1 SAMUEL 14

Yonatan Disuɔtɔsaa Ɔbla

1 Dii ninwii Saul obisuɔtɔbi Yonatan latɔkɔ okosopo wɔ ninkle nwɔ ni akpɛsaa alɛ, "Wa buɔkyɛ Filisti batii kasikɔ di kakyɛ ka nyɔɔfa." Kafɔɔ atatɔkɔ ote.

2 Saul lasiɛ di Gibea kasukunya di blɔfɔ akotɔa kowoso kunwii kalɔ di Migron. Basuɔtɔ fɛ alafa-akuɔ lawɛ di ɔkyɛ nɔɔ. 3 Ahiya lasiɛ ma kaamɛ aakpee simu akpeele. Ahiya ote niale Ikabod obilɛma-suɔtɔbi Ahitub obisuɔtɔbi, ote niale Pinehas wɔ di ote niale ni Eli wɔ niale ni SAATE nwu oletatɛ di Silo nɛ. Otii kuonwii ditatofo alɛ Yonatan ntoosifi.

4 Kɔwɛ lawɛ di osuku nkyɛ nwu nnyɔ be di Yonatan latɛ alɛ ɔɔwaalɛ anfe anaadu ni Filisti batii kasikɔ; kɔwɛ nwu kunwii leyooto niale Boses, kɔnyɔɔfa niale Sene. 5 Kɔwɛ nwu kunwii lawɛ di katoo-kasɔ diofe ni Mikmas, kɔnyɔɔfa kafɔɔ lawɛ di kala-kasɔ diofe ni Geba.

6 Yonatan latɔkɔ okosopo akpɛsaa-kleetɛ nɔɔ alɛ, "Wa buɔkyɛ mba ninankyɛlɛnsa ni suoto kasikɔ. Loobia SAATE nwu kamadiki kɔkpaa anta wo. Lɛsalɛsaa dilɔbafuo SAATE nwu osuku di odiki loo suoto, kuntɛ batii kpinwu ee basɛɛ."

7 Ni di akpɛsaa-kleetɛ nɔɔ latɔkɔ nwɔ alɛ, "Bla nle nimuu ninsi fɔ ni diisi kamɛ, bla ni; amii ntikanko fɔ ku otu ku ɔkla nii."

8 Ninfɛ di Yonatan labuɛ alɛ, "Ni wa; bubawaalɛ munfe batii nwu lɛkyɛ munta ma manya wo. 9 Nse bɛɛtɔkɔ wo alɛ, ‘Biyila ninfa dilaase di obe wɔ buɔwa ni ɔkyɛ lee,’ bubasiɛ di lɛba le bukpe ni, ni bulɔbakata bukyɛ ɔkyɛ lɛma. 10 Kafɔɔ nse beebuɛ alɛ, ‘Bikata biwa ɔkyɛ loo,’ni bubakata munkyɛ, diekye nni nimale wo dituosaa alɛ SAATE nwu ntɔɔyɔ ma eekpee wo ninnɛɛ nɛ."

11 Nioso banyɔ lɛma nwu ladiki suoto lɛma baatuo di Filisti batii kasikɔ nwu. Ni di Filisti batii nwu labuɛ alɛ, "Binyu! Hebri batii nwu kɔkpɔkɔ mandie di atuɛ ya kamɛ baawofa nii." 12 Ninfɛ di kasikɔ nwu batii lafaa baatɔkɔ Yonatan ku akpɛsaa-kleetɛ nɔɔ alɛ, "Bikata biwa ɔkyɛ loo, bubatuo ye lɛsaa."

Nioso Yonatan latɔkɔ akpɛsaa-kleetɛ nɔɔ alɛ, "Kata fatikankoe; SAATE nwu ntɔɔyɔ ma eekpee di Israel nnɛɛ."

13 Yonatan layɔ nnɛɛ ku nkpaa nɔɔ aakata aasifi, akpɛsaa-kleetɛ nɔɔ kafɔɔ latikanko nwɔ sɛmaa. Filisti batii lanɔɔnɔɔ di Yonatan katũ, ni di akpɛsaa-kleetɛ nɔɔ latikanko nwɔ sɛɛmaa aatoolo ma nɛ. 14 Di kakpɛ nwu kasale kamɛ, Yonatan ku akpɛsaa-kleetɛ nɔɔ lalo batii afosi-anyɔ bawo, di obo wɔ niate ni fɛle ekũ ɛnɔɔ okle.

Israel Lalenkee Filisti Batii

15 Ninfɛ di difu lapɛ bakpɛtɛ bamuu-mba di kasikɔ nwu ku afe, ku mba di nsikɔ nwu ku sikuma bataatɛ akudi- ku kasɔ nwu latũkũ nɛ. Diale difu le di Yaa lakyesee nii.

16 Ni di Saul asaa banyuntɛ di Gibea di Benyamin kasɔ suoto lanya Filisti bakpɛtɛ kototoso manfe di sisuku simuu suoto nɛ. 17 Ninfɛ di Saul latɔkɔ batii ba niawɛ ni di ɔkyɛ nɔɔ alɛ, "Bika bakpɛtɛ nwu bienyu bawe niedie wo kaamɛ." Baaka ni nkpo, Yonatan ku akpɛsaa-kleetɛ nɔɔ nintawɛ.

