1 Hesekia lata Israel ku Yuda omuu kanya, ni aakpana akũ kafɔɔ aata Efraim ku Manase, aalɛɛ ma alɛ bawa SAATE nwu olekatakɔ di Yerusalem baabale Okpi Diisi Ofe Dii bata SAATE Israel Yaa nwu nɛ. 2 Ɔka ku banɔɔfotii nɔɔ ku kasikɔ nwu kamuu di Yerusalem latɛ alɛ babale Okpi Diisi Ofe dii nwu di Yuda batii kɔwɛntɛ nyɔɔfa kamɛ. 3 Batafuo dii nwu ole di obe ninwu kamɛ, diekye olebatatɛ ba niakleklesa ni suoto lɛma ditapɔ, batii nwu kafɔɔ ditasi di Yerusalem. 4 Mmle baatitika ni lakyɛkyɛ diata ɔka ku kasikɔ nwu kamuu, akyuu nwu anyɔ. 5 Ni baatɛ alɛ booyie lɛkya manfenko di Israel omuu, diayɔ ni di Beer-Seba dialaadu ni Dan, baatɔɔlɛɛ batii nwu alɛ bawa Yerusalem baabale Okpi Diisi Ofe Dii nwu bata SAATE Israel Yaa nwu nɛ. Badisinle dii nwu di lɛpɔ kplɛ kamɛ di mmle baakpana baatɛ ni kanya.

6 Ni di batɔkyɛntɛ nwu laklee akũ ya niakye ni ɔka ku banɔɔfotii nɔɔ nfũ baafenko di Israel ku Yuda omuu, di ɔka kufiofa kanya, kuabuɛ alɛ:

"Israel batii, bipɛbikple biwa SAATE nwu nfũ, Abraham, Isak ku Israel Yaa ɔkyɛ, alɛ aapɛankple anwa aye ba niebu ni, biatoso biadie ni di Asiria baka nnɛɛ ɔkyɛ. 7 Bitante fɛ bate lee ku babilee ba nitale onukwale baata ni SAATE nwu, bate lɛma Yaa nwu, diata alɛ aabla ma baate fɛle lɛyɛkɛsaa, fɛ mmle biɔnya nii. 8 Bitanle batokopĩtɛ, fɛ mmle di bate lee late nii; biyɔ suoto lee bita SAATE nwu. Biwa kakleklekɔ ka atookleklesa ni dinaa ni kaloo. Bisumu SAATE Yaa lee nwu, mmle di ɔblɔ yakayaka nɔɔ kamunikĩi kunkyɛ ye ni di suoto. 9 Nse biɛpɛbiekple biɛwa SAATE nwu ɔkyɛ yi, ni babilee-suɔtɔbi ku babi lee bamufũtɛ kamanya ma nyaami mampɛmankple manwa kafɔɔ kasɔ ka mmle, diekye SAATE Yaa lɛfɔ nkpe sifutulɛ, an-nya kafɔɔ nyaami. Ɔlɔbakyisa anu nɔɔ di suoto lee nse biɛpɛbiekple biɛwa ɔkyɛ nɔɔ."

10 Batɔkyɛntɛ nwu ladie baakyɛ okpoo biala di Efraim ku Manase, dialaadu bia Sebulon. Kafɔɔ batii nwu lama ma baanyu ma kafɔɔ nyakatãa. 11 Kafɔɔ yi, Aser, Manase ku Sebulon batii bawo lawakosa suoto lɛma kasɔ ni baadie baakyɛ Yerusalem nɛ. 12 Di Yuda kafɔɔ yi, Yaa kɔnɛɛ latika di batii nwu suoto diata alɛ disibu lɛma labla ninwii baayɔ baabla ɔkpɛ wɔ di ɔka ku banɔɔfotii nɔɔ lakpee ma ni ɔbla, di SAATE nwu ɔlaa kanya.

13 Batii ɔlambu kplɛkplɛ lasi di Yerusalem alɛ boole Bloblo wɔ Ninantaka ni Dii di Yuda batii kɔwɛntɛ nyɔɔfa kamɛ. 14 Baakpakpaa oleɔta akyikye ya niayila ni di Yerusalem, baalɛ kafɔɔ olufui oleɔta akyikye baalaawii di Kidron Ɔtaata.

