1 SAMUEL 19

Saul Latikanko Dawid Alɛ Oolo

1 Ni di Saul latɔkɔ obi nɔɔ Yonatan ku bakpɛmblatɛ nɔɔ bamuu alɛ balo Dawid nɛ. Kafɔɔ Yonatan latɛ aabɔmbɔ Dawid ɔlaa. 2 Nioso Yonatan latɔkɔ Dawid alɛ, "Teemi Saul komiɛ osuku wɔ abafe anlo fɔ nii. Nioso lolaa suoto fanyu; kɔsɛɛ ku olesɛ die falaawofa di lɛba lewo. 3 Kamadie nkyɛ ninaayila ku teemi di kofe ko kamɛ fakpe nii. Kamakakatɛ di suoto lɛfɔ ntɔɔ, nintɔkɔ fɔ olele lɛnya."

4 Ninfɛ di Yonatan lalaakakatɛ di Dawid suoto nwaa aata ote Saul nɛ. Aatɔkɔ nwɔ alɛ, "Tanta ɔka labla kpɛmblatɛ nɔɔ Dawid dikpile kuninwii; aabla fɔ okpile kuonwii, lɛsaa le kafɔɔ ɛɛbla ni lɛta fɔ dibu osie kanya. 5 Aayɔ nkpa nɔɔ aata di obe wɔ aalo ni Filisti otii nwu. SAATE nwu lafũ lelenkee kplɛ aata Israel omuu. Faanya ni, suoto kafɔɔ layɔɔ fɔ. Ni obe oso falɛ fababla otii wɔ ninambla ni lɛsaalɛsaa fɛle Dawid okle dikpile, alɛ faalo nwɔ kasakasa?"

6 Saul lanu Yonatan ɔlaa, ni aaka ntam be mmle alɛ: "Nwaako, di SAATE nwu lɛnya akpe ni nkpa, blɔbalo Dawid."

7 Nioso Yonatan lalɛɛ Dawid aatɔkɔ nwɔ lɛkakatɛ nwu nimuu. Ni aakpaa nwɔ aawako Saul ɔkyɛ, ni di Dawid lawɛ ku Saul fɛ saa nɛ.

8 Obe onwii kamɛ, kakpɛ lakple kaadie, ni di Dawid lakyɛ aalaakpɛko Filisti batii nɛ. Aalo ma ku osie alɛ baatoso di anu nɔɔ.

9 Kafɔɔ ninwuna kpile le niakye ni SAATE nwu nfũ labuo di Saul suoto, di obe wɔ aaklee ni lɛkplɔ nɔɔ di kɔnɛɛ nɔɔ, aasiɛ ni di leyo nɔɔ. Obe nwu Dawid kafɔɔ latɔɔpɛ sanku. 10 Ni di Saul lamiɛ alɛ ootofo nwɔ ku lɛkplɔ nɔɔ nwu ankaasa di oyoyiɛ nɛ. Kafɔɔ Dawid latà suoto di Saul layu ni lɛkplɔ aatofo ni di oyoyiɛ. Kakyɛ nwu Dawid latoso aasifi.

11 Saul lakpee batii alɛ balaala Dawid leyo, baalo nwɔ ku olesɛ. Kafɔɔ Dawid ɔsɔfɔ Mikal latɔkɔ nwɔ alɛ, "Nse faatoso ku kakyɛ ka mmle fata nkpa lɛfɔ disi, kɔsɛɛ babalo fɔ." 12 Nioso Mikal lasoosa Dawid aafenko di sɛfle suoto, ni aatoso aasifi nɛ. 13 Ninfɛ di Mikal layɔ afiɔ aatɛ di atensaa suoto, aatĩi nya ku dibula, aayɔ tie sinwini sewo aatika di disi ninya nɛ.

14 Obe wɔ di Saul lakpee batii alɛ balaamufũ ni Dawid, Mikal latɔkɔ ma alɛ, "Oofiɛ."

15 Ninfɛ di Saul lakple aakpee batii nwu alɛ bakyɛ baalaanyu Dawid, ni, aatɔkɔ ma alɛ, "Bikpaa nwɔ di atensaa nɔɔ kamɛ biwakoe ninlo nwɔ." 16 Kafɔɔ obe wɔ di batii nwu labuo nii, afiɔ niate di atensaa suoto, tie sinwini sewo latika di disi nɔɔ.

17 Ni di Saul lakaalɛ Mikal alɛ, "Be oso fɛɛkyɔnkyɔ mi nkpo fɛɛta lo nii letoso eesifi?"

Ninfɛ di Mikal latɔkɔ nwɔ alɛ, "Aatɔkɔ mi alɛ, ‘Tɛɛ nsifi. Nse diele nkpo kamalo fɔ.ʼ "

18 Obe wɔ di Dawid latoso aasifi nii, aalaasifi Samuel nfũ di Rama aalaatɔkɔ nwɔ asaa ya amuu di Saul labla nwɔ nii. Ninfɛ di nnwɔɔ ku Samuel lasifi baalaasiɛ di Naiot nɛ. 19 Ni baatɔkɔ Saul alɛ: "Dawid nkpe di Naiot di Rama"; 20 nioso aakpee batii alɛ balaamufũ nwɔ. Kafɔɔ baanya ni ɔlaa babuɛtɛtɛ dikudi kobuɛ sɛlaa mantɛ nii, di Samuel n-yɛ ni ninfa fɛ kanyayilatɛ lɛma yi, Yaa Ninwuna labuo di Saul batii nwu suoto, mma kafɔɔ baabuɛ sɛlaa baatɛ. 21 Ni baatɔkɔ Saul nɛ, ni aakpee batii ditiɛfa, mma kafɔɔ ni baabuɛ sɛlaa baatɛ nɛ. 22 Lɛyɛntɛle, nnwɔɔ omu nɔɔ aasifi Rama, ni aakyɛ ditubiɔ kplɛ katũ di Seku nɛ. Ni aalaakaalɛ alɛ, "Ɔfɛ di Samuel ku Dawid nkpe?"

Ni baatɔkɔ nwɔ alɛ, "Bakpe di Naiot di Rama."

23 Nioso Saul lasifi Naiot di Rama. Kafɔɔ bia Yaa Ninwuna nwu labuo nwɔ di suoto. Ni aakyɛ aatoobuɛ sɛlaa aatɔɔtɛ dialaase di obe wɔ aabuo ni Naiot. 24 Aadiki akpeele nɔɔ aatɛ, ni aabuɛ sɛlaa aatɛ di Samuel anu kafɔɔ nɛ. Nkpo nwu aasiɛ kakũ ku kakyɛ kamuu nɛ. Nkpo oso di batii ankaalɛ alɛ, "Saul kafɔɔ nsi di Yaa ɔlaa babuɛtɛtɛ kamɛ?"