1 Di Saul lalaakpɛko Filisti batii aakple aawa ni kamaa, baatɔkɔ nwɔ alɛ, "Dawid nkpe di En Gedi Ɔfaafuu." 2 Nioso Saul ladiki bakpɛtɛ nkpe ntiɛ di Israel omuu kamɛ, aakpaa ma alɛ bɔɔlaawolaa Dawid ku batii nɔɔ di lɛba le bɔɔlɛɛ ni Lepoo Batie Difuɔnkpaa ɔlɔɔkɔ.

3 Aabadu afoso-yo le niawɛ ni di osuku-lɔɔkɔ; ofuɔntuu onwii late ninfa, ni di Saul labuo aalaakyɛ ɔlɔɔkɔ nɛ. Dawid ku batii nɔɔ lawɛ di ofuɔntuu nwu kamɛ sɛɛmaa fanfa. 4 Ninfɛ di Dawid batii nwu labuɛ alɛ, "Nle mmle ninle dii le suoto di SAATE nwu lakakatɛ ni di obe wɔ aatɔkɔ fɔ ni alɛ, ‘Kamayɔ lo lɛfɔ nkpee fɔ ni ninnɛɛ alɛ faabla nwɔ nle ninlɛ fɔ ni nɛ.’ "Ni di Dawid lamaa buɛɛ aalaabudi Saul akpeele wua nwu kotokosi nɛ.

5 Nni kamaa, diabuo Dawid suoto alɛ aabudi Saul akpeele kotokosi. 6 Ni aatɔkɔ batii nɔɔ alɛ, "Saate nwu atanta labla saate nii lɛsaa kpile kuninwii, nnwɔ suoto di SAATE nwu lɛpɛ ni ɔfɔɔ ee ntakatɛsa kɔnɛɛ nii di suoto nɔɔ. Diekye nnwɔ di SAATE nwu lɛpɛ ni ɔfɔɔ ale." 7 Ku sɛlaa se mmle oso, Dawid lasĩ ɔlaa aata batii nɔɔ, atata ma osuku baakpɛko Saul. Ni di Saul ladie di ofuɔntuu nwu kamɛ aasifi osuku nɔɔ nɛ.

8 Ninfɛ di Dawid ladie di ofuɔntuu nwu kamɛ, ni aalɛɛ Saul alɛ, "Ɔka, saate nii!" Di Saul lamunikĩi aanyu ni sɛmaa nɔɔ, Dawid niawakosa suoto kasɔ, aase katũ nɔɔ kaasɔ nɛ. 9 Ni aatɔkɔ Saul alɛ, "Be oso fannu batii sɛlaa se boobuɛ ni alɛ, ‘Dawid komiɛ alɛ aabla fɔ ni dikpile’? 10 Miɛ dii le mmle fatɔɔnya ku anu lɛfɔ amu mmle di SAATE nwu ntoodiki fɔ eekpee ni di nnɛɛ nii di ofuɔntuu nwu kamɛ. Batii bawo alɛ nlo fɔ, kafɔɔ lediɛ fɔ; ni labuɛ nlɛ, ‘Namatakatɛsa kɔnɛɛ nii di saate nii suoto, diekye nnwɔ di SAATE nwu lɛpɛ ni ɔfɔɔ ale.’ 11 Nyu, Teete nii, nyu akpeele lɛfɔ kakyɛɛ ka mmle di kɔnɛɛ nii! Labudi akpeele lɛfɔ kotokosi, kafɔɔ ntalo fɔ. Nunua nu kasɔ faatofo kafɔɔ falɛ ninkpi lɛpɔɔ di okpile ɔbla ee ɔtaka oyila suoto. Nimbla fɔ okpile, kafɔɔ fɔɔkpɛ mi falɛ foolo mi. 12 SAATE nwu aka ata ami ku afɔ. SAATE nwu kafɔɔ ata fɔ koto di asaa kpile ya fatɔɔbla mi ni suoto. Kafɔɔ kɔnɛɛ nii dilɔbakpanko fɔ. 13 Fɛ mmle di banɔɔfo lebuɛ nii alɛ, ‘Kpileblatɛ nfũ di sikpile ole nkyɛ,’ nioso kɔnɛɛ nii dilɔbakpanko fɔ.

14 "Owe suoto di Israel ɔka nwu ledie ɛɛwa? Owe fatikanko foowalaa? Weewee wɔ niekpi ni? Ee nyɔ? 15 SAATE nwu ale kantɛ ata wo, aabuɛ nwu kafɔɔ ata wo. Abuo di ɔlaa nii kamɛ, aabuɛ nwu; aatɛɛ lɛbɛ, aadiki mi di nnɛɛ lɛfɔ."

16 Di Dawid laloo ni ɔlaa wɔ mmle obuɛ, Saul lakaalɛ nwɔ alɛ, "Obi nii Dawid, sɛlɔ lɛfɔ nɛ?" Ni di Saul lawi kaku osie kanya nɛ. 17 Ni aatɔkɔ Dawid alɛ, "Fɛɛtɛ fɛɛbla tinini falenke mi. Feelolaa mi fɛɛbla nwaa, kafɔɔ ami lɛbla fɔ dikpilesa osie kanya. 18 Kanunua nwu fɔɔtɔkɔ mi dibiene le fɛɛbla mi ni nɛ; SAATE nwu lediki mi eekpee di nnɛɛ lɛfɔ, kafɔɔ faalo mi. 19 Nse otii lɛnya lo nɔɔ, andiɛ nwɔ ansifi alɛ aablɔɔ dikpilesaa? SAATE nwu ata fɔ letota biene, di mmle kanya fɛɛbla mi ni miɛ. 20 N-ye nlɛ nwaako fabale ɔka, nnɛɛ lɛfɔ kamɛ kafɔɔ babatɛ Israel sɛka kalekɔ nwu nɛ. 21 Nunua, ka ntam fatɛɛ di SAATE nwu suoto falɛ, flɔbabudi banantii nii fayu ee fayɛɛsa leyooto nii di teemi leyo batii kamɛ."

22 Nioso Dawid laka ntam aata Saul. Ninfɛ di Saul lakple aasifi leyo nɛ. Kafɔɔ Dawid ku batii nɔɔ lakata baasifi ofuɔntuu lɛma nwu.