1 Baaloo ni asaa ya mmle nwu amuu ɔbla yi, Israel batii ba niawɛ ni ninfa ladie baakyɛ Yuda sekpoo, baalaabibiɛ afiɔtii, baabubudi Asera sewoso kafɔɔ baatɛ kaasɔ. Baalalaasa ntakalekɔ nwu ku seleɔta akyikye di Yuda, Benyamin, Efraim ku Manase omuu baafenko. Baalalaasa nya amuu baaloo nii, ni di Israel batii lapɛbaakple baasifi mma bamu sekpoo ku mma bamu lɛsaawɛ kamɛ nɛ.

2 Ni di Hesekia lasɛ sɛkpɛ aata olebatatɛ ku Lewi batii di akudi kanya- obiala lɛma di sɛkpɛ lɛma kanya fɛ olebatatɛ ee Lewi batii- alɛ baata ofiɛ asaaɔta ku atoko ɔkyɛ ole asaaɔta, mambla kasumu, mampɛ sɛfa, mansa katansa sinu kafɔɔ di SAATE nwu kasiɛkɔ n-yoko. 3 Ɔka lata asaa aakyeko lɛsaawɛ nɔɔ amu kamɛ diata ni olesɛ ku kɔtɔɔfɔ ofiɛ asaaɔta, diata ni kafɔɔ ofiɛ asaaɔta di Anyɛɛtɛyi suoto, Awɛntɛ Fɔle ku ayi finle fɛ mmle bɛɛkpana ni di SAATE nwu Kufiofa kamɛ. 4 Aatɔkɔ batii ba ninsi ni di Yerusalem alɛ bata olebatatɛ ku Lewi batii kalekɔ ka ninle ma ni kale, di mmle baayɔ suoto lɛma manta ni SAATE nwu Kufiofa ole. 5 Nfanwu di kufiofa nwu ladie ni yi, Israel batii lata alesaa kasale lɛma ku sifutulɛ niale ni atitabi, nta fɔle, nnɔnyi ku bablɔ ku asaa ya amuu man-wɛ mankyeko ni afe. Baawako lɛsaa biala dikyuu fosile, di lɛpɔ kplɛ kamɛ. 6 Israel ku Yuda batii ba niasiɛ ni di Yuda sekpoo kafɔɔ lawako banankyue ku bafoso lɛma dikyuu fosile ku asaa klekle ya beekleklesa bɛɛta ni SAATE Yaa lɛma nwu dikyuu fosile. Ni baasiisa nya di akudi kanya nɛ. 7 Baakye nle mmle ɔbla kasɔ di Yuda batii kɔwɛntɛ tiɛfa kamɛ, ni baaloo di kɔwɛntɛ kuɛnsinle kamɛ nɛ. 8 Di Hesekia ku banɔɔfotii nɔɔ lawa baabanya ni asaa akudi nwu yi, baatansa SAATE nwu ni baata batii nɔɔ Israel lɛtɔtrɔ nɛ.

9 Ni di Hesekia lakaalɛ olebatatɛ ku Lewi batii ɔlaa di asaa akudi nwu suoto nɛ; 10 ni di oletatɛ-nɔɔfo Asaria, niakye ni Sadok leyo kamɛ ladiki kanya alɛ, "Diayɔ ni di obe wɔ di batii nwu lakye kasɔ baatɔɔwako ni asaa okũ lɛma di SAATE nwu olekatakɔ yi, buɔwɛ alesaa kpinwu munle, kpinwu kafɔɔ kobu ante, diekye SAATE nwu ntɔɔta batii nɔɔ lɛtɔtrɔ, ni di n-ya mmle kpinwu lebu di lɛpɔ kamɛ ate nɛ."

11 Ni di Hesekia latɔkɔ ma alɛ babla asaa ntɛkɔ di SAATE nwu olekatakɔ kamɛ, ni baabla nle mmle nɛ. 12 Ninfɛ baale onukwale baayɔ asaa ya baakũ ni akyuu fosile ku akyɛsaa ya baakleklesa ni baawako nɛ. Lewi otii onwii bɔɔlɛɛ ni Konania niayila di asaa ya mmle kanya, obilɛma-suɔtɔbi Simei kafɔɔ niale nnwɔ niatikanko nwɔ nii. 13 Yehiel, Asasia, Nahat, Asahel, Yerimot, Yosabad, Eliel, Ismakia, Mahat ku Benaia niala banyuntɛ di Konania ku obilɛma-suɔtɔbi kalɔ, di Ɔka Hesekia ku ɔnɔɔfotii Asaria wɔ niayila ni di Yaa olekatakɔ kanya ladiki ni nɛ.

14 Lewi otii nwu Imna obisuɔtɔbi Kore, aale ni Kufĩ katunkɔ Kayoko nyuntɛ niayila di otu fãa asaaɔta ya manta ni Yaa kanya, aatɔɔsɛ asaa okũ ya manta ni SAATE nwu ku akyɛsaa ya beekleklesa nii. 15 Eden, Miniamin, Yesua, Semaia, Amaria ku Sekania lakyakaako nwɔ di onukwale ole kamɛ di olebatatɛ sekpoo kamɛ, baatɔɔsɛ nya baatɔɔta olebatatɛ wo lɛma di akudi lɛma kanya, banɔɔfo ku babisɔ kyɛkyɛ.

16 Diɛkyakaa nii, baasɛ baata basuɔtɔbi ba niafũ ni alɛɛ atiɛ ee baalenkee nii, di ayooto lɛma lasiɛ ni di ayooto akũ kamɛ- mba bamuu nimabuo ni SAATE nwu olekatakɔ mambla ni dii biala sɛkpɛ lɛma ateate, di sɛkpɛ lɛma ku akudi lɛma kanya. 17 Baasɛ asaa kafɔɔ baata olebatatɛ ba ayooto di ayo lɛma kamɛ batii lakpana baakpee ni di ayooto akũ kamɛ, baabla nkpo okle baata kafɔɔ Lewi batii ba niafũ ni alɛɛ afosi-anyɔ ee baalenkee nii, di sɛkpɛ lɛma ɔbla ku akudi lɛma kanya. 18 Baayɔ babifɔɔle lɛma bamuu, basɔfɔ lɛma, okpoo nwu omuu babisuɔtɔbi ku babisankobi ba ayooto niasiɛ ni di ayooto akũ ya mmle kamɛ baakyakaa. Diekye baale onukwale di suoto lɛma okleklesa kamɛ.

19 Kafɔɔ olebatatɛ, Aron banantii ba niasiɛ ni di nkpɛnsɔ be niamana sekpoo lɛma ee sekpoo bamba siakyi ni mma yi, baadiki batii di ayooto kanya alɛ basɛ asaa nwu awo bata osuɔtɔbi biala di kamɛ lɛma ku mba bamuu ayooto baakpana baakpee ni di Lewi batii ayooto akũ kamɛ.

20 Nle mmle ninle lɛsaa le di Hesekia labla aafenko ni di Yuda kasɔ kamuu suoto nɛ. Aatɔɔbla lɛsaa le niale ni dibiene diate ni tinini ku anukwale di SAATE Yaa nɔɔ anu. 21 Di lɛsaa biala aabla ni di Yaa olekatakɔ ɔkpɛ ɔbla kamɛ ku kufiofa nwu atoko ɔkyɔɔ ku asaa otuo nwu yi, aawolaa Yaa nɔɔ, aabla ɔkpɛ kafɔɔ ku otu nɔɔ omuu. Nioso asaa lalɛ ɔkyɛ aatɔɔ.