1 Di asaa ya amuu di Hesekia labla ni di onukwale ole kamɛ sɛmaa yi, Asiria ɔka Senakerib lawa aabadieko Yuda. Aate kala aamana sekpoo siene nwu aakyi, aanyu alɛ abalenkee sĩ anta suoto nɔɔ. 2 Di Hesekia lanya alɛ Senakerib ntɔɔwa ni ku disibu alɛ ɔɔbadieko ni Yerusalem kakpɛ yi, 3 ni aakpee asi baawo ku banɔɔfotii nɔɔ ku bakpɛtɛ di mmle baasɛɛ ni ntu be niekye ni ntu ntaakɔ di okpoo kplɛ nwu sɛmaa osuku, ni baakyakaako nwɔ nɛ. 4 Batii dikudi kplɛ lasi, ni baasɛɛ ntu ntaakɔ ku seklenyii nwu simuu se nimbiɛ sinfe ni di kasɔ nwu suoto nɛ. Ninfɛ baabuɛ alɛ, "Obe oso di Asiria baka kamawa mamawɛ ntu nkpinwu ninfũ?" 5 Ninfɛ aabla ɔkpɛ osie kanya aatoololaa oyoyiɛ nwu aba ya niabiɛ nii, aatootofo kafɔɔ ayo takale ninnwu suoto. Aatofo oyiyiɛ bamba di nnwu nkpo sɛmaa aasiensa Dawid Okpoo kplɛ nwu seyoyiɛ*. Aabla kafɔɔ akpɛsaa ku kubiafunsaa di lɛpɔ kplɛ kamɛ.

6 Aadiki bakpɛtɛ banɔɔfo aase di batii nwu kanya ni aasiisa ma di anu nɔɔ di kablɛfɛɛkɔ nwu di okpoo kplɛ nwu kayoko ni aakpee ma osie ku sɛlaa se mmle alɛ: 7 "Biwɛ osie ku sɛkambi. Bitanyɛkɛ ee nnɛɛ lafee ye ta Asiria ɔka ku bakpɛtɛ dikudi kplɛ le akyɛnko nii, diekye osie kplɛ nkpe wo kulenke nnwɔ ninkpe nwɔ nii. 8 Di ɔkyɛ nɔɔ yi, suoto sina lete akle, kafɔɔ awo yi, SAATE Yaa loo kamakyakaako wo, munkpɛ nkpɛ loo." Ni di batii nwu lawɛ sɛkambi di ɔlaa wɔ di Yuda ɔka Hesekia labuɛ ni suoto nɛ.

9 Di obe owo sɛmaa, di Asiria ɔka Senakerib ku bakpɛtɛ nɔɔ bamuu latɔɔtɛ ni kalà di Lakis yi, ni aakpee banɔɔfotii nɔɔ Yerusalem ku ɔlaa wɔ mmle aata ni Yuda ɔka Hesekia ku Yuda batii ba bamuu niawɛ ni ninfa alɛ:

10 "Nnya ɔlaa wɔ di Asiria ɔka Senakerib kobuɛ ni alɛ: Obe lɛsaa suoto bietika disi oso bilɛ biosiɛ osiɛ di Yerusalem ɔmana okyi nwu nkpo kamɛ? 11 Nse Hesekia lebuɛ alɛ, ‘SAATE Yaa loo kamadiki wo ankyeko Asiria ɔka nnɛɛ yi,’ ɔɔkyɔnkyɔ ye, anta kɔka ku otukɔnsɔ nlo ye. 12 Diele Hesekia omu niakpakpaa yaa wɔ mmle ntakalekɔ nwu ku seleɔta akyikye nwu, aatɔkɔ Yuda ku Yerusalem alɛ, ‘Dikpeni biesumu di oleɔta akyikye anwii anu, biefiɛ kafɔɔ seleɔta ninwu suoto’?

13 "Bieye lɛsaa le di ami ku bate nii labla ni nsɔ nwu bamba batii bamuu? Nnle nwu nkpo bayaa lafuo kasɔ lɛma ofũ di nnɛɛ nii? 14 Bawe di bayaa ba mmle bamuu kamɛ, di bate nii lawɔɔsa ni niafuo batii nɔɔ odiki di nnɛɛ nii? Ni lɛ nfɛ di yaa lee kamafuo ye odiki okyeko nnɛɛ nii? 15 Nkpo oso bitanta Hesekia lakyɔnkyɔ ye aata ye biayu osuku kafɔɔ fɛle mmle. Bitanfũ nwɔ bianu, diekye kale ee sɛkakalekɔ kukanwii yaa diifuo batii nɔɔ odiki okyeko nnɛɛ nii ee bate nii nnɛɛ. Lɛ nfɛ di yaa lee kafuo ye odiki okyeko nnɛɛ nii!"

