1 Ninfɛ di Dawid latoso di Naiot di Rama aasifi Yonatan nfũ aalakaalɛ nwɔ alɛ, "Obe lɛsaa lɛbla? Obe ninle okpile nii? Lɛ lɛbla teefɔ okpile oso oomiɛ alɛ alo mi?"

2 Ni di Yonatan ladiki kanya alɛ, "Diidii! Flɔbakpi! Nyu, teemi nimbla lɛsaalɛsaa, lɛkplɛ ee dibiibii alɛ aakpee mi kootoko. Be oso abayɔ nle mmle ankookaa mi? Diele nkpo kute!"

3 Kafɔɔ Dawid laka ntam aabuɛ alɛ, "Teefɔ n-ye nwaa alɛ fanle mi sibualɛ di anu lɛfɔ, oso eebuɛ ɛɛtɔkɔ suoto nɔɔ alɛ, ‘Diɛkaatɛ Yonatan letofo nle mmle, se diele nkpo, ababuo sɛnyaami.’ Kafɔɔ nwaako, di SAATE nwu lɛnya akpe ni nkpa, di afɔɔ fakpe ni nkpa yi, lɛkpaakyala ninwii lete ninsi di ami ku kukpi ntɛɛ."

4 Ni di Yonatan latɔkɔ Dawid alɛ, "Lɛsaa lele foomiɛ falɛ mbla, kamabla nta fɔ."

5 Nioso Dawid latɔkɔ Yonatan alɛ, "Nyu, kɔsɛɛ nimale Kɔwɛntɛ Fɔle dii ole, nse dikaatɛ alɛ kale ni alesaa ku ɔka, kafɔɔ tɛɛ nnaawofa di lepoo kamɛ dilaase di sakale kɔtɔɔfɔ. 6 Nse teefɔ diɛnyɛɛ yi, tɔkɔ nwɔ falɛ, ‘Nwaako, Dawid lakaalɛ mi osuku alɛ ootoso ankyɛ okpoo nɔɔ Betlehem. Diekye bɔɔbla lɛlɛɛ biala oleɔta ninfa manta kafaabi nɔɔ kamuu.’  7 Nse eebuɛ alɛ, ‘Dilɛ,’ ni kpɛmblatɛ lɛfɔ nkpe nkpa. Kafɔɔ nse ɔblɔ lɛfiɛ nwɔ, ni fabafũ fannu falɛ ɛɛtɛ alɛ ɔɔbla mi dikpile. 8 Afɔ yi, le kpɛmblatɛ lɛfɔ sifutulɛ. Diekye faatɔɔ aabla kanya ninii ku afɔ di SAATE nwu anu. Nse lɛbla okpile, ni lo mi afɔ omu lɛfɔ! Be oso fankpee mi di teefɔ nnɛɛ?"

9 Ninfɛ di Yonatan labuɛ alɛ, "Diidii! Nse nnu kafui nlɛ teemi komiɛ alɛ abla fɔ dikpile, ntabatɔkɔ fɔ?"

10 Ni di Dawid lakaalɛ Yonatan alɛ, "Owe nimatɔkɔ mi, nse ɔblɔ kanya di teefɔ ladiki kanya?"

11 Ninfɛ di Yonatan latɔkɔ Dawid alɛ, "Wa faata busifi lepoo nwu kamɛ." Nioso baasifi nfa banyɔ lɛma nwu.

12 Ninfɛ di Yonatan latɔkɔ Dawid alɛ, "Saate, Israel Yaa nwu ale wo kamaayilatɛ, nwaako kamawolaa teemi kanya ɔlaa sakale nuaakpa okle! Nse akpe lɛbɔmbɔ ɛɛta fɔ, naakpee otii abata fɔ letofo? 13 Kafɔɔ nse teemi lɛtɛ alɛ ɔɔbla fɔ dikpile, fiɛ ninata fɔ letofo, nta fɔ fasifi di atoko ɔkyɔ ole kamɛ yi, ni SAATE nwu ananfi mi kootoko, bia osie kanya. SAATE nwu asiɛko fɔ, fɛ mmle aasiɛko ni teemi. 14 Kafɔɔ lɛnya nkpe ni nkpa, tuomi sifutulɛ se ninaa ni kaloo fɛle SAATE nwu sele okle, di mmle manamalo mi ni. 15 Tanta sifutulɛ lɛfɔ nwu kafɔɔ labudi di leyo nii batii suoto- nse SAATE nwu ntooloo Dawid balo bamuu olo di kasɔ suoto."

