1 Alɛɛ afosi-anyɔ-anɔɔ di Hesekia lafũ fiɛ aabale ɔka, ni aale sɛka di Yerusalem alɛɛ afosi-anyɔ-anaasĩ nɛ. Ɔya leyooto niale Abigya nɛ, Sakaria obisankobi aale. 2 Aabla lɛsaa le niasiɛko ni di SAATE nwu anu, fɛ mmle okle di ɔwa nɔɔ Dawid labla nii.

3 Di Yuda batii kɔwɛntɛ kasale kamɛ di Hesekia sɛka olebee lɛlɛɛ kasale kamɛ yi, aasɛkɛtɛ SAATE nwu olekatakɔ akloo ni aalolaa nya nɛ. 4 Ni aakpaa olebatatɛ ku Lewi batii aawako, aasiisa ma di kaflɔnkɔ nwu di kufĩ katunkɔ lɛkyɛ nɛ, 5 ni aatɔkɔ ma alɛ: "Lewi batii, bikyɔɔ mi atoko! Bikleklesa suoto lee kanunua biekleklesa kafɔɔ SAATE nwu, bate lee Yaa olekatakɔ. Bidiki asaa ya ninaklekle ni amuu di kakleklekɔ nwu. 6 Bate loo ditale onukwale; baabla dikpilesaa di SAATE nwu Yaa loo anu baasĩ nwɔ kafɔɔ. Baakyisa anu lɛma di SAATE nwu kasiɛkɔ, baamunikĩisa mmaa lɛma kafɔɔ baatɔɔ. 7 Baasɛɛ kafɔɔ lɛkpata nwu akloo, ni baaniisa bakandiɛ nɛ. Batafiɛ olufui ee bawako ofiɛ asaaɔta kuonwii di kakleklekɔ nwu babata Israel Yaa nwu. 8 Nioso, SAATE nwu ɔblɔ ntosoo di Yuda ku Yerusalem suoto; atɔɔbla ma lɛyɛkɛsaa ku difu ku lɛmansaa, fɛ mmle biɔnya ni ku anu lee amu. 9 Nle mmle oso di bate loo lanɔɔ di kapamii kanya nɛ. Nni kafɔɔ oso di babisuɔtɔbi ku babisankobi ku basɔfɔ loo nsi di sɛlanle kamɛ nɛ. 10 Nunua yi, lɛtɛ nlɛ kɔbla kanya ninii ku SAATE nwu, Israel Yaa nwu, di mmle di ɔblɔ nɔɔ yakayaka nwu kakyɛ ni di suoto loo. 11 Babisuɔtɔbi nii, biyɔ nwu ole nunua, diekye SAATE nwu nitoodiki ye alɛ biyila nwɔ di anu biɛbla nwɔ ɔkpɛ, alɛ biabla kasumu ɔkpɛ di anu nɔɔ, biefiɛ kafɔɔ olufui."

12 Ninfɛ di Lewi batii ba mmle lakye ɔkpɛ kasɔ nɛ:

di Kohat batii kamɛ yi,

Amasai obisuɔtɔbi Mahat ku Asaria obisuɔtɔbi Yoel;

di Merari batii kamɛ yi,

Abdi obisuɔtɔbi Kis ku Yehalelel obisuɔtɔbi Asaria;

di Gerson batii kamɛ yi,

Sima obisuɔtɔbi Yoah ku Yoah obisuɔtɔbi Eden;

13 di Elisafan banantii kamɛ yi,

Simri ku Yeiel;

di Asaf banantii kamɛ yi,

Sakaria ku Matania;

14 di Heman banantii kamɛ yi,

Yehiel ku Simei;

di Yedutun banantii kamɛ yi,

Semaia ku Usiel.