18 Ni di Saul latɔkɔ Ahigya alɛ, "Yɔ Yaa lɛlakaa nwu fawako." (Di obe nwu kamɛ diawɛ di Israel batii ɔkyɛ.) 19 Di Saul latɔɔkakatɛko ni oletatɛ nwu yi, kudu kanya latɔɔtaka katoo osie kanya di Filisti batii kasikɔ nwu kamɛ. Nioso Saul latɔkɔ oletatɛ nwu alɛ, "Kplesa kɔnɛɛ lɛfɔ."

20 Ninfɛ di Saul ku batii nɔɔ bamuu lasi, ni baasifi kakpɛ nɛ. Baanya alɛ Filisti batii latɛ baakpɔkpɔtɔ, baatɔɔsasafɔ bawo ku mpamii lɛma. 21 Hebri batii ba niakata baasifi baalaawɛ ni ku Filisti batii ɔkyɛ di nsikɔ lɛma saa, lasifi Israel batii ba niawɛ ni di Saul ku Yonatan ɔkyɛ. 22 Obe wɔ di Israel batii ba niawofa ni di Efraim kale lekpenkpe lanu alɛ Filisti batii kotoso nii, baalaakyakaa di Israel batii suoto baatikanko ma osie kanya. 23 Nioso SAATE nwu ladiki Israel di dii nwu nkpo, ni baakpɛ kakpɛ nwu baawaalɛ Bet Awen nɛ.

Sɛsaabla Di Kakpɛ Nwu Sɛmaa

24 Dii nwu nkpo, Israel batii lasiɛ di nimiina kamɛ. Diekye Saul layɔ batii nwu aakpee di ntam kalɔ aabuɛ alɛ, "Lɛkpaani kamatikanko otii lele niele alesaa fiɛ di kɔtɔɔfɔ lewo, fiɛ di ami omu lɛbla balo nii lekyisa!" Nioso bakpɛtɛ nwu kuonwii ditatu alesaa.

25 Ninfɛ di Israel bakpɛtɛ nwu bamuu labuo di lepoo ninwii kamɛ, ni baanya bablɔ nte kaasɔ nɛ. 26 Obe wɔ baakyɛ ni di lepoo nwu kamɛ, baanya alɛ bablɔ kodie, kafɔɔ kuonwii ditakpanko aakpee di kanya nɔɔ. Diekye baatɔɔyɛkɛ ntam nwu. 27 Kafɔɔ Yonatan ditanu alɛ ote layɔ ntam aanii batii nwu, nioso aayɔ ɔkyɛnwoso nɔɔ nwu aakpee di bablɔ kaflɛ kamɛ. Ni aatakatɛ kɔnɔɔ nɔɔ aakpee kaanya, ni di anu nɔɔ lakpa nɛ. 28 Ninfɛ di kpɛtɛ onwii latɔkɔ Yonatan alɛ, "Teefɔ lɛyɔ ntam eenii bakpɛtɛ nwu osie kanya aabuɛ alɛ, ‘Lɛkpaani kamatikanko otii lele niele alesaa miɛ!’ Nkpo oso di batii ntookpiɛkpiɛ nɛ."

29 Ni di Yonatan labuɛ alɛ, "Teemi ntɔɔta dibuo di kale nwu suoto. Nyu mmle di anu nii lɛkpa ni, di obe wɔ letu ni bablɔ ba mmle kafuii. 30 Nyu mmle ditabalɛ ninta ni batii nwu miɛ, nse fɛ manle asaa ya beefũ ni di balo lɛma nwu nfũ. Nse Filisti batii ba buolo di dilɔbapɔ bia balenkee?"

31 Dii nwu nkpo, di Israel batii lalo ni Filisti batii, diayɔ ni di Mikmas dialaadu ni Ayalon, diabuo Israel batii nwu. 32 Ni di bakpɛtɛ nwu latu baabuo di Filisti batii asaa suoto, baasasafɔ bafoso, banankyue ku anankyuebi, baawee ma baakpɔtɔɔsa ku ntɔ. 33 Ninfɛ di otii onwii latɔkɔ Saul alɛ, "Nyu lo, batii nwu kɔbla okpile di SAATE nwu suoto ku sina se di ntɔ nsi ni owee."

Ni aabuɛ alɛ, "Bitɔɔlalaasa ofũ-onu nwu, bimunusa difuɔ kplɛ bitɛ ninfũ wla." 34 Ninfɛ di Saul latɔkɔ ma alɛ, "Bitɔɔkyɛ batii nwu kamɛ biɛlaatɔkɔ ma bilɛ, ‘Obiala lee biyɔ banankyue ku bafoso lee biwakoe, biɛbalo ma ninfũ biwee. Bitambla okpile di SAATE nwu suoto alɛ biawee sina se di ntɔ lekple disi sĩ ni kaamɛ.’ "

Nioso otii biala layɔ nankyue nɔɔ aawako ku kakyɛ nwu aabalo ninfa. 35 Ninfɛ di Saul lapɛ oleɔta akyikye aata SAATE nwu; nni niale lɛkasale aabla ni nkpo nɛ.

