1 Di Filisti batii lafũ ni Yaa lɛlakaa nwu sɛmaa, baayɔ ni di Ebeneser baasifiko Asdod. 2 Ninfɛ baatuka lɛlakaa nwu baalaabuoko di Dagon afiɔ olekatakɔ, baayɔ ni baase di Dagon afiɔ ɔlɔɔkɔ. 3 Di Asdod batii lataka ni kaleesɛ kuyitatũ yi, baanya alɛ Dagon nwu lanɔɔ, anu nɔɔ nfuu kaasɔ di SAATE nwu lɛlakaa anu! Ni baayɔ Dagon baakplesa baase di kayilakɔ nɔɔ nɛ. 4 Kafɔɔ kaleesɛ oyita, obe wɔ baataka nii, baanya alɛ Dagon lanɔɔ, anu nɔɔ nfuu kaasɔ di SAATE nwu lɛlakaa anu! Disi ku nnɛɛ lafefee diate di kayokontũ; suoto nɔɔ lete niabu. 5 Nioso diɛbase bia miɛ dii le mmle Dagon olebatatɛ ee otii lele niebuo Dagon olekatakɔ nwu di Asdod ninafu kayokontũ nwu.

6 SAATE nwu letoko nanfi lawɛ osie di Asdod batii ku batii ba niasiɛ ni di ɔlɔɔkɔ lɛma suoto. Aata difu lapɛ ma, ni aata kawɔɔ ku adiesaa lawa ma di suoto nɛ. 7 Di Asdod batii lanya ni lɛsaa le nikɔwa nii, ni baabuɛ alɛ, "Diɛkaatɛ Israel batii afiɔ lɛlakaa nwu n-yila di ɔkyɛ loo. Diekye letoko nanfi nɔɔ nkpe osie di awo ku afiɔ loo Dagon suoto." 8 Nioso baalɛɛ Filisti batii batunletɛ bamuu baasiisa baakaalɛ ma alɛ, "Obe bubablako Israel afiɔ lɛlakaa nwu?"

Ni baadiki kanya alɛ, "Bita bakyisa Israel afiɔ lɛlakaa nwu basifiko Gat." Nioso baakyisa Israel Yaa nwu lɛlakaa baasifiko nfa.

9 Kafɔɔ baakyisa ni baasifiko ni nfa, SAATE nwu letoko nanfi lawa di Gat okpoo nwu suoto, aata difu kplɛ labuo nwu kaamɛ. Aata adiesaa ladidie batii nwu di okpoo nwu, babisɔ ku banɔɔfo akyuu lɛma anyɔ. 10 Nkpo oso baayɔ Yaa lɛlakaa nwu baasifiko Ekron.

Di Yaa lɛlakaa nwu latoobuo ni Ekron, Ekron batii lafaa baabuɛ alɛ, "Batɔɔyɔ Israel afiɔ lɛlakaa bɛɛwako ɔkyɛ loo alɛ abalo wo ku batii loo." 11 Nioso baalɛɛ Filisti batii batunletɛ bamuu baasiisa baatɔkɔ ma alɛ, "Biyɔ Israel afiɔ lɛlakaa nwu bisifiko; bita ni disifi kayilakɔ nini nimu, se diele nkpo dibalo wo ku batii loo." Diekye kukpi ntooyii okpoo kplɛ nwu ku lɛyɛkɛ. Yaa letoko nanfi latɛ diawɛ osie niinwu suoto. 12 Mba nitakpi nii, adiesaa ladidie ma, ni di okpoo kplɛ nwu lɛfaa lakata diasifi Yaa nfũ di osi nɛ.