1 Alɛɛ afosi-anyɔ di Ahas lafũ di obe wɔ aabale ni ɔka, ni aale sɛka di Yerusalem lefosi alɛɛ akuɔ nɛ. Atabla lɛsaa le niasiɛko ni di SAATE nwu anu fɛ ɔwa nɔɔ Dawid. 2 Aakyɛ di Israel baka sisuku suoto, ni aabla kafɔɔ afiɔtii aata Baal osumu nɛ. 3 Aafiɛ seleɔta di Hinom Ɔtaata kamɛ, ni aayɔ babisuɔtɔbi nɔɔ kafɔɔ aata seleɔta di ɔtɔ kamɛ nɛ, aatikanko nnle be di SAATE nwu latososa aadiki ni di Israel batii anu ayududusaa sɛsaabla. 4 Aata seleɔta, aafiɛ kafɔɔ olufui di ntakalekɔ, di akpenkpe osi ku kowoso biala niabla ni krikyaa kalɔ.

5 Nkpo oso SAATE Yaa nɔɔ layɔ Ɔka Ahas aakpee di Siria ɔka nnɛɛ. Siria batii lalenkee nwɔ, ni baamufũ batii nɔɔ kpinwu kafɔɔ fɛ ayo batentɛ, ni baakpaa ma baasifiko Damasko nɛ.

Aayɔ nwɔ kafɔɔ aakpee di Israel ɔka nnɛɛ, ni aalo batii nɔɔ kpinwu nɛ. 6 Ninfɛ di Remalia obisuɔtɔbi Peka lalo bakpɛtɛ nkpe kɔlafa-afosi-anyɔ di Yuda di dii kufĩ kamɛ- ta Yuda lasĩ ni SAATE nwu, bate nɔɔ Yaa oso. 7 Sikri wɔ niale ni Efraim otii kpɛtɛ onwii lalo ɔka obisuɔtɔbi Maaseia, Asrikam wɔ niale ni ɔnɔɔfotii wɔ niayila ni di lɛkayo kanya, ku Elkana, nnwɔ di ɔka kamaa nnwɔ nfɛ niatika nii. 8 Ni di Israel batii lafũ balanle nkpe alafa-anyɔ baakyeko babilɛma Yuda batii ba di kalakasɔ ɔkyɛ. Baale ni basanko, babisuɔtɔbi ku babisankobi. Baayɔ kafɔɔ kakpɛ kamɛ asaa kpinwu, ni baatuka nya baakpleko baasifiko Samaria nɛ.

9 Kafɔɔ SAATE nwu ɔlaabuɛtɛtɛ onwii baatɔɔlɛɛ ni Oded lawɛ ninfa, ni aadie aakyɛ aalakyakako bakpɛtɛ nwu di obe wɔ baakple baasifi ni Samaria nɛ. Ni aatɔkɔ ma alɛ, "Ta SAATE nwu, bate lee Yaa nwu lanya ɔblɔ aakpeeko ni Yuda oso aayɔ ma aakpee ye ninnɛɛ nɛ. Kafɔɔ bitoolo ma di lɛblɔfiɛ kanya diɛlaadu osi. 10 Ni di nunua yi, biɛtɛ bilɛ biɔyɔ Yuda ku Yerusalem basuɔtɔ ku basanko mimbla balanle lee nɛ. Kafɔɔ ayee biekpi sikpile lɛpɔɔ di SAATE Yaa lee suoto? 11 Nunua bikyɔɔ mi atoko! Bikplesa kale lee batii ba biemufũ ni sɛlanle bisifiko, diekye SAATE nwu lɛnya ɔblɔ yakayaka di suoto lee."

12 Ninfɛ di batunletɛ bawo di Efraim- niale ni Yehonan obisuɔtɔbi Asaria, Mesilemot obisuɔtɔbi Berekia, Salum obisuɔtɔbi Yehiskia, ku Hadlai obisuɔtɔbi Amasa- lasĩ ɔlaa baata mba niakye kakpɛ kamɛ baatɔɔwa ni nɛ. 13 Ni baatɔkɔ ma alɛ, "Bitankpaa balanle nwu biawako nfũ, se diele nkpo bubakpi lɛpɔɔ di SAATE nwu anu. Ɔtɛ biɛtɛ bilɛ biɔta okpile loo ku lɛpɔɔ loo okpi mpɔ ninkyakaa? Diekye lɛpɔɔ loo okpi nfɛ mpɔ kofokofoko, ɔblɔ nɔɔ yakayaka kafɔɔ ntika di Israel suoto."

