2 KRONIKA 24

Yuda Ɔka Yoas

1 Alɛɛ akuɛnsĩ di Yoas lafũ fiɛ aabale ɔka, ni aale sɛka di Yerusalem alɛɛ afosi-ana nɛ. Ɔya leyooto niale Sibia; aakye ni Beer-Seba. 2 Yoas labla lɛsaa le niasiɛko ni di SAATE nwu anu di oletatɛ Yehoiada alɛɛ amuu kamɛ. 3 Yehoiada ladiki basɔfɔ banyɔ aatɔɔ, ni aalofo babisuɔtɔbi ku babisankobi nɛ.

4 Di obe owo sɛmaa yi, Yoas latɛ alɛ oose SAATE nwu olekatakɔ lelolaa. 5 Ni aalɛɛ olebatatɛ ku Lewi batii aasiisa aatɔkɔ ma alɛ, "Bitɔɔkyɛ Yuda sekpoo biɛlaafũ ato ya manta ni lɛlɛɛ biala bikyeko Israel omuu nfũ, diɛta ni Yaa lee olekatakɔ ololaa. Bibla ni kanunua." Kafɔɔ Lewi batii ditadiki kɔkpaa wla.

6 Nioso ɔka lalɛɛ oletatɛ nɔɔfo Yehoiada ni aakaalɛ nwɔ alɛ, "Obe lɛsaa oso fananyu falɛ Lewi batii lɛkyɛ Yuda ku Yerusalem bɛɛlaafũ akpooto ya di SAATE nwu kpɛmblatɛ Mose ku Israel kasiisakɔ nwu latika baata ni Kanya Ninii Lekpaayo le Mansi ni?"

7 Nunua Atalia ɔsanko kpiletɛ nwu batii ntoobiɛ Yaa olekatakɔ nwu beebuo bɛɛlaayɔ bia asaa klekle nwu bɛɛblako ɔkpɛ bɛɛta Baal.

8 Ni di ɔka lata baabla asaaɔta lɛlakaa, ni baayɔ ni baase kaayi, di SAATE nwu olekatakɔ kayoko nɛ. 9 Ni baayie lɛkya di Yuda ku Yerusalem alɛ bayɔ akpooto ya di Yaa kpɛmblatɛ nwu Mose lakaalɛ aakyeko ni Israel batii nfũ di ɔfaafuu kamɛ bawako SAATE nwu nɛ. 10 Ni di banɔɔfotii nwu bamuu ku batii nwu bamuu layɔ asaa okũ lɛma baawako ku suoto lɛyɔɔ, baayɔ nya baatookpee di lɛlakaa nwu kamɛ dilaase di obe wɔ di lɛlakaa nwu layii nii. 11 Obe lele di Lewi batii lɛyɔ lɛlakaa nwu bɛɛwako ɔka banɔɔfotii, bɛɛnya alɛ koto kpinwu nsi di lɛlakaa nwu kamɛ yi, lɛkayo kukũ kpanatɛ ku oletatɛ nɔɔfo nwu ɔnɔɔfotii nkyɛ manaanyɛɛnɛ koto nwu di lɛlakaa nwu kamɛ, mankplesa lɛlakaa nwu manaase di lɛba nini. Mambla nle mmle obe biala, ni baawɛ koto kpinwu nɛ. 12 Ninfɛ di ɔka ku Yehoiada layɔ koto nwu baata batii ba niabla ni ɔkpɛ wɔ niafĩ ni di SAATE nwu olekatakɔ nɛ. Baata ayo batofotɛ ku ayo babantɛ koto alɛ base SAATE nwu olekatakɔ lelolaa. Baata kafɔɔ bakpɛntɛ ba nimbla ni sɛkpɛ di abɔɔsaa wɛɛfɛɛ ku abɔɔsaa sɛɛle suoto alɛ balolaa olekatakɔ nwu.

13 Batii ba niayila ni di ɔkpɛ nwu kanya labla ɔkpɛ ku okyiini, ɔkpɛ nwu lakyɛ sitũ di kalɔ lɛma. Baase Yaa olekatakɔ nwu letofo di nninimu letembi kanya, baata ni diakple diawɛ osie nwaa. 14 Obe wɔ baaloo ni yi, baayɔ koto bule baawako ɔka ku Yehoiada, ni baayɔ kũ baabla SAATE nwu olekatakɔ anwansaa nɛ: anwansaa diata ni kasumu ɔkpɛ ku ofiɛ asaaɔta, akaku ku koto sɛɛle ku koto fututu asaa bamba. Ni baatɔɔta ofiɛ asaaɔta di SAATE nwu olekatakɔ kamɛ obe lele, di Yehoiada lanya aasiɛ ni osiɛ nkpa nɛ.

