1 Nnya ayo kamɛ banɔɔfo ku mba ayooto baakpana ni baakata baakye Babel baawa ni ku ami di Ɔka Artasasta sɛka olebee kamɛ:

2 Di Pinehas banantii kamɛ yi, Gersom;

Itamar banantii kamɛ, Daniel;

Dawid banantii kamɛ, Hatus, 3 niakye ni Sekania banantii kamɛ;

di Paros banantii kamɛ yi, Sakaria, baakpana basuɔtɔ kɔlafa afosi-anɔɔ ayooto baakyakaa di suoto nɔɔ;

4 di Pahat-Moab banantii kamɛ yi, Serahia obisuɔtɔbi Eliehoenai, di basuɔtɔ alafa-anyɔ lakyakaa ni ku nnwɔɔ;

5 di Satu banantii kamɛ yi, Yahasiel obisuɔtɔbi Sekania, di basuɔtɔ alafa-atiɛ lakyakaa ni ku nnwɔɔ;

6 di Adin banantii kamɛ, Yonatan obisuɔtɔbi Ebed, di basuɔtɔ afosi-anɔɔ lakyakaa ni ku nnwɔɔ;

7 di Elam banantii kamɛ, Atalia obisuɔtɔbi Yesaia, di basuɔtɔ afosi-akuɛnsĩ lakyakaa ni ku nnwɔɔ;

8 di Sefatia banantii kamɛ yi, Mikeal obisuɔtɔbi Sebadia, di basuɔtɔ afosi-anɛ lakyakaa ni ku nnwɔɔ;

9 di Yoab banantii kamɛ yi, Yehiel obisuɔtɔbi Obadia, di basuɔtɔ alafa anyɔ-lefosi-banɛ lakyakaa ni ku nnwɔɔ;

10 di Bani banantii kamɛ yi, Yosifia obisuɔtɔbi Selomit, di basuɔtɔ kɔlafa afosi-akuɔ lakyakaa ni ku nnwɔɔ;

11 di Bebai banantii kamɛ yi, Bebai obisuɔtɔbi Sakaria, di basuɔtɔ afosi-anyɔ-banɛ lakyakaa ni ku nnwɔɔ;

12 di Asgad banantii kamɛ yi, Hakatan obisuɔtɔbi Yahonan, di basuɔtɔ kɔlafa-lefosi lakyakaa ni ku nnwɔɔ;

13 di Adonikam banantii kamɛ yi, bayɛntɛle nwu, di ayooto lɛma niale ni Elifelet, Yeiel ku Semaia, di basuɔtɔ afosi-akuɔ lakyakaa ni ku mma;

14 di Bigwai banantii kamɛ yi, Utai ku Sabud, di basuɔtɔ afosi-akuɛnsĩ lakyakaa ni ku mma.

15 Lasiisa ma di okle wɔ nimbiɛ kunfe ni Ahawa, ni buasiɛ ninfa ayi atiɛ nɛ. Obe wɔ lanyunyu ni batii nwu ku olebatatɛ nwu kamɛ yi, ntanya Lewi otii kuonwii ninfa. 16 Nioso lakpee baalɛɛ Eliesa, Ariel, Semaia, Elnatan, Yarib, Elnatan, Natan, Sakaria ku Mesulam, mba niale ni batunletɛ, ku Yoiarib ku Elnatan, mba niale ni basuɔtɔ ba niatofo ni akũ, 17 ni lakpee ma Ido nfũ, tunletɛ wɔ di Kasifia okpoo nɛ. Latɔkɔ ma ɔlaa wɔ baatɔkɔ ni Ido ku asaabaletɛ nɔɔ, olekatakɔ nwu bakpɛmblatɛ di Kasifia, di mmle baawako wo ni bakpɛntɛ munta ni Yaa loo leyo. 18 Ta Yaa loo sibualɛ kɔnɛɛ latika wo ni di suoto oso yi, baawako wo Serebia, osuɔtɔ wɔ niawɛ ni okyiini, aakye ni Mahli banantii kamɛ, aale ni Lewi obisuɔtɔbi, Israel obisuɔtɔbi, ku Serebia babisuɔtɔbi ku basuɔtɔ-bilɛma, baabla lefosi-banɛ; 19 ku Hasabia, diakyakaa ni ku Yesaia baakye ni Merari banantii kamɛ, ku basuɔtɔ-bilɛma ku bafa lɛma, baabla basuɔtɔ afosi-anyɔ. 20 Baawako kafɔɔ olekatakɔ bakpɛmblatɛ alafa-anyɔ-afosi-anyɔ. Bakpɛmblatɛ ba di Dawid ku banɔɔfotii nɔɔ lase baata alɛ baakyakaako ni Lewi batii nɛ. Baakpana bamuu lɛma ayooto di akũ kamɛ.