16 Nioso Yonatan lanii kanya ku Dawid leyo batii aabuɛ alɛ, "Saate nwu ananfi Dawid balo kootoko." 17 Ni di Yonatan lata Dawid lase ntam ɔka di lɛbɔmbɔ nɔɔ le akpe atɔɔ ni suoto nɛ. Diekye Yonatan mbɔmbɔ Dawid fɛ mmle ambɔmbɔ ni suoto nɔɔ.

18 Ninfɛ di Yonatan latɔkɔ Dawid alɛ: "Kɔsɛɛ nimale Kɔwɛntɛ Fɔle dii ole nɛ. Babakaalɛ fɔ disi, diekye kasiɛkɔ lɛfɔ kamate kafukuti. 19 Sakale, diofe ni kɔtɔɔfɔ lebe kamɛ, kyɛ faalaawɛ di lɛba le faawofa ni di obe wɔ di dibuo le mmle lakye ni kasɔ, siɛ di difuɔ le bɔɔlɛɛ ni Esel ɔlɔɔkɔ. 20 Kamataa ataa atiɛ di ɔlɔɔkɔ nini, fɛle lɛsaa lewo kɔklapoosa. 21 Nse ntookpee osuɔtɔbi onwii lɛtɔkɔ nwɔ nlɛ, ‘Kyɛ faalawolaa ataa nwu.’ Nse lɛtɔkɔ nwɔ nlɛ, ‘Nyu, ataa nwu nte di kakyɛ lɛfɔ ka; yɔ kũ fawako ninfũ,’ ni faadie fawa. Diekye, nwaako di SAATE nwu lɛnya akpe ni nkpa, ni fakpe nkpa; okpile kuonwii nnaa nɛ. 22 Kafɔɔ nse lɛtɔkɔ osuɔtɔbi nwu nlɛ, ‘Nyu, ataa nwu nte di sitũ lɛfɔ,’ ni dikpeni feesifi. Diekye SAATE nwu niɛta fɔ feesifi. 23 Ɔlaa wɔ di ami ku afɔ buabuɛ nii- nyuma, kafɔɔ falɛ SAATE nwu ninle kamaayilatɛ di ami ku afɔ ntɛɛ dinaa ni kaloo."

24 Nioso Dawid lalaawofa di lepoo kamɛ. Ninfɛ di Kɔwɛntɛ Fɔle dii ole lawo nii, ɔka lasiɛ kaasɔ alɛ oole alesaa. 25 Asiɛ di kasiɛkɔ nɔɔ di oyoyiɛ ɔlɔɔkɔ, aakyɔɔ anu Yonatan, Abner lasiɛ aakaako Saul, kafɔɔ Dawid kasiɛkɔ late kafukuti. 26 Kafɔɔ dii nwu Saul ditabuɛ lɛsalɛsa, diekye aanyu alɛ, "Loo lɛsaa lewo niabla Dawid oso di suoto nɔɔ diɛbla klekle-nwaako suoto nɔɔ diɛbla klekle." 27 Kafɔɔ kaleesɛ, kɔwɛntɛ nwu dii nyɔɔfa, Dawid kasiɛkɔ lakple kaate kafukuti. Ninfɛ di Saul lakaalɛ obisuɔtɔbi nɔɔ Yonatan alɛ, "Be oso di Yese obisuɔtɔbi nwu diɛwa alesaa kalekɔ, bia kɔsa ee miɛ?"

