1 Kafɔɔ Dawid labuɛ aatɔɔkɔ suoto nɔɔ alɛ, "Dii lewo di ayi ya mmle kamɛ Saul kɔnɛɛ kamalo mi. Lɛsaa le lete kamafuo ni ɔbla ninle alɛ kamatoso nsifi Filisti batii kasɔ suoto. Ni Saul kamadiɛ mi owolaa di kakɔ biala di Israel, ni kamadie di nnɛɛ nɔɔ."

2 Nioso Dawid ku batii alafa akuɔ ladie baasifi Gat ɔka, Maok obisuɔtɔbi Akis nfũ. 3 Ni di Dawid ku batii nɔɔ lasiɛ di Gat ku Akis nɛ. Osuɔtɔ biala leyo batii lawɛ di ɔkyɛ nɔɔ. Dawid lawɛ basɔfɔ nɔɔ banyɔ: Ahinoam wɔ niakye ni Yesreel ku Abigail wɔ niakye ni Karmel, Nabal kpisɔfɔ nwu. 4 Obe wɔ baatɔkɔ ni Saul alɛ Dawid ntootoso eesifi ni Gat, aadiɛ nwɔ owowolaa.

5 Ninfɛ di Dawid latɔkɔ Akis alɛ, "Nse faale mi sibualɛ di anu lɛfɔ, ni faata batɛɛ lɛba di kale nwu sekpoo onwii kamɛ, alɛ kasiɛ ninfa. Lɛ nfɛ di kpɛmblatɛ lɛfɔ kasiɛ di ɔka okpoo kplɛ kamɛ ku afɔ?"

6 Nioso dii nwu nkpo, Akis layɔ Siklag aatɔɔ. Nkpo oso Siklag lakple Yuda baka okpoo bia miɛ. 7 Dawid lasiɛ di Filisti batii kasɔ lɛlɛɛ ku awɛntɛ ana.

8 Ninfɛ di Dawid ku batii nɔɔ lakata baakyɛ baalaadieko Gasur batii, Girsi batii ku Amalek batii nɛ. (Diayɔ ni di okofobee, batii ba mmle lasiɛ di kasɔ ka nialaadu ni Sur ku Egipte.) 9 Nse Dawid ledieko lɛba lewo, ann-diɛ osuɔtɔ ee ɔsanko kuonwii asiɛ nkpa. Kafɔɔ an-yɔ bafoso ku banankyue, babɔkɛɛ ba nintuka ni atoo, kapu bapɔnkɔ ku akleesaa lɛma. Nse atookple eesifi Akis.

10 Nse Akis lɛkaalɛ alɛ, "Ɔfɛ fɛɛkyɛ fɛɛlaadieko miɛ? Dawid mbuɛ alɛ, "Lɛlaadieko Yuda Kala kasɔ" ee "Yerahmeel Kala kasɔ" ee "Keni batii Kala kasɔ." 11 Atadiɛ osuɔtɔ ee ɔsanko ku nkpa aakpaa awako Gat, diekye aanyu alɛ, "Lo bababuɛ suoto loo ɔlaa alɛ, 'Nnya lɛsaa le di Dawid lɛbla ni.’ " Nkpo kafɔɔ aatɔɔbla di obe wɔ aasiɛ ni di Filisti batii kasɔ nɛ. 12 Akis lafũ Dawid aanu ni aatɔkɔ suoto nɔɔ alɛ, "Atootuudi batii nɔɔ, Israel batii oso, abakple kpɛmblatɛ nii dinaa ni kaloo."