1 Ninfɛ di Samuel latɔkɔ Israel omuu alɛ, "Ntoonu lɛsaa biala biatɔkɔ mi nii, ntoose ɔka kafɔɔ lɛta ye. 2 Kanunua nfɛ bikpe ɔka fɛ tunletɛ lee. Ami fɛ ami, ntoobe lɛkpasɔ, babisuɔtɔbi nii kafɔɔ nkpe ninfũ ku aye. Ntoole tunletɛ lee diayɔ ni di sekosopo nii diɛbase ni di dii le mmle. 3 Nnyɛɛ ninfũ. Bibuɛ bitika mi di suoto di SAATE nwu ku nnwɔ ɛɛpɛ ni ɔfɔɔ anu. Owe nankyue ntoodiyɔ? Owe bɔkɛɛ wɔ nintuka ni atoo ntoodiyɔ? Owe ntooditafaa? Owe ntoodinyinka? Owe kɔnɛɛ ntoodifũ ditunu kamɛ lɛsaa, alɛ diatɛɛ lamaasa anu nii? Nse lɛbla n-ya mmle lewo, kamata ni koto."

4 Ni baadiki kanya alɛ, "Faatatafaa ee fanyinka wo, fatafũ lɛsalɛsaa kafɔɔ di kuonwii kɔnɛɛ."

5 Ninfɛ di Samuel latɔkɔ ma alɛ, "SAATE nwu nle kamaayilatɛ di suoto lee, ku nnwɔ ɛɛpɛ ni ɔfɔɔ kafɔɔ nle kamaayilatɛ di dii le mmle, alɛ biɛnya lɛsaalɛsaa di kɔnɛɛ nii."

Ni baatuna alɛ, "SAATE nwu ninle kamaayilatɛ."

6 Ninfɛ di Samuel latɔkɔ batii nwu alɛ, "SAATE nwu niadiki Mose ku Aron, ni baakpaa bawa lee baadieko di Egipte kasɔ suoto nɛ. 7 Nunua, biyila ninfũ, diekye kamatɔkɔ ye di SAATE nwu anu ɔsaabla tinini omuu wɔ di SAATE nwu labla aata ye ni ku bawa lee.

8 "Di Yakob labuo ni Egipte sɛmaa, baawi baalɛɛ SAATE nwu alɛ akyakaako ma. Ni di SAATE nwu lakpee Mose ku Aron, baakpaa bawa lee baadieko di Egipte, ni baabasiɛsa ma di lɛba le mmle nɛ.

9 "Kafɔɔ baayee SAATE, Yaa lɛma nwu; nioso aasunsũ ma aakpee di Hasor kakpɛ kanyayilatɛ Sisera nnɛɛ ku Filisti batii ku Moab ɔka nnɛɛ, ni baakpɛko ma nɛ. 10 Baawi baalɛɛ SAATE nwu baabuɛ alɛ, ‘Buɔbla okpile; buosĩ SAATE nwu, buɔkyɛ boosumu Baal ku Astarot. Kafɔɔ nunua diki wo di balo loo nnɛɛ, bubasumu fɔ.' 11 Ninfɛ di SAATE nwu lakpee Yeru-Baal ku Barak ku Yefta ku Samuel, ni aadiki ye di balo lee nnɛɛ di lɛkyɛ biala nɛ, di mmle biasiɛ ni di atoko ɔkyɛ ole kamɛ.

12 "Kafɔɔ obe wɔ bianya bilɛ Amon batii ɔka Nahas kɔtaka ni di suoto lee, biatɔkɔ mi bilɛ, ‘Oowo, buomiɛ ɔka wɔ nimale ni sɛka di suoto loo’- nu bia di SAATE Yaa nwu niale ɔka lee. 13 Nunua nnya ɔka nwu biediki ni, nnwɔ biɛkaalɛ nii; binyu, SAATE nwu ntoose ɔka ɛɛta ye. 14 Nse biɛyɛkɛ SAATE nwu biesumu nwɔ, bienu nwɔ ɔlaa, minaataka biyila di afiofa nɔɔ suoto, nse aye ku ɔka wɔ nikole ni sɛka di suoto lee, akyuu lee anyɔ bietikanko SAATE Yaa lee nwu yi- ni dilɛ! 15 Kafɔɔ nse bienu SAATE nwu ɔlaa, biɛtaka bieyila di afiofa nɔɔ suoto, ni letoko nanfi nɔɔ kamawa di suoto lee, fɛ mmle diawa ni di bawa lee suoto.

16 "Nioso kanunua, biyila kloklo bienyu lɛsaa kplɛ le mmle di SAATE nwu kamabla ni di anu lee! 17 Diele nunua ninle akpaa ofeebee nɛ? Kamalɛɛ SAATE nwu anta kanto-okpududuu ku kanto. Ni bibatofo lɛsaa kpile le biabla ni di SAATE nwu anu, di obe wɔ biakaalɛ bilɛ bata ye ni ɔka nɛ."

18 Ninfɛ di Samuel lalɛɛ SAATE nwu di dii nwu nkpo kale, SAATE nwu lata kanto-okpududuu ku kanto nɛ. Nioso batii nwu bamuu layɛkɛ SAATE nwu ku Samuel.

19 Ni di batii nwu bamuu latɔkɔ Samuel alɛ, "Pɛ ɔlaa fata SAATE Yaa lɛfɔ nwu di bakpɛmblatɛ lɛfɔ suoto, di mmle munamakpi ni. Diekye buɔbla sikpile buɔkyakaa di sikpile loo simuu bamba suoto alɛ buɔkaalɛ bulɛ bita wo ni ɔka."

20 Ninfɛ di Samuel latɔkɔ ma alɛ, "Bitanyɛkɛ, kuntɛ bitɔɔbla lɛsaa kpile le mmle nimuu yi, bitankyi di SAATE nwu kamaa. Kafɔɔ bisumu SAATE nwu ku otu lee omuu. 21 Bitankyi biatikanko afiɔ ya ninaa ni ɔnyɛɛ. Balaafuo ye dibiene kuninwii ɔbla ɔta, ee bafuo ye odiki, diekye banaa ɔnyɛɛ. 22 Ta leyooto kplɛ nɔɔ nwu oso yi, SAATE nwu dilɔbasĩ batii nɔɔ. Diekye diabuo SAATE nwu anu alɛ ɛɛbla ye bale nwɔ bamu. 23 Ami fɛ ami, dikyɛ lookyo alɛ kabla okpile di SAATE nwu suoto alɛ kasĩ nlɛ nɔɔpɛ ɔlaa nta ye. Kamatuo ye kafɔɔ osuku wɔ ninlɛ kuɔkyɛkyɛ ni kafɔɔ. 24 Kafɔɔ binyu nwaa bilɛ biɛyɛkɛ SAATE nwu, biesumu nwɔ kafɔɔ ku onukwale ku otu lee omuu. Binyuma asaa kplɛ ya atɔɔbla ɛɛta ye ni. 25 Kafɔɔ nse bienwini biɔbla sikpile yi, ni babafiɛ aye ku ɔka lee akyuu lee anyɔ mansifiko."