28 Ni di Yonatan ladiki kanya alɛ, "Dawid lakaalɛ mi osuku osie kanya alɛ ootoso ankyɛ Betlehem. 29 Aabuɛ alɛ, ‘Tɛɛ nkyɛ, diekye leyo loo kamɛ batii kɔta oleɔta di okpoo nwu, ni di obiloo alɛ dikaatɛ alɛ lɛwɛ ninfa nɛ. Nse fabale mi sibualɛ, tɛɛ nkyɛ ninaanya babiloo.’ Nkpo oso ananwa ɔka alesaa kalekɔ nɛ."

30 Saul lanya ɔblɔ aakpeeko Yonatan aatɔkɔ nwɔ alɛ, "Afɔ ɔsanko laatɛ ku tokopĩtɛ obisuɔtɔbi! Nin-ye nlɛ fɛɛbla onwii ku Yese obisuɔtɔbi fɛɛta sinunsɔ lɛfɔ simu ku yaafɔ wɔ nialofo fɔ ni sinunsɔ? 31 Di Yese obisuɔtɔbi nwu lɛnya akpe ni nkpa di kasɔ ka mmle suoto, afɔ ee sɛka kalekɔ lɛfɔ dilɔbayila. Nioso kpee baalaakpaa nwɔ bawakoe, diekye dikpeni eekpi!"

32 Ninfɛ di Yonatan lakaalɛ ote alɛ, "Be oso baalo nwɔ? Obe ɛɛbla?" 33 Kafɔɔ Saul layu lɛkplɔ nɔɔ aakpee nwɔ alɛ oolo nwɔ. Nioso Yonatan latofo alɛ ote lɛtɛ alɛ oolo Dawid.

34 Ni di Yonatan lataka di alesaa nwu kalekɔ ku ɔblɔ yakayaka nɛ. Di kɔwɛntɛ nwu dii nyɔɔfa suoto atale alesaa, diekye aabuo sɛnyaami ta ote anunsɔsaa ya ɔɔbla ni Dawid oso.

35 Yonatan ladie ku olesɛ aafe lepoo nwu kamɛ alɛ bɔɔlaakpee asi baawo ku Dawid. Aaklee osuɔtɔbi onwii, 36 ni aatɔkɔ osuɔtɔbi nwu alɛ, "Toso faalaawolaa ataa ya lɛtaa ni." Di osuɔtɔbi nwu kotoso nii, aataa ataa nwu di sitũ nɔɔ. 37 Obe wɔ di osuɔtɔbi nwu ladu ni lɛba le di Yonatan kɔtaa nwu lanɔɔ nii, Yonatan lakaalɛ nwɔ alɛ, "Diele kɔtaa nwu ninte fɔ siitũ nɛ?" 38 Ni di Yonatan lafaa aabuɛ alɛ, "Pɛsɛwa! Kyɛ wla! Tan-yila!" Nioso osuɔtɔbi nwu layɔ kɔtaa nwu aakple aawa saate nɔɔ nfũ. 39 (Osuɔtɔbi nwu ditatofo nle mmle kuniwii; Yonatan ku Dawid lete niatofo.) 40 Ninfɛ di Yonatan layɔ akpɛsaa nɔɔ aata osuɔtɔbi nwu aatɔkɔ nwɔ alɛ, "Tɔɔkyɛ, tuka nya fasifiko okpoo."

41 Di osuɔtɔbi nwu lasifi ni kamaa, Dawid lataka di difuɔ nwu kala kasɔ, ni aawakasɔ di Yonatan anu sitiɛ, aase katũ nɔɔ kaasɔ nɛ. Ni baafĩfiɔ bawo akpoo, baawi kaku banyɔ lɛma- kafɔɔ Dawid lawi aalenkee.

42 Ninfɛ di Yonatan latɔkɔ Dawid alɛ, "Tɔɔkyɛ di atoko ɔkyɛ ole kamɛ, diekye buɔka ntam di basiɛwo ole suoto buɔta bawo di SAATE nwu leyooto kamɛ buobuɛ bulɛ, ‘SAATE nwu ninle kamaayilatɛ di afɔ ku ami ntɛɛ, ku banantii lɛfɔ ku banantii nii ntɛɛ dinaa ni kaloo.’ " Ninfɛ di Dawid lasifi nɛ, Yonatan kafɔɔ lakple aasifi okpoo.