36 Ni di Saul labuɛ alɛ, "Bita busoo buotikanko Filisti batii nwu ku kakyɛ ka mmle, buɔyɔ ma asaa dilaase koolesɛtũ. Bitanta buadiɛ kuonwii lɛma kafɔɔ asiɛ nkpa."

Ni di batii nwu ladiki kanya alɛ, "Bla lɛsaa le feenyu falɛ dilɛ dita fɔ ni."

Kafɔɔ oletatɛ nwu labuɛ alɛ, "Bita buwolaa kamɛ di Yaa nfũ ninfũ."

37 Nioso Saul lakaalɛ Yaa alɛ, "Nsoo nkyɛ ninaakpɛko Filisti batii? Fabayɔ ma fankpee di Israel batii nnɛɛ?" Kafɔɔ dii nwu nkpo Yaa ditatuna aatɔɔ.

38 Nioso Saul labuɛ alɛ, "Biwa ninfũ, aye ba bamuu ninle ni bakpɛtɛ batunletɛ, biɛta buwolaa okpile wɔ buɔbla ni miɛ. 39 Nwaako, di SAATE wɔ nindiki ni Israel lɛnya akpe ni nkpa, bia kuntɛ obisuɔtɔbi nii Yonatan nfũ diekye, dikpeni eekpi." Kafɔɔ otii kuonwii ditabɛ kanya.

40 Saul nfɛ latɔkɔ Israel bakpɛtɛ batunletɛ nwu bamuu alɛ. "Aye biyila ninfa; ami ku obisuɔtɔbi nii Yonatan bubayila ninfũ."

Ni di bakpɛtɛ batunletɛ nwu ladiki kanya alɛ, "Bla lɛsaa le feenyu falɛ diɛtɛ dilɛ dita fɔ ni."

41 Ninfɛ di Saul lapɛ ɔlaa aata SAATE, Israel Yaa nwu alɛ, "Diki kanya biene fatɛɛ." Ni di atrebi owii nwu latika di Yonatan ku Saul suoto nɛ, batii nwu ladie kaamɛ. 42 Ninfɛ di Saul labuɛ alɛ, "Biwii atrebi di ami ku obisuɔtɔbi nii Yonatan ntɛɛ." Ni diatika di Yonatan suoto nɛ.

43 Ninfɛ di Saul latɔkɔ Yonatan alɛ, "Tɔkɔ mi lɛsaa le fɛɛbla ni."

Nioso Yonatan latɔkɔ ote alɛ, "Otù ko latu bablɔ kɛɛkɛɛ ku ɔkyɛnwoso nii ɔnya. Ni nunua, dikpeni lekpi?"

44 Ni di Saul labuɛ alɛ, "Yaa ananfi mi kootoko, bia ditɛ diwɛ osie, Yonatan, nse faakpi."

45 Kafɔɔ bakpɛtɛ batunletɛ nwu latɔkɔ Saul alɛ, "Yonatan akpi- di nnwɔɔ nintɔɔwako ni didiki kplɛ le mmle di Israel? Diidii! Nwaako, di SAATE nwu lɛnya akpe ni nkpa, onwini nɔɔ kuonwii dilɔbakpa kupɛ kaasɔ. Diekye ɛɛbla nle mmle miɛ ku Yaa lɛkyakaako." Nioso batii nwu ladiki Yonatan, batansinlo nwɔ.

46 Ninfɛ di Saul ladiɛ Filisti batii nwu otikanko, ni baakple baasifi kasɔ lɛma kamu suoto nɛ.

Saul Sɛka Ole Ku Leyo Nɔɔ Batii

47 Di Saul labale ni sɛka di Israel suoto kamaa, aakpɛko balo lɛma di ɔfankyi biala: Moab batii, Amon batii, Edom batii, Soba baka ku Filisti batii. Kakɔlele aamunikĩi, aata ma letoko nanfi. 48 Aakpɛ osie kanya aalenkee Amalek batii, aadiki Israel aakyeko mba niafũ ni asaa lɛma nnɛɛ.

49 Saul babisuɔtɔbi niale Yonatan, Isui ku Malki-Sua. Obisankobi nɔɔfole leyooto niale Merab, obisɔnle niale Mikal. 50 Saul ɔsɔfɔ leyooto niale Ahinoam, Ahimaas obisankobi aale. Saul bakpɛtɛ kanyayilatɛ niale Abner, Saul ote obilɛma Ner obisuɔtɔbi aale. 51 Saul ote Kis ku Abner ote Ner lale Abiel babisuɔtɔbi.

52 Saul ayi amuu lale kakpɛ siene ku Filisti batii, nioso nse Saul lɛnya osuɔtɔ kyokyodikyo ee nnwɔ ninkpe ni sɛkambi, ankpaa nwɔ ankpee di bakpɛtɛ nɔɔ kamɛ.