15 Obe wɔ baasiisa ni babilɛma-suɔtɔbi baakleklesa suoto lɛma kafɔɔ baaloo ni yi, ni baabuo baalakleklesa SAATE nwu olekatakɔ nɛ. Fɛ mmle di ɔka lakpee ni kufiofa, di SAATE nwu ɔlaa kanya. 16 Olebatatɛ nwu labuo SAATE nwu kakleklekɔ kamɛ alɛ bɔɔlaakleklesa ni. Baadiki lɛsaa biala baanya ni di SAATE nwu olekatakɔ ditaklekle ni baabatɛ di SAATE nwu olekatakɔ kaflɔnkɔ. Ni di Lewi batii lafũ asaa nwu baasifiko Kidron Ɔtaata nɛ. 17 Baakye okleklesa nwu kasɔ di Yuda batii kɔwɛntɛ kasale di dii kasale suoto, ni baadu SAATE nwu lɛkpata di dii nɛnle di kɔwɛntɛ nwu kamɛ. Ni baayɔ ayi anɛ baakleklesa SAATE nwu olekatakɔ omu, baaloo di lefosi dii kuɔnle di kɔwɛntɛ kasale nwu kamɛ.

18 Ninfɛ di Lewi batii nwu labuo kamɛ baalatɔkɔ Ɔka Hesekia alɛ: "Butookleklesa SAATE nwu olekatakɔ kamuu, ofiɛ asaaɔta oleɔta akyikye ku anwansaa ninya amuu, ku opunu wɔ mantika ni bloblo wɔ beekleklesa nii, ku akpɛnsaa ninya amuu. 19 Butoololaa buokleklesa kafɔɔ akpɛnsaa ya amuu di Ɔka Ahas layɔ aadieko ni di onukwale nɔɔ ɔtanle kamɛ di obe wɔ aale ni ɔka. Kanunua nfɛ ate di SAATE nwu oleɔta akyikye anu."

20 Ni di kaleesɛ kuyitatũ Hesekia lalɛɛ okpoo kplɛ nwu banɔɔfotii aasiisa ni baakata baakyɛ SAATE nwu olekatakɔ nɛ. 21 Baakyɛnko banankyue-suɔtɔ bakuɛnsĩ, akunumuu akuɛnsĩ, afosobi-suɔtɔ akuɛnsĩ ku ntiekpaa nkuɛnsĩ fɛ okpile asaaɔta diɛta ni sɛkakalekɔ nwu, diɛta ni kafɔɔ kakleklekɔ nwu ku Yuda. Ni di Ɔka latɔkɔ olebatatɛ, Aaron banantii nwu alɛ bayɔ n-ya mmle bata ole di SAATE nwu oleɔta akyikye suoto nɛ. 22 Nioso baalo banankyue-suɔtɔ nwu, ni di olebatatɛ nwu layɔ ntɔ nwu baawanwanyi di oleɔta akyikye nwu suoto nɛ; nni sɛmaa baalo akunumuu nwu ni baayɔ ntɔ lɛma baawanwanyi di oleɔta akyikye nwu suoto nɛ; ninfɛ baalo afosobi-suɔtɔ nwu baayɔ ntɔ lɛma baawanwanyi di oleɔta akyikye nwu suoto nɛ. 23 Baayɔ ntiekpaa nwu diɛta ni okpile asaaɔta baawako di ɔka ku kasikɔ nwu anu, ni baayɔ nnɛɛ lɛma baatika di ntiekpaa nwu suoto nɛ. 24 Ninfɛ di olebatatɛ nwu lalo ntiekpaa nwu baayɔ ntɔ lɛma baata di oleɔta akyikye suoto diɛta ni okpile asaaɔta alɛ diafoto Israel omuu sikpile, diekye ɔka labuɛ alɛ bata ofiɛ asaaɔta ku okpile asaaɔta aata Israel omuu disi.

