1 Dawid obisuɔtɔbi Solomon lase suoto nɔɔ kpinkpĩ di sɛka kalekɔ nɔɔ suoto, diekye SAATE Yaa nɔɔ lasiɛko nwɔ, ni aatakatɛsa nwɔ katoo osie kanya nɛ.

2 Ninfɛ di Solomon lakakatɛ aata Israel omuu nɛ- nkpe nkpe kanyabayilatɛ ku alafa kanyabayilatɛ, bakantɛ ku batunletɛ bamuu di Israel, ayo kamɛ banɔɔfo- 3 ni di Solomon ku dikudi nwu nimuu lakyɛ katakalekɔ nwu di Gibeon nɛ, diekye Yaa Lɛkpaayo le Mansi ni lawɛ ninfa, nle di SAATE nwu kpɛmblatɛ Mose lapɛ ni di ɔfaafuu kamɛ. 4 Kafɔɔ di obe nwu Dawid ntɔlaayɔ Yaa lɛlakaa nwu eekyeko Kiriat Yearim ɛɛwako lɛba le aalolaa aata ni nii, diekye aapɛ lɛkpaayo aata ni di Yerusalem. 5 Kafɔɔ lɛbɔɔsaa sɛɛle oleɔta akyikye ya di Hur ɔwa Besalel, wɔ niale ni Uri obisuɔtɔbi, lapɛ ni lawɛ di Gibeon di SAATE nwu akpanta klekle anu; nioso Solomon ku batii nwu lakyɛ baalawolaa SAATE nwu ninfa. 6 Ni di Solomon lakata aakyɛ lɛbɔɔsaa sɛɛle oleɔta akyikye nwu di SAATE nwu anu di Lɛkpaayo le Mansi ni, ni baata ofiɛ asaaɔta kakpe ninya suoto nɛ.

7 Yaa ladiki suoto aatuo Solomon ku kakyɛ nwu nkpo, ni aatɔkɔ nwɔ alɛ, "Kaalɛ lɛsaa lele foomiɛ falɛ nta fɔ ni."

8 Ninfɛ di Solomon ladiki Yaa kanya alɛ, "Fatoole teemi Dawid sifutulɛ kplɛ, ni fatoose mi sɛka di kayilakɔ nɔɔ nɛ. 9 Kanunua yi, SAATE Yaa, tika difuɔ di ɔlaa wɔ faabuɛ faatɛ faata ni teemi Dawid, diekye fatoose mi sɛka di batii ba niɛtɛ bapɔ ni fɛ kasɔ kudu suoto. 10 Tɛɛ ninumbe ku lɛsaatofo, alɛ kaleko batii ba mmle katũ. Diekye owe nimafuo batii kpinwu lɛfɔ ba mmle ɔkpà?"

11 Ni di Yaa latɔkɔ Solomon alɛ, "Ta nle mmle ninle fɔ ni otu kamɛ dibiesaa, fanankaalɛ ni kafɔɔ lɛsaawɛ, lɛlɛ ee dibu, ee fakaalɛ ni balo lɛfɔ kukpi, fanakaalɛ ni kafɔɔ nkpa kaanale, kafɔɔ ninumbe ku lɛsaatofo alɛ faaleko ni batii nii katũ, mba suoto lese fɔ ni sɛka oso yi, 12 lɛyɔ ninumbe ku lɛsaatofo lɛta fɔ. Kamata fɔ kafɔɔ lɛsaawɛ, lɛlɛ ku dibu, alɛ ɔka kuonwii niawɛ ni ditawɛ nini diidii, fiɛ di afɔ, di kuonwii kafɔɔ dilɔbawɛ nini di sɛmaa lɛfɔ."

13 Ninfɛ di Solomon ladie di katakalekɔ nwu di Gibeon di Lɛkpaayo le Mansi ni anu aasifi Yerusalem nɛ. Ni aale sɛka di Israel suoto nɛ.

14 Solomon lasiisa bakeke ba di bapɔnkɔ nnanfi ni ku bapɔnkɔ; aawɛ bakeke ba di bapɔnkɔ nnanfi ni kakpe alafa-ana ku bapɔnkɔ lefosi nkpe nnyɔ, mma aayɔ aase di bakeke sekpoo kplɛ nwu ku ɔkyɛ nɔɔ di Yerusalem kafɔɔ nɛ. 15 Ɔka lata koto fututu ku koto sɛɛle labawɛ di Yerusalem fɛ afuɔ, seda kafɔɔ labapɔ fɛ kowoso ko manlɛɛ ni sikamɔ-abue awoso di akpenkpe nkpaa. 16 Ɔya baaya Solomon bapɔnkɔ baakyeko Egipte ku Kue baawako- ɔka asaa bayatɛ niaya ma baakyeko Kue. 17 Baaya keke wɔ di bapɔnkɔ nnanfi ni onwii di Egipte fɛle koto fututu bakilo bakuɛnsĩ, pɔnkɔ onwii kafɔɔ fɛle bakilo banyɔ okle. Mansunsũ ma kafɔɔ manta Heti batii ku Siria batii baka bamuu.