21 Ninfa, di Ahawa Okle lɔɔkɔ nwu, latɛ kanya onii, di mmle buawakosa ni suoto loo kasɔ di Yaa loo anu, munkaalɛ nwɔ ni kafɔɔ atoko ɔkyɛ ole osuku ɔkyɛ munta ni awo ku babi loo, ku lɛsaawɛ loo nimuu. 22 Sinunsɔ lakpɛ mi alɛ kakaalɛ ɔka nlɛ atɛɛ bakpɛtɛ ku bapɔnkɔ basiɛtɛ alɛ baafũ wo mankyeko balo loo nnɛɛ di osuku, diekye buatɔkɔ ɔka bulɛ, "Yaa loo sibualɛ ole kɔnɛɛ ntika di otii biala wɔ nintika nwɔ ni disi suoto, kafɔɔ ɔblɔ nɔɔ yakayaka n-wa di batii ba bamuu ninsĩ nwɔ ni suoto." 23 Nioso buanii kanya ni buakaalɛ Yaa loo nle mmle suoto, ni aanu wo ɔlaa ɔpɛ ɔta nɛ.

24 Ninfɛ ladiki olebatatɛ banɔɔfo lefosi-banyɔ lase lete, diakyakaa ni ku Serebia, Hasabia ku basuɔtɔ-bilɛma lefosi nɛ, 25 ni laklapoosa koto fututu ku koto sɛɛle asaaɔta, awansaa ya di ɔka, disibubatatɛ nɔɔ, banɔɔfotii nɔɔ ku Israel omuu niawɛ ni ninfa lakũ baata ni Yaa loo leyo nwu lata ma nɛ. 26 Laklapoosa koto fututu bakilo nkpe afosi-anyɔ-nkpe-nnyɔ ku kɔlafa, koto fututu awansaa onutũ labla bakilo nkpe ntiɛ-alafa-ana, koto sɛɛle onutũ labla bakilo nkpe ntiɛ-alafa-ana, 27 koto sɛɛle abɛɛsibii afosi-anyɔ di kɔya nɔɔ labla ni bakilo banɛ ku ɔfã, ku abɔɔsaa biene kyɔlɔkyɔlɔ awansaa anyɔ, eefũ ni kɔya fɛ koto sɛɛle.

28 Ni latɔkɔ ma nlɛ, "Biɛbla Klekle fɛ mmle beekleklesa ni awansaa ya mmle bɛɛta ni SAATE nwu. Koto fututu ku koto sɛɛle nwu nle otu-fãa asaaɔta ɛɛta ni SAATE nwu, bawa lee Yaa nwu. 29 Bilolaa nya biklee nwaa dilaase di obe wɔ biɛklapoosa nya ni di SAATE nwu leyo ayo ya kaamɛ di Yerusalem di olebatatɛ banɔɔfo ku Lewi batii ku Israel ayo kamɛ banɔɔfo anu." 30 Ninfɛ di olebatatɛ ku Lewi batii nwu lafũ koto fututu ku koto sɛɛle ku awansaa klekle ya baaklapoosa alɛ bayɔ basifiko ni Yaa loo leyo nwu di Yerusalem nɛ.

31 Di Yuda batii kɔwɛntɛ kasale lefosi dii nyɔɔfa kamɛ yi, buadie di Ahawa Okle bulɛ buosifi Yerusalem. Yaa loo kɔnɛɛ latika wo di suoto, ni aadiki wo aakyeko balo ku bayu nnɛɛ di osuku nɛ. 32 Nioso bualaabuo Yerusalem, nfa buatɛ ɔnyɛɛ ayi atiɛ nɛ. 33 Di dii naafa, di Yaa loo leyo kamɛ yi, buaklapoosa koto fututu ku koto sɛɛle ku awansaa klekle nwu buayɔ buakpee di Uria obisuɔtɔbi oletatɛ Meremot nnɛɛ. Pinehas obisuɔtɔbi Eleasar lawɛ ku nnwɔɔ, nkpo kafɔɔ di Lewi batii Yesua obisuɔtɔbi Yosabad ku Binui obisuɔtɔbi Noadia lawɛ ninfa nɛ. 34 Baabla nkuntaa di lɛsaa biala suoto baata di lɛpɔ́ ku onutũ kanya, ni baakpana onutũ omuu baatɛ di obe nwu nkpo kamɛ nɛ.

35 Ninfɛ di balanle ba niakye ni sɛlanle kamɛ baawa ni lata ofiɛ asaaɔta baata Israel Yaa nwu nɛ: banankyue-suɔtɔ lefosi- banyɔ, akunumuu afosi-anaasĩ-akuɔ, afosobi-suɔtɔ afosi-akuɛnsĩ-bakuɛnsĩ di Israel omuu disi. Fɛ okpile asaaɔta kafɔɔ yi, ntiekpaa lefosi-nnyɔ. N-ya mmle amuu lale ofiɛ asaaɔta diata SAATE nwu. 36 Baayɔ ɔka afiofa nwu kafɔɔ baata ɔka leyo banɔɔfotii ku Okle-Kamaa abaa kanyabayilatɛ, ninfɛ baata batii nwu ku Yaa leyo nwu lɛkyakaako nɛ.