1 Lefosi alɛɛ anyɔ di Manase lafũ fiɛ aabale ɔka, ni aale sɛka di Yerusalem alɛɛ afosi-anɔɔ-anɔɔ nɛ. 2 Aabla okpile di SAATE nwu anu, aatikanko nnle be di SAATE nwu latososa aadiki ni di Israel batii anu ta ayududusaa sɛsaabla lɛma oso. 3 Aase ntakalekɔ nwu di ote Hesekia labibiɛ nii letofo; aapɛ kafɔɔ seleɔta akyikye aata Baal, ni aabla Asera sewoso aase nɛ. Aawakasɔ aata osi asaa nwu amuu, ni aasumu nya kafɔɔ nɛ. 4 Aapɛ seleɔta akyikye di SAATE nwu olekatakɔ di SAATE nwu labuɛ ni alɛ, "Leyooto nii kamaka di Yerusalem kamɛ dinaa ni kaloo." 5 Aapɛ seleɔta akyikye aata osi asaa nwu amuu di SAATE nwu nflɔnkɔ akyuu nwu anyɔ. 6 Aayɔ babisuɔtɔbi nɔɔ aata ole di ɔtɔ kamɛ di Ben Hinom Ɔtaata kamɛ, ni aabla afasaa, sɛbɔ ɔpɛ, sɛsɛɛ ku asaa ɔkaalɛ di bakpi ku anwuna kamɛ nɛ. Aale sikpile kpinwu di SAATE nwu anu, aata ɔblɔ lafiɛ nwɔ.

7 Manase layɔ Asera owoso letembi le aawola ni aalaase di SAATE nwu olekatakɔ, nle di SAATE nwu latɔkɔ ni Dawid ku obisuɔtɔbi nɔɔ Solomon alɛ, "Di olekatakɔ ka mmle ku Yerusalem, ntoodiki ni di Israel ana nwu amuu kamɛ kamatɛ Leyooto nii dinaa ni kaloo. 8 Namasinta kafɔɔ Israel batii nkpaa didie di kasɔ ka lata ni bawa lee, nse babalolaa mannyu, mambla kafɔɔ lɛsaa biala le lɛtɔkɔ ma ni di afiofa nwu amuu, sisuku ku kanya ninii ka lata lafenko ni di Mose suoto." 9 Kafɔɔ Manase laleko Yuda ku Yerusalem batii katũ baayu osuku, nioso baabla okpile baalenkee nnle be di SAATE nwu lawɔɔsa ni di Israel batii anu.

10 SAATE nwu lakakatɛ aata Manase ku batii nɔɔ, kafɔɔ batakyɔɔ nwɔ atoko. 11 Nioso SAATE nwu latɔɔ Asiria ɔka kakpɛ kanyabayilatɛ aakpee ma, ni baamufũ Manase baalaatɛ di leyo katenkɔ, baayɔ lɛkɔnĩi baakpee nwɔ di onwu, baanii nwɔ ku lɛbɔɔsaa sɛɛlɛ anyɛnɛ, ni baakpaa nwɔ baasifiko Babel nɛ. 12 Di nimiina nɔɔ kamɛ yi, ni aawakosa suoto nɔɔ kasɔ buɛɛ, aakaalɛ SAATE Yaa nɔɔ sibualɛ, di bate nɔɔ Yaa anu nɛ. 13 Di obe wɔ aapɛ ɔlaa aatɔɔ nii, ɔlaa nɔɔ lakpanko SAATE nwu di Manase suoto kasɔ ɔwakosa nwu, ni aanu lekoto nɔɔ otikiti nɛ; nioso aakplesa nwɔ aawako Yerusalem ku sɛkakalekɔ nɔɔ. Ninfɛ di Manase latofo alɛ SAATE nwu ninle Yaa nɛ.

14 Nni sɛmaa yi, aase Dawid Okpoo kplɛ nwu oyoyiɛ wɔ sɛɛmaa, di Gihon ntu kataakɔ kufĩ kamɛɛkɔ di ɔtaata nwu kamɛ letofo, dialaadu bia Kakpaku Kayoko kanya, kuafe kuakyi Ofel lekpenkpe; aata nwu kafɔɔ kuataka nwaa. Ni di Manase layɔ bakpɛtɛ kanyabailatɛ aatɛ di sekpoo siene nwu simuu di Yuda nɛ.

15 Aadiki bafɔɔ bayaa nwu, ni aakpakpaa atembi nwu aadieko di SAATE nwu olekatakɔ nɛ. Aakpakpaa kafɔɔ seleɔta akyikye ya aapɛ ni amuu di olekatakɔ lekpenkpe nwu ku Yerusalem; ni aadiki nya di okpoo kplɛ nwu kamɛ aafuki aayu nɛ. 16 Ninfɛ aase SAATE nwu oleɔta akyikye lɛpɛ, aata atoko ɔkyɛ ole asaaɔta ku sɛfa ɔpɛ asaaɔta ninnya suoto nɛ. Ni aatɔkɔ Yuda alɛ basumu SAATE Israel Yaa nwu nɛ. 17 Kafɔɔ yi, batii nwu lanwini baatɔɔta ole di ntakalekɔ nwu, kafɔɔ SAATE Yaa lɛma nwu lete baatɔɔta seleɔta nwu baatɔɔta.

18 Manase sɛka olebee sɛsaabla bamba, diakyakaa ni di ɔlaa nɔɔ ɔpɛ ɔta Yaa nɔɔ ku sɛlaa se di asaa banyatɛ lakakatɛ baatɔɔ ni di SAATE Israel Yaa nwu leyooto kamɛ yi, bɛɛkpana nya beekpee di Israel baka sekofolaa akũ kamɛ. 19 Ɔlaa nɔɔ ɔpɛ ku mmle di ɔlaa nɔɔ lakpanko ni Yaa, diakyakaa ni di sikpile nɔɔ simuu ku onukwale nɔɔ ɔtanle, ku aba ya aatofo ni ntakalekɔ, aase ni kafɔɔ Asera sewoso ku afiɔ fiɛ nfɛ aawakosa ni suoto nɔɔ kasɔ yi- bɛɛkpana amuu beekpee di asaa banyatɛ akũ kamɛ. 20 Manase latɛ ɔnyɛɛ ku bate nɔɔ, ni baakookaa nwɔ di lɛkayo nɔɔ kamɛ nɛ. Ni di obisuɔtɔbi nɔɔ Amon layila nwɔ kaanya fɛ ɔka nɛ.

21 Alɛɛ afosi-anyɔ-anyɔ di Amon lafũ fiɛ aabale ɔka, ni aale sɛka di Yerusalem alɛɛ anyɔ nɛ. 22 Aabla okpile di SAATE nwu anu, fɛ mmle di ote Manase labla nii. Amon lasumu afiɔ ya amuu di ote Manase labla nii, aatɔɔta kafɔɔ seleɔta aatɔɔta nya. 23 Kafɔɔ atawakosa suoto nɔɔ kasɔ di SAATE nwu anu fɛ mmle di ote Manase labla nii; Amon lata lɛpɔɔ nɔɔ okpi lapɔ diakyakaa.

24 Ni di Amon banɔɔfotii lakũ kanwumbe di suoto nɔɔ, ni baalo nwɔ di lɛkayo nɔɔ kamɛ nɛ. 25 Ninfɛ di kasɔ nwu batii lalo batii ba bamuu niataka baayila ni di Ɔka Amon suoto, ni baayɔ obisuɔtɔbi nɔɔ Yosia baase sɛka di disi nɔɔ nɛ.