16 Ni oso Senakerib banɔɔfo nwu lakakatɛ sɛlaa kpinwu di SAATE Yaa nwu ku kpɛmblatɛ nɔɔ Hesekia suoto. 17 Ɔka kafɔɔ lakpana akũ aatootufa SAATE, Israel Yaa nwu, aabuɛ sɛlaa se mmle kafɔɔ di suoto nɔɔ alɛ: "Fɛ mmle okle di nsɔ bamba nwu batii bayaa ditafuo ni batii lɛma odiki ni di nnɛɛ nii yi, nkpo di Hesekia yaa dilɔbafuo batii nɔɔ odiki di nnɛɛ nii nɛ." 18 Ninfɛ baafaa baalɛɛ Yerusalem batii ba niawɛ ni di oyoyiɛ nwu suoto di Yuda sele kamɛ alɛ bookpee ma difu manyɛkɛsa ma di mmle baafũ ni okpoo kplɛ nwu nɛ. 19 Baakakatɛ di Yerusalem Yaa suoto fɛ mmle baabla ni di batii bamba bayaa suoto di kayi ka mmle- ninle ni batii nnɛɛ ɔkpɛ nɛ.

20 Ni di Ɔka Hesekia ku ɔlaabuɛtɛtɛ Yesaia wɔ niale ni Amos obisuɔtɔbi lapɛ ɔlaa baawi baalɛɛ osi di nle mmle suoto nɛ. 21 Ninfɛ di SAATE nwu lakpee Yaa tɔkyɛntɛ onwii, aabalo bakpɛtɛ ku batunletɛ ku banɔɔfotii lɛma nwu bamuu di Asiria ɔka kasiɛkɔ nwu nɛ. Nioso aapɛakple aasifi nnwɔɔ omu kasɔ suoto ku sinunsɔ. Di obe wɔ aabuo ni yaa nɔɔ olekatakɔ kamɛ yi, ni di babisuɔtɔbi nɔɔ bawo lasasafɔ nwɔ kapamii baatɛ nɛ.

22 Nioso SAATE nwu lafũ Hesekia ku Yerusalem batii nkpa aakyeko Asiria ɔka Senakerib ku batii bamba bamuu nnɛɛ. SAATE nwu lanyu ma di ɔfankyi biala. 23 Batii kpinwu lawako asaaɔta Yerusalem baabata SAATE nwu ku akyɛsaa ya niefũ ni kɔya baabata Yuda ɔka Hesekia. Diayɔ ni di obe nwu kamɛ diasifi nii yi, nnle nwu mmuu latɔɔta Hesekia dibu nwaa.

24 Di obe nwu kamɛ, Hesekia labuo ofiɛ, aaloo ni okpi. Ni aapɛ ɔlaa aata SAATE nwu, ni aatuna aatɔɔ, aatuo nwɔ dituosaa le niɛbla ni ɔkpɛ nɛ. 25 Kafɔɔ Hesekia latakatɛ suoto nɔɔ katoo di otu nɔɔ kamɛ, ni atapɛ SAATE nwu sɛfa di sifutulɛ se aale nwɔ ni suoto nɛ; nni oso SAATE nwu ɔblɔ lawa di nnwɔɔ ku Yuda ku Yerusalem suoto. 26 Ninfɛ di Hesekia lakyi di otu nɔɔ kamɛ aawakosa suoto kasɔ, fɛ mmle di Yerusalem batii labla ni nɛ; nioso SAATE nwu ɔblɔ ditawa ma di suoto di Hesekia obe kamɛ.

27 Hesekia lawɛ lɛsaawɛ kpinwu ku dibu, ni aabla asaa ntɛkɔ aata koto fututu ku koto sɛɛle nɔɔ, afuɔ ya niafũ ni kɔya, akɔnɔkɔnɔsaa, kubiafunsaa ku asaa ya niafũ ni kɔya ateate amuu nɛ. 28 Aatofo ayo kafɔɔ aata atitabi, nta fɔle ku nnɔnyi ɔtɛ; aabla kafɔɔ ntenkɔ aata banankyue ateate, aakpee abà aata bafoso ku batie. 29 Aabudi sekpoo, aawɛ kafɔɔ bafoso ku banankyue di lɛpɔ kplɛ kamɛ, diekye Yaa latɔɔ lɛsaawɛ kpinwu.

30 Hesekia nwu niasɛɛ Gihon kasɔ ntu kataakɔ di osi lɛkyɛ, ni aadiki ntu nwu kafenkɔ aasifiko kufĩ kamɛɛkɔ lɛkyɛ di Dawid Okpoo kplɛ nwu nɛ. Asaa lalɛ nwɔ ɔkyɛ di lɛsaa biala aabla ni suoto. 31 Kafɔɔ obe wɔ di Babel batunletɛ lakpee batii alɛ balaakaalɛ nwɔ ni atuosaa ya niawa ni di kasɔ nwu suoto yi, Yaa ladiɛ nwɔ nnɛɛ alɛ ɔɔsɔ nwɔ annyu antofo kafɔɔ lɛsaa biala le niasiɛ nwɔ ni di otu kamɛ.

32 Hesekia sɛka ole sɛsaabla bamba ku sɛsaabla nɔɔ tinini yi, bɛɛkpana nya beekpee di Amos obisuɔtɔbi, ɔlaabuɛtɛtɛ Yesaia odiki otuo kamɛ, asi ni di Yuda ku Israel baka kukũ kamɛ. 33 Hesekia latɛ ɔnyɛɛ ku bate nɔɔ ni baakookaa nwɔ di lekpenkpe di lɛba le di Dawid banantii sɛkya nte ni nɛ. Ni di Yuda ku Yerusalem batii bamuu latɔɔ dibu di obe wɔ aakpi ni nɛ. Ni di obisuɔtɔbi nɔɔ Manase layila nwɔ kaanya fɛ ɔka nɛ.