1 Di Solomon laloo ni ɔlaa ɔpɛ yi, ɔtɔ lakye osi kuabafiɛ ofiɛ asaaɔta nwu ku seleɔta nwu, ni di SAATE nwu lɛkpa layii olekatakɔ nwu nɛ. 2 Olebatatɛ ditafuo SAATE nwu olekatakɔ obuo ta SAATE nwu lɛkpa layii nini kamɛ pɔ oso. 3 Obe wɔ di Israel batii nwu bamuu lanya ni ɔtɔ nwu kosoo kunwa ni kasɔ di SAATE nwu lɛkpa kafɔɔ ntika ni di olekatakɔ nwu osi yi, baapɛ akunkyi di afuɔ ya baatɛtɛɛ ni suoto, baafuusa anu lɛma kaasɔ, baasumu SAATE nwu baapɛ nwɔ sɛfa baabuɛ alɛ,

"SAATE nwu nlɛ;

lɛbɔmbɔ nɔɔ nkpe dinaa ni kaloo."

4 Ninfɛ di ɔka nwu ku batii nwu bamuu lata seleɔta di SAATE nwu anu nɛ. 5 Ni di Ɔka Solomon layɔ banankyue nkpe afosi-anyɔ-banyɔ ku bafoso ku batie nkpe kɔlafa-afosi-anyɔ aata ole nɛ. Nioso ɔka nwu ku batii nwu bamuu ladiki Yaa olekatakɔ nwu kayi. 6 Olebatatɛ nwu layila di n-yilakɔ lɛma, fɛ mmle di Lewi batii labla ni ku SAATE nwu sinu asansaa ya di Ɔka Dawid labla aata ni SAATE nwu katansa ku n-ya baablako ni ɔkpɛ di obe wɔ aapɛ ni sɛfa, aabuɛ ni alɛ, "Lɛbɔmbɔ nɔɔ nkpe dinaa ni kaloo." Di Lewi batii kakyɛ nnyɔɔfa yi, olebatatɛ nwu lafɛ akyukyoo lɛma, ni di Israel batii bamuu layiyila ninfa nɛ.

7 Solomon lakleklesa kaflɔnkɔ nwu ntɛɛntɛɛ nwu di SAATE nwu olekatakɔ anu, ni aata ofiɛ asaaɔta ku atoko ɔkyɛ ole lɛla asaaɔta ninfa nɛ. Diekye abɔɔsaa sɛɛle oleɔta akyikye ya aabla ni ditamuɔ aata ofiɛ asaaɔta ku alesaa asaaɔta ku lɛla aba nwu.

8 Nioso Solomon lale dii ole nwu ayi akuɛnsĩ di obe nwu kamɛ, ku Israel batii ba bamuu niawɛ ni ku nnwɔɔ- kasikɔ kplɛ nwu batii lakye Lebo Hamat dialaadu Egipte Kaklenyii nwu baawa. 9 Di dii nɛnle suoto baasi dikudi, diekye baale oleɔta akyikye kayi-odiki nwu ayi akuɛnsĩ, ni baale kafɔɔ dii ole nwu ayi akuɛnsĩ baakyakaa nɛ. 10 Di afosi-anyɔ dii tiɛfa di Israel batii kɔwɛntɛ kuɛnsinle suoto aata batii nwu lasifi ayo lɛma. Baasifi ku lɛpɔ̀ ku suoto lɛyɔɔ di otu lɛma kamɛ di asaa biene ya di SAATE nwu ntɔɔbla ɛɛta ni Dawid ku Solomon ku batii nɔɔ Israel.

11 Di Solomon laloo ni SAATE nwu olekatakɔ ku lɛkayo nwu, aafuo ni kafɔɔ asaa ya amuu niasiɛ nwɔ ni diisi alɛ ɔɔbla ni di SAATE nwu olekatakɔ nwu kamɛ ku lɛkayo nɔɔ nimu kamɛ ɔbla yi, 12 ni di SAATE nwu ladiki suoto aatuo nwɔ ku kakyɛ ni aabuɛ alɛ:

"Ntonu ɔlaa ɔpɛ lɛfɔ, ni ntoodiki lɛba le mmle lɛta suoto nii fɛ olekatakɔ diɛta ni seleɔta nɛ.

13 "Nse lɛsɛɛ osi diɛta alɛ kanto dilosinnɔɔ, ee lɛta balososo lɛlalaasa kasɔ nwu asaa ee lekyesee ofiɛ kpile di batii nii kamɛ, 14 nse batii nii ba manlɛɛ ni ku leyooto nii, kamawakosa suoto lɛma kasɔ mampɛ ɔlaa kafɔɔ manwolaa anu nii, mankyi di asiosie sisuku lɛma nwu yi, ni kamanu nkyeko osi, n-yɔ kafɔɔ sikpile lɛma nkyɛ ma, n-yɔɔsa kafɔɔ kasɔ lɛma nwu ofiɛ. 15 Kamatikiti anu nii, nkyɔɔ atoko nii kafɔɔ nnu sɛlaa se bɔɔpɛ ni di lɛba le mmle. 16 Ntodiki olekatakɔ ka mmle lekleklesa ka alɛ Leyooto nii kaate ninfa dinaa ni kaloo. Anu nii ku otu nii kamawɛ ninfa obe lele.

17 "Afɔ yi, nse fɛɛkyɛ di anu nii fɛ mmle di teefɔ Dawid labla nii, fɛɛbla kafɔɔ di ɔlaa wɔ omuu lebuɛ nii, feeklee sɛsaabla nii ku afiofa nii yi, 18 kamase lɛkakpomii lɛfɔ kpinkpĩ, fɛ mmle labla ni kanya ninii ku teefɔ Dawid di obe wɔ labuɛ ni nlɛ, ‘Dilɔbawa alɛ flɔbawɛ otii ale ni sɛka di Israel suoto diidii.’

19 "Kafɔɔ nse biemunikĩi biediɛ sɛsaabla ku afiofa ya lɛta ye nii, biɛkyɛ biɛlaasumu bayaa bamba yi, 20 ni kamabudi Israel ndiki di kasɔ ka layɔ lata ma ni suoto, kamasĩ kafɔɔ olekatakɔ ka mmle ntookleklesa lɛta ni Leyooto nii. Kamabla ni okyonsanu ku lɛmansaa di batii bamuu kamɛ. 21 Ni kuntɛ olekatakɔ ka mmle ntɔɔtɛ keefũ leyooto yi, dibabla batii ba bamuu nikɔwaalɛ manfe ni ninfa ɔkpɛ, mambuɛ kafɔɔ alɛ, ‘Obe oso di SAATE nwu lɛbla lɛsaa nwu okle di kasɔ ka mmle suoto ku olekatakɔ ka mmle?’ 22 Ni batii kamadiki kanya alɛ, ‘Ta batoosĩ ni SAATE nwu, bate lɛma Yaa nwu, nnwɔ niakpaa ma aadieko ni di Egipte kasɔ oso yi, ni bɛɛlaapaataa bayaa bamba boosumu, mantɔ nya kafɔɔ nɛ- nkpo oso ɛɛyɔ anyasaa ya mmle amuu ɛɛwako ma di suoto nɛ.’ "