1 Di nle mmle sɛmaa yi, Moab batii ku Amon batii diɛkyakaa ni di Maon batii bawo lawa baabakpɛko Yehosafat.

2 Basuɔtɔ bawo lawa baabatɔkɔ Yehosafat alɛ, "Bakpɛtɛ dikudi kplɛ ninwii lekye Edom mamadieko fɔ, beekye Lekpo sɛmaa bɔɔwa fɔ ɔkpɛko. Nfɛ bakpe di Hasason-Tamar" (nfa ninle En-Gedi nɛ). 3 Lɛyɛkɛ lapɛ Yehosafat, ni aatɛ alɛ owolaa kamɛ di SAATE nwu nfũ, ni aata baayie lɛkya aata Yuda omuu kanya onii nɛ. 4 Ni di Yuda batii labla onwii baabakaalɛ lɛkyakaako baakyeko SAATE nwu nfũ nɛ; nwaako, baakye okpoo biala di Yuda baawa alɛ bɔɔbawolaa SAATE nwu.

5 Ninfɛ di Yehosafat lataka aayila di Yuda ku Yerusalem kasiisakɔ nwu di SAATE nwu olekatakɔ di kaflɔnkɔ fɔle nwu anu 6 aabuɛ alɛ:

"Oo SAATE, bate loo Yaa, diele afɔ ninle Yaa wɔ ninkpe ni di osi? Foole sɛka di nnle nwu sɛka nlekɔ mmuu suoto. Osie ku ɔnyɛɛ nsi di nnɛɛ lɛfɔ, kuonwii kafɔɔ dilɔbafuo fɔ oyilako. 7 Oo Yaa loo, diele afɔ niatososa batii ba niasiɛ ni di kasɔ ka mmle suoto di batii lɛfɔ Israel anu, ni fɛɛyɔ ka fɛɛta siɛwo lɛfɔ Abraham banantii dinaa ni kaloo? 8 Batoosiɛ ka di suoto, ni batootofo kakleklekɔ bɛɛta Leyooto lɛfɔ, beebuɛ alɛ, 9 ‘Nse ɔlaa letũ wo, kuntɛ lɛkanko kapamii, ee ofiɛ kpile ee kɔka yi, bubayila di anu lɛfɔ di olekatakɔ ka mmle di Leyooto lɛfɔ ntika ni mun-wi munlɛɛ fɔ di nimiina loo kamɛ, ni fabanu wo lɛlɛɛ fandiki wo kafɔɔ.’

10 "Kafɔɔ nunua, batii lekye Amon, Moab ku Seir Kobokote bɛɛwa, mba kasɔ fatata Israel osuku baadieko ni di obe wɔ baakye Egipte baawa nii; nioso bawa loo lamunikĩi baasifi baadiɛ ma batawɔɔsa ma kafɔɔ. 11 Nyu mmle bɔɔta wo ni letota, bɛɛwa alɛ bɔɔbatososa wo mandiki ni di kasɔ ka faata wo ni fɛ atesaa. 12 Oo Yaa loo, flɔbakanko ma? Diekye bunaa osie kuonwii bubayilako ni bakpɛtɛ dikudi kplɛ le mmle nikodieko wo nii. Buoye lɛsaa le buabla nii, kafɔɔ anu loo ntika fɔ di suoto."

13 Yuda batii bamuu, basɔfɔ lɛma ku babi lɛma ku babisɔ, layila ninfa di SAATE nwu anu.

14 Ninfɛ di SAATE nwu ninwuna lawa di Matania obisuɔtɔbi Yeiel wɔ niale ni Benaia obisuɔtɔbi, aale ni Sakaria obisuɔtɔbi Yahasiel wɔ niale ni Matania obisuɔtɔbi aale ni Lewi otii, aakye ni kafɔɔ Asaf kɔna kamɛ, di obe wɔ aayila ni di kasikɔ nwu.

15 Ni aabuɛ alɛ: "Ɔka Yehosafat ku batii ba bamuu ba ninsi ni di Yuda ku Yerusalem, bikyɔɔ atoko! Nnya ɔlaa wɔ di SAATE nwu kobuɛ antɔkɔ ye ni: ‘Bitan-yɛkɛ ee nnɛɛ lafee ye ta bakpɛtɛ dikudi kplɛ le mmle oso. Diekye kakpɛ nwu diele ye kale, kafɔɔ Yaa kakpɛ kale. 16 Kɔsɛɛ bisoo bikyɛ biɛlaakpɛko ma. Babakata manfe di Sis Osuku, bibanya ma kafɔɔ di okplo kyofole nwu kayɛntɛlekɔ di Yeruel Ɔfafuu kamɛ. 17 Diele aye nimakpɛ kakpɛ ka mmle. Biyila di n-yilakɔ lee; Oo Yuda ku Yerusalem, biyila kpinkpĩ bienyu didiki le di SAATE nwu kamata ye ni. Bitan-yɛkɛ; bitanta nnɛɛ lafee ye. Bidie bikyɛ biɛlaakyakako ma kɔsɛɛ, SAATE nwu kafɔɔ kamasiɛko ye.’ "

18 Ni di Yehosafat lawakasɔ aase katũ nɔɔ kaasɔ nɛ, ni di Yuda ku Yerusalem batii bamuu lapɛ akunkyi di SAATE nwu anu baasumu nwɔ nɛ. 19 Ninfɛ di Lewi batii bawo ba niakye ni Kohat batii ku Kora batii kamɛ lataka baayila ni baatansa SAATE nwu, Israel Yaa, ku sɛlɔ siene nɛ.

