1 Solomon lata osuku alɛ batofo olekatakɔ bata SAATE nwu Leyooto ku lɛkayo bata nnwɔɔ omu nɔɔ. 2 Aadiki batii nkpe afosi-akuɛnsĩ fɛ atoo batukatɛ ku batii nkpe afosi-anɛ fɛ afuɔ babiɛtɛ di akpenkpe nwu ku batii nkpe ntiɛ-alafa-akuɔ kafɔɔ fɛ ɔkpɛ banyuntɛ di bakpɛntɛ nwu suoto.

3 Solomon lata Tiro ɔka Huram kanya ka mmle alɛ:

"Kyesee mi sidar awosoku fɛ mmle faabla faata ni teemi Dawid di obe wɔ faakyesee nwɔ ni sidar sewoso aatofo ni lɛkayo aasiɛ ni kaamɛ. 4 Nyu, nfɛ kɔwa olekatakɔ ɔbatofo ɔta SAATE Yaa nii Leyooto, ninkleklesa ni ntɔɔ diɛta ni olufui kɔnɔnkɔnɔ ofiɛ di anu nɔɔ, ninta bloblo wɔ beekleklesa ni odiki otika obe biala, ninta kafɔɔ ofiɛ asaaɔta olesɛ ku kɔtɔɔfɔ biala ku Anyɛɛtɛyi ku Awɛntɛ Fɔle ku ayi ole ya bɛɛtɛ bɛɛta ni SAATE Yaa loo ole. Nle mmle ninle ɔsaabla wɔ nimate kunta ni Israel dinaa ni kaloo nɛ.

5 "Olekatakɔ ka kɔɔwa ni ɔbatofo kamamuɔ, diekye Yaa loo lemuɔ alenke bayaa bamba bamuu. 6 Kafɔɔ owe nimafuo olekatakɔ otofo ɔtɔɔ, di obe wɔ di osi, bia osi-osi wɔ niɛtaka katoo dilenke ni diemuɔ ditɔɔ ni? Ni owe nfɛ di ami nle alɛ katofo olekatakɔ ntɔɔ, dilenkee lɛba le babata ni ofiɛ seleɔta di anu nɔɔ?

7 "Nioso, kyesee mi otii wɔ ninkpe ni lɛsaatofo di koto sɛɛle, koto fututu, abɔɔsaa sɛɛle ku abɔɔsaa wɛɛfɛɛ, ku abula fɛnɛnɛɛ ya niɛbla ni fɛ ɔsɛɛ, asɛɛle-bɔmbɔ ku bluu ale, aye ni kamɛ nwaa kafɔɔ di mmle manwola kɔkpana mantika ni di asaa suoto, alɛ aabla ɔkpɛ di Yuda ku Yerusalem manko batii nii ba nin-ye ni nnɛɛ kamɛ sɛkpɛ, mba di teemi Dawid lata ni.

8 "Kyesee mi kafɔɔ sidar, odum sewoso ku sewoso se niefũ ni kɔya fakyeko Lebanon, diekye n-ye nlɛ batii lɛfɔ n-ye awoso obudi kamɛ nwaa ninfa. Batii nii kamabla ɔkpɛ ku bale fɔ 9 alɛ baatɛɛ sewoso kpinwu, diekye dikpeni olekatakɔ ka kamatofo ni lemuɔ kɛɛlɛ kafɔɔ onyu nwaa. 10 Kamata bakpɛmblatɛ lɛfɔ, bakpɛmblatɛ ba nimbudi ni awoso, akpaa fɛ bakankyi nkpe kɔlafa lefosi, kamɔɔ fɛ bakankyi nkpe kɔlafa lefosi, nta fɛ abukii nkpe kɔlafa-lefosi ku awosobi nnɔnyi fɛ bakpoko nkpe kɔlafa-lefosi."

11 Tiro ɔka Huram ladiki kanya di kukũ ɔkpana kamɛ aata Solomon alɛ:

"Ta SAATE nwu mbɔmbɔ ni batii nɔɔ oso, ni atɔɔbla fɔ ɔka lɛma nɛ."

12 Huram lakple aabuɛ alɛ:

"Baatansa SAATE nwu, Israel Yaa nwu, nnwɔ niɛbla ni osi ku kasɔ! Nnwɔɔ niɛta ɔka Dawid obisuɔtɔbi numbentɛ, ɛɛtɔɔ lɛsaatofo ku lɛsɔnu, nnwɔ nimatofo ni olekatakɔ anta ni SAATE nwu ku lɛkayo anta ni nnwɔɔ omu nɔɔ.

13 "Kokyesee fɔ Huram-Abi. Ale otii wɔ nin-ye ni kɔnɛɛ kamɛ sɛkpɛ kpinwu, 14 di ɔya lakye ni Dan banantii kamɛ di ote kafɔɔ lakye ni Tiro. Eefũ lɛnanfi di koto sɛɛle ku koto fututu, lɛbɔɔsaa sɛɛle ku lɛbɔɔsaa wɛɛfɛɛ, difuɔ ku owoso, dibula biene fɛnɛnɛɛ le niɛbla ni fɛ ɔsɛɛ ku bluu ku lɛsɛɛle bɔmbɔ ɔkpɛ ɔbla suoto. Aye kamɛ nwaa di mmle manwola ni kɔkpana kumuu ateate mantika ni di asaa suoto, an-fuo kafɔɔ letembi lele bɛɛtɔɔ alɛ abla ni ɔbla. Ababla ɔkpɛ ku batii lɛfɔ ba nin-ye ni nnɛɛ kamɛ sɛkpɛ ku mba ninle ni saate nii, teefɔ Dawid bale.

15 "Kanunua yi, ta saate nii akyesee bakpɛmblatɛ nɔɔ akpaa ku kamɔɔ ku awosobi nnɔnyi ku nta be aabuɛ aatɛ alɛ abata ni, 16 bubabudi sewoso nwu simuu foomiɛ ni munkyeko Lebanon, muntikasĩ di seklo suoto munfenko di lekpo suoto munsooko munwako Yopa. Nfɛ faafuo sĩ ɔyɔ ninfa fansifiko Yerusalem."

17 Solomon laka bafɔɔ ba bamuu niawɛ ni di Israel, di ote Dawid batii ɔka wɔ aaka ni sɛmaa; ni baawɛ batii nkpe kɔlafa afosi-anɔɔ-nkpe ntiɛ-alafa akuɔ nɛ. 18 Ni aata batii nkpe afosi-akuɛnsĩ lɛma alɛ bale atoo batukatɛ, aata kafɔɔ nkpe afosi-anɛ alɛ bale afuɔ babiɛtɛ di akpenkpe, di ɔkpɛ banyuntɛ nkpe ntiɛ alafa-akuɔ di suoto lɛma alɛ baatoonyu batii nwu mantɔɔbla ɔkpɛ nwu nɛ.