1 Ninfɛ di Samuel ɔlaa nwu laladu Israel omuu nɛ.

Ni di Israel batii ladie baalaakpɛko Filisti batii nɛ. Israel batii lasi di Ebeneser, Filisti batii kafɔɔ lasi di Afek. 2 Filisti batii ladiki bakpɛtɛ lɛma baalaakyakako Israel, di kakpɛ nwu kanya lawɛ ni osie, Filisti batii lalenkee Israel. Baalo Israel batii fɛle nkpe nna di kakpɛ nwu kamɛ. 3 Obe wɔ di bakpɛtɛ nwu lakple baawa ni kasiɛkɔ lɛma, Israel banɔɔfo lakaalɛ alɛ, "Obe oso di SAATE nwu lɛta beelenkee wo miɛ di Filisti batii anu? Bita budieko SAATE nwu kanya ninii lɛlakaa nwu di Silo, alɛ diatikanko wo, nindiki wo kafɔɔ di balo loo nnɛɛ."

4 Nioso bakpɛtɛ nwu lakpee batii baakyɛ Silo, ni baalaakplesa SAATE wɔ Ninlenke ni, oole ni sɛka di kerubim obo, kanya ninii lɛlakaa nwu baawako nɛ. Eli babisuɔtɔbi banyɔ nwu, Hofni ku Finehas kafɔɔ lawɛ ninfa ku Yaa kanya ninii lɛlakaa nwu.

5 Obe wɔ di SAATE nwu kanya ninii lɛkaa lababuo ni kasiɛkɔ nwu, Israel batii bamuu layiisa kudu osie kanya diata alɛ kasɔ latũkũ. 6 Filisti batii lanu kudu nwu, ni baakaalɛ alɛ, "Obe ninle kudu ko mmle dudu di Hebri batii kasiɛkɔ nwu?"

Obe wɔ baanu ni alɛ SAATE nwu kanya ninii lɛkaa nintɔɔwa ni kasikɔ nwu yi, 7 Filisti batii layɛkɛ. Ni baabuɛ alɛ, "Afiɔ ntɔɔwa kasiɛkɔ nwu, nfɛ busi di ɔlaa! Lɛsaa le mmle okle diiwa diidii. 8 Buyɔɔsa! Owe nimadiki wo di afiɔ kplɛ ya mmle nnɛɛ? Nnya ninle afiɔ ya niapɛ ni Egipte batii ku sifiɛ kpile ateate di ɔfaafuu nwu kamɛ nɛ. 9 Filisti batii biwɛ osie! Bile basuɔtɔ, nse diele nkpo bibale balanle minta Hebri batii, fɛ mmle batoodile bɛɛta ye nii. Bile basuɔtɔ, biɛkpɛ!"

10 Nioso Filisti batii lakpɛ, ni baalenkee Israel batii nɛ, otii biala latoso aasifi lɛkpaayo nɔɔ. Mba baalo ni latɛ baapɔ; Israel bakpɛtɛ ba ninkyɛ ni ninkpaa nkpe afosi-atiɛ baalo. 11 Filisti batii lafũ Yaa lɛlakaa nwu, Eli babisuɔtɔbi banyɔ nwu, Hofni ku Finehas kafɔɔ lakpi.

12 Di dii nwu nkpo kale, Benyamin otii onwii latoso di kakpɛ kanya aasifi Silo. Akpeele nɔɔ labɛbɛɛ, kudu kafɔɔ latika nwɔ diisi. 13 Obe wɔ aabuo nii, Eli lasiɛ di lekpomii nɔɔ di osuku kotoko aatoonyu, diekye otu nɔɔ latɔɔyɛkɛ kuatɔɔta Yaa lɛlakaa nwu. Obe wɔ di osuɔtɔ nwu labuo ni okpoo, aabuɛ ni lɛsaa le niawa nii, okpoo omuu lafaa kaku.

14 Eli lanu kaku nwu, ni aakaalɛ alɛ, "Kudú nwu nkpo kasɔ mɔ?"

Ni di osuɔtɔ nwu lapɛsɛwa aaladu Eli 15 wɔ nintoofũ ni alɛɛ afosi-anaasĩ-anɛ, anu kafɔɔ ntoobiɛ nwɔ oso oloosinnya. 16 Ni aatɔkɔ Eli alɛ, "Kanunua ntookye kakpɛ kanya lɛwa nɛ; letoso kakpɛ di miɛ dii le mmle."

Ni di Eli lakaalɛ alɛ, "Obisuɔtɔbi nii, obe niɛwa?"

17 Ninfɛ di osuɔtɔ wɔ niawako ni kanya labuɛ alɛ, "Israel letoso di Filisti batii anu, bakpɛtɛ kpinwu lɛnɔɔ. Ni kafɔɔ babisuɔtɔbi lɛfɔ banyɔ nwu, Hofni ku Finehas lekpi. Beefũ kafɔɔ Yaa lɛlakaa nwu."

18 Obe wɔ aalɛɛ ni Yaa lɛlakaa nwu, Eli nianɔɔ sɛmaa, sɛmaa di lekpomii nɔɔ di kayoko nwu ɔlɔɔkɔ. Simu nɔɔ lafee, ni aakpi nɛ. Diekye ɔnɔɔfo benne aale, aawɛ onutũ kafɔɔ. Aaleko Israel katũ alɛɛ afosi-ana.

19 Eli obi-sɔfɔ, Finehas ɔsɔfɔ lalaka lɛmɛ di olofobee nɔɔ kafɔɔ ntɔɔtɛɛtɛɛ nii. Obe wɔ aanu ni ɔlaa nwu alɛ beefũ ni Yaa lɛlakaa nwu, di ɔsa-nɔɔ-ote ku ɔsa ntookpi nii, kolofo lanu nwɔ, ni aalofo nɛ, kafɔɔ aakpi ta kolofo dibuo oso. 20 Aatookpi nii, basanko ba niatoolofosɔɔ ni labuɛ alɛ, "Tan-yɛkɛ; fatoolofo obisuɔtɔbi." Kafɔɔ atatuna ee akpanko suoto.

21 Aatika obi nwu leyooto alɛ Akabod*, aabuɛ alɛ, "Lɛkpa ntoodie di Israel"- ta mmle beefũ ni Yaa lɛlakaa nwu ku ɔsa-nɔɔ-ote ku ɔsa kukpi oso. 22 Aabuɛ alɛ, "Lɛkpa nwu ntoodie di Israel kamɛ, diekye batoofũ Yaa lɛlakaa nwu."