15 Ni baalo Okpi Diisi Ofe lefosobi nwu di lefosi dii naafa di Yuda batii kɔwɛntɛ nyɔɔfa nwu suoto nɛ. Sinunsɔ lakpɛ olebatatɛ ku Lewi batii nwu ni baakleklesa suoto lɛma baayɔ ofiɛ asaaɔta baawako SAATE nwu olekatakɔ nɛ. 16 Ninfɛ baayila di n-yilakɔ lɛma fɛ mmle bɛɛtɛ ni di Yaa otii nwu Mose Kufiofa kamɛ nɛ. Ninfɛ di olebatatɛ lanwanwanyi ntɔ be di Lewi batii layɔ baata ma ni nɛ. 17 Di batii kpinwu di ɔlambu nwu kamɛ diikleklesa ni suoto lɛma oso yi, Lewi batii nialo Okpi Diisi Ofe afosobi baata batii ba bamuu nitaklekle nii, batafuo ni afosobi lɛma okleklesa ɔta ni SAATE nwu. 18 Nu di batii dudu di batii kpinwu ba niakye ni Efraim, Manase, Isakar ku Sebulon baawa ni ditakleklesa ni suoto lɛma, kafɔɔ baale ni Okpi Diisi Ofe Dii nwu yi, baayila di lɛsaa le bɛɛkpana bɛɛtɛ ni suoto. Kafɔɔ Hesekia lapɛ ɔlaa aata ma, aabuɛ alɛ, "SAATE nwu, nnwɔ ninlɛ ni, ayɔ akyɛ otii biala 19 wɔ niɛyɔ ni otu nɔɔ ɛɛtɛ ɛɛta ni Yaa owolaa- SAATE nwu, bate nɔɔ Yaa- bia nse aaklekle di kakleklekɔ nwu afiofa kanya." 20 Ni di SAATE nwu lanu aata Hesekia, ni aayɔɔsa batii nwu ofiɛ nɛ.

21 Israel batii ba niawɛ ni di Yerusalem lale Bloblo wɔ Ninantaka ni dii ayi akuɛnsĩ ku suoto lɛyɔɔ kplɛ ɔnya, obe wɔ di Lewi batii ku olebatatɛ nwu latɔɔsa ni sinu baatɔɔta ni SAATE nwu dii biala, di SAATE nwu katansa asansaa lakyakaa nii.

22 Ninfɛ di Hesekia lakakatɛ osie okpee sɛlaa aata Lewi batii bamuu, mba niawɛ ni lɛsɔnu nwaa di SAATE nwu ɔkpɛ ɔbla suoto nɛ. Ayi akuɛnsĩ amu baale nlekɔ lɛma be baata ma nii, baata atoko ɔkyɛ ole asaaɔta, baatansa SAATE, bate lɛma Yaa nwu.

23 Ni di kasikɔ nwu kamuu latuna alɛ boole dii nwu ayi akuɛnsĩ mankyakaa nɛ; nioso baale dii nwu ayi akuɛnsĩ bamba ku suoto lɛyɔɔ. 24 Yuda ɔka Hesekia lata kasikɔ nwu banankyue-suɔtɔ kakpe, bafoso ku batie nkpe nkuɛnsĩ, aata banɔɔfotii nwu kafɔɔ banankyue-suɔtɔ kakpe, bafoso ku batie nkpe lefosi. Olebatatɛ di lɛpɔ kpinwu kamɛ lakleklesa suoto lɛma. 25 Yuda kasikɔ nwu kamuu lanya suoto lɛyɔɔ, diakyakaa ni di olebatatɛ ku Lewi batii ku mba bamuu niakye Israel baabasi ni, dikyakaa ni di bafɔɔ ba niakye ni Israel ku mba niasiɛ ni di Yuda. 26 Suoto lɛyɔɔ kplɛ lawɛ di Yerusalem, diekye diayɔ ni di Israel ɔka Dawid obisuɔtɔbi Solomon obe kamɛ yi, lɛsalɛsaa kuninwii diiwɛ di Yerusalem fɛle nle mmle okle. 27 Ni di Olebatatɛ ku Lewi batii layila baata batii nwu lɛtɔtrɔ, ni di Yaa lanu aata ma nɛ. Diekye ɔlaa ɔpɛ lɛma ladu osi, di kasiɛkɔ klekle nɔɔ.