1 Di Persia ɔka Kores lɛlɛɛ kasale kamɛ, di mmle di SAATE nwu ɔlaa wɔ di Yeremia labuɛ ni kaawa ni kaanya oso yi, SAATE nwu lakpanko Persia ɔka Kores otu alɛ ayie lɛkya di sɛka kalekɔ nɔɔ kamuu kamɛ, aakpana nwu kafɔɔ di kukũ kamɛ alɛ:

2 Nkpo di Persia ɔka Kores kobuɛ nɛ, alɛ:

SAATE nwu, Yaa wɔ ninkpe ni di osi ntɔɔyɔ sɛka nlekɔ be mmuu di kasɔ suoto ɛɛtɛɛ, ni eediki mi alɛ ntofo olekatakɔ ntɔɔ di Yerusalem di Yuda nɛ. 3 Batii nɔɔ lele ninsi di kamɛ lee yi- Yaa nɔɔ asiɛko nwɔ, aatɔɔ akata akyɛ Yerusalem di Yuda aalaatofo SAATE nwu olekatakɔ, Israel Yaa nwu, Yaa wɔ ninkpe ni di Yerusalem. 4 Di batii ba di lɛba lele di mba niebu basi ni nkpa nsi ni nunua batɔɔ koto fututu ku koto sɛɛle, ku asaa, babɔkɛɛ sele, ku otu-fãa asaaɔta diɛta ni Yaa olekatakɔ nwu di Yerusalem.

5 Ninfɛ di Yuda ku Benyamin nfaabi banɔɔfo, ku olebatatɛ ku Lewi batii- otii biala di Yaa lakpanko ni di otu- lalolaa suoto aakata akyɛ aalaatofo SAATE nwu leyo di Yerusalem nɛ. 6 Mba niasiɛ baakaako ma ni bamuu lakyakaako ma ku koto fututu ku koto sɛɛle awansaa, ku asaa ku babɔkɛɛ sele ku akyɛsaa ya niefũ ni kɔya, di otu-fãa asaaɔta amuu nkyakaa nii. 7 Diɛkyakaa nii, ɔka Kores ladieko awansaa ya niale ni SAATE nwu olekatakɔ ale, n-ya di ɔka Nebukadnesar layɔ aadieko ni di Yerusalem aayɔ aalaatɛ ni di bayaa nɔɔ olekatakɔ. 8 Ni di Persia ɔka Kores lata Mitredat, otii wɔ nintɛ ni ato layɔ asaa nwu aawako, aabaka nya aata Yuda ɔnɔɔfo Sesbasar nɛ.

9 Asaa nwu niale n-ya mmle nɛ:

11 Koto sɛɛle ku koto fututu nwu awansaa amuu labla nkpe-nnɔɔ-alafa-ana. Sesbasar layɔ asaa ya mmle amuu aawako di obe wɔ di balanle nwu lakye Babel kasɔ baawa ni Yerusalem.