1 Ni di Yuda batii bamuu layɔ Usia wɔ niafũ ni lefosi alɛɛ akuɔ, ni baayɔ nwɔ baase sɛka di ote Amasia kanya nɛ. 2 Nnwɔɔ niale nwɔ niase ni Elot okpoo dibudi aalolaa nwu aata Yuda di Amasia lalaatɛ ni ɔnyɛɛ ku bate nɔɔ sɛmaa nɛ.

3 Lefosi alɛɛ akuɔ di Usia lafũ di obe wɔ aabale ni ɔka, ni aale sɛka di Yerusalem alɛɛ afosi-anɔɔ-anyɔ nɛ. Ɔya leyooto niale Yekalia; aakye ni Yerusalem. 4 Aabla lɛsaa le niasiɛko ni di SAATE nwu anu, fɛ mmle okle di ote Amasia labla nii. 5 Aawolaa Yaa di Sakaria obe kamɛ, nnwɔ niatuo nwɔ ni asaa di Yaa ɔyɛkɛ kamɛ. Di Usia latoowolaa ni owolaa SAATE nwu yi, Yaa latɔɔ lɛtɔtrɔ.

6 Aakyɛ kakpɛ ku Filisti batii, ni aabiɛ Gat, Yabne ku Asdod seyoyiɛ aatɛ kaasɔ nɛ. Ni aase sekpoo se niakaako ni Asdod ku aba bamba di Filisti batii kamɛ dibudi nɛ. 7 Yaa lakyakaako nwɔ aakpɛko Filisti batii ku Arab batii ba niasiɛ ni di Gur-Baal ku Meun batii. 8 Amon batii lawako Usia kɔsɔsĩ, ni di leyooto nɔɔ lakpɛ̀ dialaadu bia Egipte kɔmɛ nɛ, diekye aabawɛ osie nwaa.

9 Usia latofo ayo takale di Yerusalem di Leyokɔ Kayoko, Ɔtaata Kayoko ku oyoyiɛ nwu lakɛ, ni aatofo oyoyiɛ aakyisa nya nɛ. 10 Aatofo kafɔɔ ayo takale di ɔfaafuu kamɛ aakutu kafɔɔ ntu abiɔ kpinwu, diekye babɔkɛɛ sele kpinwu lawɛ nwɔ di akpenkpe nkpaa ku kasɔ lakataa suoto. Aawɛ batii ba niatɔɔbla ni ɔkpɛ di afe nɔɔ ku nta awosobi afe di akpenkpe nwu ku nsɔ be di lɛla nsi ni suoto, diekye aabɔmbɔ kɔtɛ nwu.

11 Usia lawɛ bakpɛtɛ ba baananfi ni nwaa, baalolaa ni suoto baata ni kakpɛ ɔkyɛ di akudi lɛma kamɛ di lɛpɔ le kanya di kukũ kpanatɛ Yeiel ku ɔnɔɔfotii Maaseia lasiisa ni, baawɛ ni di lɛkayo ɔnɔɔfotii onwii, Hanania kanyu kalɔ. 12 Ayo kamɛ kanyabayilatɛ ba niayila ni di bakpɛtɛ nwu kanya lɛpɔ labla nkpe-nnyɔ-alafa akuɔ. 13 Bakpɛtɛ ba niasiɛ ma ni kaalɔ labla basuɔtɔ nkpe alafa-atiɛ-bakuɛnsĩ-alafa-anɔɔ, baananfi baata ni kakpɛ. Baale bakpɛtɛ siene baata ɔka lɛkyakaako di balo nɔɔ suoto. 14 Usia lata bakpɛtɛ nwu bamuu kubiafunsaa, akplɔ, abɔɔsaa akoto, akpakyaa, kɔtaa ku kutiabi. 15 Aabla kakpɛ kamɛ akpɛnsaa ya di batii ba ninkpe ni kɔnɛɛ kamɛ lɛsaatofo labla nii. Aabla nya aata ɔkpɛ ɔblako di ayo takale suoto ku ayokɔ suoto diata ni kɔtaa ɔtaa ku afuɔ kplɛ omunusa di Yerusalem. Leyooto nɔɔ lakpɛ̀ diakyɛ nkyonkɔ, diekye baatɔɔ lɛkyakaako osie kanya dialaase di obe wɔ aabawɛ ni osie nwaa.

16 Kafɔɔ di Usia labawɛ osie aaloo ni yi, suoto nɔɔ katoo ɔtakatɛ latɔɔ aapɛ kaasɔ. Atale onukwale aata SAATE Yaa nɔɔ nwu. Aabuo SAATE nwu olekatakɔ aalaafiɛ olufui di olufui oleɔta akyikye suoto. 17 Oletatɛ Asaria ku SAATE nwu olebatatɛ bamba ba niawɛ ni sɛkambi afosi-anɛ latikanko nwɔ baabuo olekatakɔ nwu kamɛ. 18 Ni baasĩ ɔlaa baatɔkɔ nwɔ alɛ, "Diɛlɛ alɛ afɔ, Usia, faafiɛ olufui fanta SAATE nwu. Nnwu yi, olebatatɛ ba ninle ni Aron banantii ba suoto beekleklesa bɛɛta ni olufui ofiɛ lete ninkpe osuku mambla. Die di kakleklekɔ nwu, diekye faale onukwale; SAATE Yaa nwu kafɔɔ dilɔbakpee fɔ dibu di suoto."

19 Ni di Usia wɔ nialolaa suoto aaklee ni olufui lɛfiɛsaa di kɔnɛɛ nɔɔ alɛ ɔbafiɛ ni olufui lanya ɔblɔ nɛ. Obe wɔ aatɔɔnya ɔblɔ aatookpeko ni olebatatɛ nwu di anu lɛma, di olufui oleɔta akyikye anu, di SAATE nwu olekatakɔ kamɛ yi, ni di ofiɛ sɛɛle lakpete nwɔ di katũ nɔɔ nɛ. 20 Di oletatɛ-nɔɔfo Asaria ku olebatatɛ nwu bule bamuu lanyu nwɔ ni, baanya alɛ ofiɛ sɛɛle ntookpete nwɔ di katũ nɔɔ, nioso baapɛsɛwa baadieko nwɔ baasifiko kayi. Nwaako, nnwɔɔ omu nɔɔ aapɛsɛwa alɛ oodie, diekye SAATE nwu lakpee nwɔ ofiɛ.

21 Ɔka Usia lawɛ ofiɛ sɛɛle dialase di dii le aakpi nii. Aasiɛ di leyo le niablasa ni suoto- ofiɛ sɛɛle leyo, batasintɔɔ osuku kafɔɔ aakyɛ SAATE nwu olekatakɔ. Obisuɔtɔbi nɔɔ Yotam nfɛ niayila di lɛkayo kanya aatoonyu kafɔɔ kasɔ nwu batii.

22 Asaa ya bamba di Usia labla nii, diayɔ ni di kasɔkakyekɔ dialaase ni di kayɛntɛkɔ yi, ɔlaabuɛtɛtɛ Amos obisuɔtɔbi Yesaia lakpana nya aatɛ. 23 Usia latɛ ɔnyɛɛ ku bate nɔɔ, ni baakookaa nwɔ di ɔlɔɔkɔ lɛma di batii kakookaakɔ ka niale ni baka kale nɛ. Diekye batii labuɛ alɛ, "Ofiɛ sɛɛle eefiɛ." Ni di obisuɔtɔbi nɔɔ Yotam labayila nwɔ kaanya fɛ ɔka nɛ.