1 Ni di kasɔ nwu batii layɔ Yosia obisuɔtɔbi Yehoahas baase sɛka di ote kanya nɛ.

2 Alɛɛ afosi anyɔ-atiɛ di Yehoahas lafũ fiɛ aabale ɔka, ni aale sɛka di Yerusalem awɛntɛ atiɛ nɛ. 3 Egipte ɔka latakatɛ nwɔ di sɛka suoto di Yerusalem, ni aanyinka Yuda batii alɛ bata koto fututu bakilo nkpe ntiɛ-alafa-ana ku koto sɛɛle bakilo afosi atiɛ-bana nɛ. 4 Ni di Egipte ɔka layɔ Yehoahas obilɛma-suɔtɔbi, Eliakim aase sɛka di Yuda ku Yerusalem suoto, ni aakyɛlɛnsa Eliakim leyooto aabla Yehoiakim nɛ. Kafɔɔ Neko lakpaa Eliakim obilɛma-suɔtɔbi Yehoahas aasifiko Egipte.

5 Alɛɛ afosi-anyɔ-anɔɔ di Yehoiakim lafũ fiɛ aabale ɔka, ni aale sɛka di Yerusalem lefosi lɛlɛɛ ninwii nɛ. Aabla okpile di SAATE Yaa nɔɔ anu. 6 Ni di Babel ɔka Nebukadnesar ladieko nwɔ, aaninii nwɔ ku lɛbɔɔsaa anyɛnɛ alɛ ɔɔkpaa nwɔ ansifiko Babel. 7 Nebukadnesar layɔ kafɔɔ anwansaa aakyeko SAATE nwu olekatakɔ aasifiko Babel, ni aayɔ nya aalaase di olekatakɔ nɔɔ ninfa nɛ.

8 Yehoiakim sɛka olebee sɛsaabla bamba, ayududusaa ya aabla ni ku asaa ya amuu baanya ni di suoto nɔɔ yi, bɛɛkpana nya beekpee di Israel ku Yuda baka kukũ kamɛ. Ni di obisuɔtɔbi nɔɔ Yehoiakin labayila nwɔ kaanya fɛ ɔka nɛ.

9 Lefosi alɛɛ anɛ di Yehoiakin lafũ fiɛ aabale ɔka, ni aale sɛka di Yerusalem awɛntɛ atiɛ ku ayi lefosi nɛ. Aabla okpile di SAATE nwu anu. 10 Di kabienle kamɛ yi, Ɔka Nebukadnesar lakpee baalaakpaa Yehoiakin, diakyakaa ni ku anwansaa ya niafũ ni kɔya di SAATE nwu olekatakɔ baawako Babel. Ni aayɔ Yehoiakin ote obilɛma-suɔtɔbi, Sedekia aase sɛka di Yuda ku Yerusalem suoto nɛ.

11 Alɛɛ afosi anyɔ-ninwii di Sedekia lafũ fiɛ aabale ɔka, ni aale sɛka di Yerusalem lefosi lɛlɛɛ ninwii nɛ. 12 Aabla okpile di SAATE Yaa nɔɔ anu, atawakosa suoto nɔɔ kasɔ kafɔɔ di ɔlaabuɛtɛtɛ Yeremia anu, nnwɔ niabuɛ ni SAATE nwu ɔlaa aatɔɔ nii.

13 Sedekia lataka aayila kafɔɔ di Ɔka Nebukadnesar wɔ niatɔɔ aaka ni ntam di Yaa leyooto kamɛ. Aabla otokopĩ, aata otu nɔɔ lawɛ osie, ni aasĩ alɛ olookyi afe SAATE Israel Yaa nfũ nɛ. 14 Diɛkyakaa ni yi, olebatatɛ batunletɛ bamuu ku batii nwu onukwale ɔtanle latɔɔpɔ osie kanya, baatikanko nnle bamba ayududusaa sɛsaabla simuu, baatɔɔkpɔnɔfɔsa SAATE nwu olekatakɔ kafɔɔ, nka aakleklesa ni di Yerusalem.

15 SAATE nwu, bate lɛma Yaa lakple aatɔɔta ɔɔta ma ɔlaa aatoofenko di batɔkyɛntɛ nɔɔ suoto, ta nyaami ɔnya wɔ aawɛ aata ni batii nɔɔ ku kasiɛkɔ nɔɔ nwu oso. 16 Kafɔɔ baama Yaa batɔkyɛntɛ nwu, baanyu sɛlaa nɔɔ nyakatãa, baayolee ɔlaa babuɛtɛtɛ nɔɔ dialaase di obe wɔ di SAATE nwu ɔblɔ lataka ni osie kanya di batii nɔɔ suoto di nyaami ɔnya kuninwii kafɔɔ ditasinwɛ nii. 17 Ni aatakatɛ Babel ɔka aakpee ma, ni aalo bakosopo lɛma ku kapamii di kakleklekɔ nwu nɛ. Atadiɛ okosopo ee okpeele, ɔnɔɔfo ee ɔnɔɔfo beene. Yaa layɔ bamuu lɛma aakpee di Nebukadnesar nnɛɛ. 18 Ni aayɔ anwansaa ya amuu di Yaa olekatakɔ nwu aasifiko Babel nɛ. Aayɔ akplɛ ku abibii akyuu nwu anyɔ, ku SAATE nwu olekatakɔ lɛsaawɛ, ɔka ku banɔɔfotii nɔɔ lɛsaawɛ aasifiko. 19 Baakpee SAATE nwu olekatakɔ ɔtɔ, baabibiɛ Yerusalem oyoyiɛ baatɛ kaasɔ nɛ; baafiɛ akayo amuu baalalaasa kafɔɔ lɛsaa biala niafũ ni kɔya ninfa.

20 Ninfɛ di Nebukadnesar lakpaa batii ba niabu baasiɛ ni nkpa, batakpi ni di kapamii kanya aasifiko sɛlanle kamɛ di Babel, ni baalakple bakpɛmblatɛ baata nnwɔɔ ku babisuɔtɔbi nɔɔ dialaadu obe wɔ di Persia sɛkakalekɔ labafũ ni osie nɛ. 21 Kasɔ nwu lawɛ ɔnyɛɛ ɔtɛ nika; kaatɛ ɔnyɛɛ di obe wɔ omuu kaate ni kafukuti, dialaase di obe wɔ di alɛɛ afosi-akuɛnsĩ laloo ni, di mmle di SAATE nwu ɔlaa wɔ di Yeremia labuɛ ni kawa ni kaanya.

22 Di Persia ɔka Kores lɛlɛɛ kasale kamɛ, di mmle di SAATE nwu ɔlaa wɔ di Yeremia labuɛ ni kawa ni kaanya oso yi, SAATE nwu lakpanko Persia ɔka Kores otu alɛ ayie lɛkya di sɛkakalekɔ nɔɔ kamuu kamɛ, aakpana nwu kafɔɔ di kukũ kamɛ alɛ:

23 "Nnya ɔlaa wɔ di Persia ɔka Kores kobuɛ nɛ alɛ:

" ‘SAATE, Yaa wɔ ninkpe ni di osi ntɔɔyɔ sɛkanlekɔ be mmuu di kasɔ suoto ɛɛtɛɛ, ni eediki mi alɛ ntofo olekatakɔ ntɔɔ di Yerusalem di Yuda nɛ. Batii nɔɔ lele ninsi di kamɛ lee yi- Yaa nɔɔ asiɛko nwɔ, aatɔɔ akata akyɛ osi.’ "