14 Nioso bakpɛtɛ nwu ladiɛ balanle nwu ku kakpɛ kamɛ asaa nwu di banɔɔfotii ku kasikɔ nwu kamuu anu. 15 Ninfɛ di basuɔtɔ ba ayooto baalɛlɛɛ ni lakpaa balanle nwu, ni baadiki aakpeele di asaa ya baakyeko kakpɛ kamɛ baawako ni baakpee mba bamuu niakyɛ ni akyɔtɔ nɛ. Baata ma akpeele ku nkpeele, alesaa ku nnyinle, ku kɔfa fifiale. Baayɔ mba bamuu nitawɛ ni ɔnyɛɛ baatika di babɔkɛɛ ba nintuka ni atoo suoto. Nioso baakplesa ma baasifiko kale lɛma batii nfũ di Yeriko, Awɔsɔ Okpoo kplɛ nwu, ni baapɛbaakple baawa Samaria nɛ.

16 Di obe nwu kamɛ yi, Ɔka Ahas lakaalɛ lɛkyakaako aakyeko Asiria ɔka nfũ. 17 Edom batii lakple baawa baabadieko Yuda, baakpaa kafɔɔ balanle baasifiko. 18 Obe nwu kamɛ kafɔɔ di Filisti batii kafɔɔ lalaadieko sekpoo se niawɛ ni di akpenkpe nkpaa ku Yuda Nkpaalɔ kasɔ kamɛ. Baafũ Bet-Semes, Ayalon ku Gederot diɛkyakaa ni di Soko, Timna ku Gimso ku sekpoenyii se niamana sĩ nii, ni baasiɛ ninmi kamɛ nɛ. 19 SAATE lawakosa Yuda kasɔ ta Israel ɔka Ahas oso, diekye aata amumu ole lakyɛ sitũ di Yuda osie kanya, atale onukwale kuonwii aata SAATE nwu kafɔɔ. 20 Asiria ɔka Tilgat-Pilneser lawa ɔkyɛ nɔɔ, kafɔɔ kubuɛ aabakpee nwɔ, dikaatɛ alɛ lɛkyakaako aatɔɔ nii. 21 Ahas layɔ asaa awo aakyeko SAATE nwu olekatakɔ ku lɛkayo ku banɔɔfotii nfũ ni aayɔ nya aata Asiria ɔka nɛ, kafɔɔ nninkpo ditakyakaako nwɔ.

22 Ɔka Ahas onukwale ɔtanle ɔta SAATE nwu labataka katoo bia dialenkee di sɛlaa otũbee nɔɔ kamɛ. 23 Aata seleɔta aata Damasko bayaa, mba nialenkee nwɔ nii; diekye aabuɛ alɛ, "Di Siria baka bayaa lɛkyakaako ma ni yi, amii kamata ole nta ma di mmle baakyakaako mi nii." Kafɔɔ mma niale nwɔ kasɔ ɔpɛ ku Israel omuu kasɔ ɔpɛ nɛ. 24 Ni di Ahas lasiisa akpɛnsaa nwu di Yaa olekatakɔ, ni aayɔ nya aasifiko nɛ. Aasɛɛ SAATE nwu olekatakɔ akloo ni aapɛ oleɔta akyikye di obombo biala di Yerusalem nɛ. 25 Aatofo ntakalekɔ di Yuda okpoo biala aata ofiɛ seleɔta ɔta bayaa bamba, aayɔ aakpee SAATE nwu, bate nɔɔ Yaa ɔblɔ.

26 Ahas sɛka olebee sɛsaabla bamba ku sisuku nɔɔ simuu, diayɔ ni di kasɔkakyekɔ dialaadu ni kayɛntɛkɔ yi, bɛɛkpana nya beekpee di Yuda ku Israel baka kukũ kamɛ. 27 Ahas latɛ ɔnyɛɛ ku bate nɔɔ, ni baakookaa nwɔ di Yerusalem okpoo kplɛ nɛ, kafɔɔ batayɔ nwɔ baakpee di Israel baka sɛkya kamɛ. Ni di obisuɔtɔbi nɔɔ Hesekia labayila nwɔ kaanya fɛ ɔka nɛ.