninfɛ di ɔsanko nwu lakaalɛ alɛ, "Owe ninta adie awa ata fɔ?"

Ni aabuɛ alɛ, "Samuel faata awa."

12 Di ɔsanko nwu lanya ni Samuel, aafaa ku sɛlɔ osie kanya aatɔkɔ Saul alɛ, "Be oso fɛɛkyɔnkyɔ mi? Afɔ ninle Saul!"

13 Ni di ɔka nwu latɔkɔ ɔsanko nwu alɛ, "Tan-yɛkɛ. Obe fɛɛnya?"

Ni di ɔsanko nwu labuɛ alɛ, "Lɛnya kpi onwii kɔtaka andie kaasɔ."

14 Ni di Saul lakaalɛ nwɔ alɛ, "Lɛ okle ate?"

Ni di ɔsanko nwu labuɛ alɛ, "Osuɔtɔ nɔɔfɔ niekpee ni akpeele wua nikodie anwa."

Ninfɛ di Saul latofo alɛ Samuel diale, ni aawakasɔ, aate wlɔlɔ aafuusa anu nɔɔ kaasɔ nɛ.

15 Ni di Samuel lakaalɛ Saul alɛ, "Be oso fookpee mi kubuɛ fantakatɛsɛɛ?"

Ni di Saul labuɛ alɛ, "Nsi di nimiina kplɛ kamɛ. Filisti batii kɔkpɛkoe, Yaa kafɔɔ ntɔɔkyɛ eediɛ mi. Olosinkpee mi kanya, diefe ni di Yaa ɔlaa babuɛtɛtɛ ee alaafɔ suoto. Nioso kɔlɛɛ fɔ nlɛ tɔkɔ mi lɛsaa le nimbla ni nɛ."

16 Ni di Samuel labuɛ alɛ, "Be oso di ami fɔɔkaalɛ, nunua di SAATE nwu ntɔɔkyɛ eediɛ fɔ, atookple fɔ ni lo? 17 SAATE nwu ntɔɔbla lɛsaa le aabuɛ aafenko ni di suoto nii. SAATE nwu ntoofiɛ sɛka kalekɔ nwu di nnɛɛ lɛfɔ, ɛɛyɔ ɛɛta owo lɛfɔ onwii-ɛɛta Dawid. 18 Diekye fatanu SAATE nwu ɔlaa ee fabla di ɔblɔ yakayaka nɔɔ kanya di Amalek batii suoto, oso di SAATE nwu ntɔɔbla fɔ nle mmle miɛ nɛ. 19 SAATE nwu kamayɔ banyɔ lee, Israel ku afɔ ankpee di Filisti batii nnɛɛ. Kɔsɛɛ afɔ ku babisuɔtɔbi lɛfɔ nwu kamawɛ ku ami. SAATE nwu kafɔɔ kamayɔ Israel bakpɛtɛ ankpee di Filisti batii nnɛɛ."

20 Nfanwu, Saul nianɔɔ aate wlɔlɔ kaasɔ, lɛyɛkɛ layii nwu kamɛ, ta Samuel sɛlaa nwu oso. Ɔnyɛɛ laloo nwɔ, diekye atale lɛsalɛsaa dii nwu nimuu ku kakyɛ nwu kamuu.

21 Di ɔsanko nwu lawa ni Saul nfũ, aabanya alɛ ootũtũkũ ni osie kanya, ni aabuɛ alɛ, "Nyu, kpɛmblatɛ-sanko lɛfɔ lɛkyɔɔ ɔlaa lɛfɔ kotoko. Lɛyɔ nkpa nii lɛta, lɛbla kafɔɔ lɛsaa le fɛɛtɔkɔ mi falɛ mbla nii. 22 Lekoto, nunua nu kpɛmblatɛ lɛfɔ ɔlaa, ninta fɔ alesaa awo fale, alɛ faawɛ osie fansifi osuku lɛfɔ."

23 Saul lasĩ, ni aabuɛ alɛ, "Noole."

Kafɔɔ batii nɔɔ lakyakaako ɔsanko nwu baatɔɔtɔkɔ nwɔ, ni aanu ma ɔlaa nɛ. Aataka kaasɔ aasiɛ di mpa suoto.

24 Ɔsanko nwu lawɛ lɛnankyuebi le niasiɛ ni lɛla di leyo nɔɔ, ni aapɛsɛwa aalo ni nɛ. Ni aakusii nnaafũ nwo, aanwɔtɔ ni aafiɛ bloblo wɔ manankpee ni lɛnyankasaa nɛ. 25 Ninfɛ di ɔsanko nwu layɔ aase di Saul ku batii nɔɔ katũ, ni baale nɛ. Di kakyɛ nwu, baataka baasifi.