15 Yehoiada labe, aafũ alɛɛ kpinwu, ni aakpi di obe wɔ aafũ ni alɛɛ kɔlafa-afosi-atiɛ nɛ. 16 Baakookaa nwɔ ku baka di Dawid Okpoo kplɛ nwu kamɛ, ta dibiene le aabla ni di Israel aata ni Yaa ku olekatakɔ nɔɔ oso.

Yoas Asiensiesaa Ɔbla

17 Di Yehoiada lakpi ni sɛmaa yi, Yuda banɔɔfotii lawa baabasɛɛsa ɔka, ɔka kafɔɔ lanu ma ɔlaa. 18 Ni baadiɛ SAATE nwu olekatakɔ, bate lɛma Yaa nwu baatɛ, ni baalaasumu Asera sewoso ku afiɔtii nɛ. Ta lɛpɔɔ lɛma nwu okpi oso yi, Yaa ɔblɔ lasoo di Yuda ku Yerusalem suoto. 19 Nu di SAATE nwu lakpee batii nwu ɔlaababuɛtɛtɛ alɛ baakplesa ma manwako ɔkyɛ nɔɔ, nu baasĩ kafɔɔ ɔlaa baata ma yi, batanu.

20 Ninfɛ di SAATE nwu Ninwuna labuo di oletatɛ Yehoiada obisuɔtɔbi Sakaria suoto nɛ. Ni aayila di batii nwu anu aabuɛ alɛ, "Nnya ɔlaa wɔ di Yaa kobuɛ ni alɛ: ‘Obe oso biesĩ SAATE nwu afiofa? Asaa dilɔbalɛ ye ɔkyɛ. Ta bitoosĩ ni SAATE nwu oso yi, nnwɔɔ kafɔɔ atosĩ ye.’ "

21 Kafɔɔ baakũ kanwumbe di suoto nɔɔ, ninfɛ di ɔka kanya didiki kanya yi, ni baasafɔ nwɔ afuɔ baalo di SAATE nwu kaflɔnkɔ nɛ. 22 Ɔka Yoas ditanyuma sifutulɛ se di Sakaria ote Yehoiada lale nwɔ nii, kafɔɔ aalo ni obisuɔtɔbi nɔɔ wɔ niabuɛ ni di obe wɔ aatookpi ni alɛ, "SAATE nwu anya nle mmle, aata letota ata fɔ."

Yoas Sɛka Ole Kayɛntɛkɔ

23 Di lɛlɛɛ lakyi diawa ni yi, Siria batii bakpɛtɛ lataka kakpɛ di Yoas suoto; Baatu baabuo di Yuda ku Yerusalem suoto, ni baalo batii nwu kanyabayilatɛ bamuu nɛ. Ni baayɔ kakpɛ kamɛ asaa amuu baakyɛnko ɔka lɛma di Damasko nɛ. 24 Nu di Siria batii bakpɛtɛ lakyɛ ku batii basɛɛ lete yi, SAATE nwu layɔ bakpɛtɛ ba niatɛbaapɔ ni aakpee ma ninnɛɛ. Ta Yuda lasĩ ni SAATE nwu, bate lɛma Yaa nwu oso di lɛkanko lawa di Yoas suoto nɛ. 25 Di obe wɔ di Siria batii ladie baasifi nii, baatika Yoas nkɔ di suoto osie kanya. Ni di Yoas banɔɔfotii nɔɔ lasi kanya di suoto nɔɔ, ta aalo ni oletatɛ Yehoiada obisuɔtɔbi oso, ni baalo nwɔ di atensaa nɔɔ suoto nɛ. Nioso aakpi, ni baakookaa nwɔ di Dawid Okpoo kplɛ nɛ, kafɔɔ batakookaa nwɔ di baka sɛkya kamɛ.

26 Batii ba niasi ni kanya di suoto nɔɔ niale Sabad, Amon batii ɔsanko nwu Simat obisuɔtɔbi, ku Yehosabad, Moab batii ɔsanko nwu Simrit obisuɔtɔbi. 27 Yoas babisuɔtɔbi suoto sɛlaa, sɛlaa obuɛɔtɛ kpinwu okyeko suoto nɔɔ, ku asaa ya aabla ni di Yaa olekatakɔ ose lelolaa suoto yi, bɛɛkpana nya beekpee di baka sɛlaa nsũ ɔtɛ kukũ kamɛ. Ni di obisuɔtɔbi nɔɔ Amasia layila nwɔ kaanya fɛ ɔka nɛ.