25 Ni di ɔka layɔ Lewi batii aase di SAATE nwu olekatakɔ baaklee abɔɔsaa anɛɛkya, bakyitaa ku basanku di mmle di Dawid ku ɔka asaanyatɛ Gad ku ɔlaabuɛtɛtɛ Natan latuo ni kanya nɛ; SAATE nwu niakpee kufiofa ko mmle aafenko di ɔlaababuɛtɛtɛ nɔɔ suoto. 26 Nioso Lewi batii lalolaa suoto baayila baaklee Dawid asansaa, olebatatɛ kafɔɔ laklee akyukyoo lɛma.

27 Ni di Hesekia lata osuku alɛ bata ofiɛ asaaɔta di oleɔta akyikye nwu suoto nɛ. Di asaaɔta nwu lakye ni kasɔ yi, sinu ɔsa ɔta SAATE nwu kafɔɔ lakye kasɔ, ni di akyukyoo ku Israel ɔka Dawid asansaa lakyakaa nɛ. 28 Kasikɔ nwu kamuu lawakasɔ di kasumu kanya, di obe wɔ di sinubasantɛ latɔɔsa ni sinu, di akyukyoo bafɛntɛ kafɔɔ latɔɔfɛ ni akyukyoo. Baatɔɔbla nle mmle nimuu dialaadu di obe wɔ baaloo ni ofiɛ asaaɔta nwu ɔta.

29 Di asaaɔta nwu laloo nii, ni di ɔka ku otii biala niawɛ ni ninfa ku nnwɔɔ lapɛ akunkyi baasumu SAATE nwu nɛ. 30 Ninfɛ di ɔka Hesekia ku banɔɔfotii nɔɔ latɔkɔ Lewi batii alɛ bayɔ Dawid ku asaanyatɛ Asaf sɛlaa batansa SAATE nwu nɛ. Nioso baasa katansa sinu ku suoto lɛyɔɔ, ni baawakosa asi lɛma kasɔ baasumu SAATE nwu nɛ.

31 Ninfɛ di Hesekia labuɛ alɛ, "Bitokleklesa suoto lee biɛta SAATE nwu nfɛ. Biwa, biɛyɔ seleɔta ku sɛfa ɔpɛ asaaɔta biwako SAATE nwu olekatakɔ." Nioso kasikɔ nwu lawako seleɔta ku sɛfa ɔpɛ asaaɔta, mba bamuu kafɔɔ diakpanko ni di otu lawako ofiɛ asaaɔta.

32 Asaaɔta ya di kasikɔ nwu lawako ni lɛpɔ labla banankyue-suɔtɔ afosi-akuɛnsĩ, akunumuu kɔlafa ku afosobi-suɔtɔ alafa-anyɔ- amuu lale ofiɛ asaaɔta diata SAATE nwu. 33 Babɔkɛɛ ba baakleklesa ni fɛ seleɔta lɛpɔ labla akunumuu alafa-akuɔ ku bafoso ku batie nkpe-ntiɛ. 34 Kafɔɔ yi, olebatatɛ nwu ditapɔ bata ofiɛ asaaɔta babɔkɛɛ bamuu akũ odiki; nioso babilɛma Lewi batii lakyakaako ma dialaase di obe wɔ di ɔkpɛ nwu laloo nii. Dialaase di obe wɔ baakleklesa ni olebatatɛ bamba kafɔɔ, diekye Lewi batii nlolaa mambla di suoto lɛma okleklesa suoto manlenkee mmle di olebatatɛ nwu mbla nii. 35 Ofiɛ asaaɔta kpinwu lawɛ, diakyakaa ni di atoko ɔkyɛ ole asaaɔta lɛla nwu ku nta asaaɔta be ninkyakaa ni di ofiɛ asaaɔta suoto.

Nioso baase SAATE nwu olekatakɔ kasumu lese lɛbla. 36 Ni di Hesekia ku batii nwu bamuu lanya suoto lɛyɔɔ di lɛsaa le di Yaa labla aata ni batii nɔɔ suoto nɛ, diekye aabla ni wlawla.