20 Ni baadie ninfa ku kolesɛtũ baasifi Tekoa Ɔfafuu nɛ. Di obe wɔ booyefe ni osuku yi, Yehosafat layila aabuɛ alɛ, "Yuda ku Yerusalem batii, bikyɔɔ mi atoko! Biwɛ ofũ onu di SAATE nwu Yaa lee kamɛ, ni abata ye min-yila kpinkpĩ; biwɛ ofũ onu di ɔlaa babuɛtɛtɛ nɔɔ kamɛ ni dibalɛ ninta ye." 21 Obe wɔ aatitika sɛlaa ku batii nwu aaloo nii, Yehosafat ladiki batii alɛ basa sinu bata SAATE nwu, baatansa kafɔɔ leklekle nɔɔ lɛklɛɛ di obe wɔ baadie baale ni bakpɛtɛ nwu katũ, ni baatɔɔsa alɛ:

"Bipɛ SAATE nwu sɛfa,

diekye lɛbɔmbɔ nɔɔ nkpe dinaa ni kaloo."

22 Di obe wɔ baakye kasɔ baatɔɔsa ni sinu baatɔɔtansa ni yi, SAATE nwu latɛ kalà di Amon, Moab ku Seir Kobokote bakpɛtɛ ba niatoodieko ni Yuda suoto, ni baalenkee nɛ. 23 Ni di Amon ku Moab bakpɛtɛ lataka baayila di bakpɛtɛ ba niakye ni Seir Kobokote suoto baawɔɔsa ma baadiki nɛ. Baaloo ni batii ba niakye ni Seir olo sɛmaa yi, baamunikĩi bakyɔɔ bawo anu baawɔɔsa bawo lɛma.

24 Obe wɔ di Yuda bakpɛtɛ labadu ni leyo takale le suoto man-yila man-nyunyuu ni di ɔfafuu nwu kamɛ, baanyu ni bakpɛtɛ dikudi kplɛ nwu yi, bakpi lete baanya bate kaasɔ; kuonwii ditatoso. 25 Nioso Yehosafat ku bakpɛtɛ nɔɔ lakyɛ baalatuka kakpɛ kamɛ asaa lɛma baasifiko, baawɛ kafɔɔ akpɛsaa kpinwu ku akpeele ku asaa ya niefũ ni kɔya- aapɔ aalenkee n-ya baafuo ni otuka osifiko. Kakpɛ kamɛ asaa nwu latɛ aapɔ oso, ayi atiɛ amu baayɔ baalɛ nya. 26 Di dii naafa suoto baasi di Beraka Ɔtaata, ni baatansa SAATE nwu nɛ. Nioso bɔɔlɛɛ nwu Beraka* Ɔtaata diɛbadu miɛ dii le mmle nɛ.

27 Ninfɛ di Yehosafat laleko Yuda ku Yerusalem batii bamuu katũ baakple baasifi Yerusalem ku suoto lɛyɔɔ nɛ. Diekye SAATE nwu lata ma osuku alɛ banya suoto lɛyɔɔ di balo lɛma suoto. 28 Baabuo ni Yerusalem ni baasifi SAATE nwu olekatakɔ ku kukyukyue, bakyitaa ku akyukyoo ɔfɛ nɛ.

29 Yaa lɛyɛkɛ labuo di nnle nwu mmuu sɛka nlekɔ kamɛ di obe wɔ baanu ni mmle di SAATE nwu lakpɛko ni Israel balo. 30 Ni di Yehosafat sɛka kalekɔ lasiɛ di atoko ɔkyɛ ole kamɛ nɛ. Diekye Yaa nɔɔ latɔɔ ɔnyɛɛ ɔtɛ di ɔfankyi biala.

31 Nioso Yehosafat lale sɛka di Yuda suoto. Alɛɛ afosi-atiɛ-anɔɔ aafũ di obe wɔ aabale ni Yuda ɔka, ni aale sɛka di Yerusalem alɛɛ afosi-anyɔ-anɔɔ nɛ. Ɔya leyooto niale Asuba, aale ni Silhi obisankobi. 32 Aakyɛ di ote Asa sisuku suoto, atakyi ninwu suoto kafɔɔ; aabla lɛsaa le niasiɛko ni di SAATE nwu anu. 33 Kafɔɔ batakpakpaa aba takale nwu, nioso batii nwu ditayɔ situ lɛma kafɔɔ baatika di bate lɛma Yaa suoto.

34 Asaa bamba ya di Yehosafat labla ni di sɛka olebee nɔɔ kamɛ, diayɔ ni di kasɔkakyekɔ dialaase ni di kayɛntɛlekɔ yi, bɛɛkpana nya beekpee di Hanani obisuɔtɔbi Yehu sekofolaa kamɛ, n-se bɛɛkpana beekpee ni di Israel baka kukũ kamɛ.

35 Nni sɛmaa yi, Yuda ɔka Yehosafat labla kanya kanwii ku Israel ɔka Ahasia wɔ niakpi ni lɛpɔɔ di amumu ɔbla suoto. 36 Aatunako nwɔ baawola seklo se nikatɔɔbla ni sɛkpɛ. Baawolasĩ baaloo ni di Esion-Geber sɛmaa yi, 37 Dodawahu wɔ niakye ni Maresa obisuɔtɔbi Eliesa labuɛ ɔlaa aatɛ di Yehosafat suoto, aabuɛ alɛ, "Ta fatɔɔbla ni onwii ku Ahasia oso yi, SAATE nwu kamalalaasa lɛsaa le fɛɛbla nii." Seklo nwu lababiɛ nioso sitasinfuo ɔkpɛ ɔbla di ntu osi.