1 Yosia lale Okpi Diisi Ofe Dii aata SAATE nwu di Yerusalem, ni baalo Okpi Diisi Ofe Dii ole lefosobi di Yuda batii kɔwɛntɛ kasale kamɛ, di lefosi dii naafa suoto nɛ. 2 Ni aadiki olebatatɛ aase di sɛkpɛ lɛma kanya, ni aakpee ma osie di SAATE nwu olekatakɔ ɔkpɛ ɔbla kamɛ nɛ. 3 Ninfɛ aatɔkɔ Lewi batii ba nintuo ni Israel omuu asaa, mba suoto baakleklesa baata ni SAATE nwu alɛ: "Biyɔ lɛlakaa klekle nwu bise di olekatakɔ ka di Israel ɔka Dawid obisuɔtɔ Solomon latofo ni kamɛ. Diɛkaatɛ alɛ bietuka ni di amuusi lee biekyiko. Nunua yi, bisumu SAATE Yaa lee nwu ku batii nɔɔ Israel nfɛ. 4 Bilolaa suoto lee di ayo kanya di akudi lee kamɛ, di mmle di Israel ɔka Dawid ku obisuɔtɔbi nɔɔ Solomon lakpana baatɛ ni kanya.

5 "Biyila di kakleklekɔ nwu ku Lewi batii dikudi nwu, baayila bata okpoo lee batii ayo kamɛ kukudii biala, batii ba ninansi ni di kuninwii kamɛ. 6 Bilo Okpi Diisi Ofe Dii afosobi, bikleklesa suoto lee biɛlolaa afosobi nwu bita okpoo lee batii, alɛ baabla lɛsaa le di SAATE nwu lata ni kufiofa aafenko ni di Mose suoto."

7 Yosia lata batii ba bamuu nitasiɛ ni di kuninwii kamɛ bafoso ku batie nkpe afosi-atiɛ diata Okpi Diisi Ofe Dii asaaɔta nwu, aata kafɔɔ banankyue nkpe ntiɛ- amuu lakye ɔka omu lɛsaawɛ kamɛ.

8 Banɔɔfotii nɔɔ kafɔɔ lakũ asaa niakye ni otu lɛma kamɛ baata batii nwu ku olebatatɛ ku Lewi batii. Ni di Hilkia, Sakaria ku Yehiel ba niale ni Yaa olekatakɔ nwu banyuntɛ lata olebatatɛ nwu Okpi Diisi Ofe Dii asaaɔta nkpe nnyɔ-alafa-akuɔ ku banankyue alafa atiɛ. 9 Ni di Konania ku Semaia ku Netanel, babilɛma-suɔtɔbi, ku Hasabia, Yeiel ku Yosabad, ba niale ni Lewi batii batunletɛ kafɔɔ lata Okpi Diisi Ofe Dii asaaɔta nkpe nnɔɔ ku banankyue alafa anɔɔ baata Lewi batii.

10 Baatɛ kasumu nwu sɛsaabla, ni di olebatatɛ layila di n-yilakɔ lɛma, di Lewi batii kafɔɔ di akudi lɛma kamɛ fɛ mmle di ɔka nwu labuɛ ni nɛ. 11 Baalo Okpi Diisi Ofe Dii afosobi nwu, ni di olebatatɛ layɔ ntɔ be baayɔ baakpee ma ni ninnɛɛ baanwanwanyi, di obe wɔ di Lewi batii kafɔɔ latoodiki ni babɔkɛɛ nwu akũ. 12 Baadiki ofiɛ asaaɔta nwu baatɛ lete alɛ babayɔ nya manta batii nwu ayo kamɛ kukudi nwu, alɛ baayɔ manta SAATE nwu, fɛ mmle bɛɛkpana ni di Mose kukũ kamɛ. Baabla banankyue nwu kafɔɔ nkpo. 13 Ni baafiɛ Okpi Diisi Ofe Dii babɔkɛɛ nwu di ɔtɔ suoto fɛ mmle baabuɛ baatɛ ni kanya, ni baawa asaaɔta klekle nwu di abukii, sɛkakutu ku babɛɛsi kamɛ, ni baasɛ sĩ wlawla baata batii nwu bamuu nɛ. 14 Di nle mmle sɛmaa yi, baalolaa sina baata suoto lɛma ku olebatatɛ, diekye olebatatɛ ba niale ni Aron banantii latɔɔta ofiɛ asaaɔta ku babɔkɛɛ lɛla oleɔta dialaadu obe wɔ di kale laloo nii. Nioso Lewi batii lalolaa sina baata suoto lɛma ku Aron olebatatɛ banantii.

15 Sinu basantɛ, Asaf banantii layila di aba ya di Dawid, Asaf, Heman ku Yedutun, ɔka asaanyatɛ nwu labuɛ baatɛ nii. Ditasiɛko alɛ n-yoko banyuntɛ di kayoko biala kanya kakyɛ mandiɛ sɛkpɛ lɛma, diekye Lewi batii wo lɛma labla alesaa baata ma.

16 Nioso di obe nwu kamɛ yi, baatɛ SAATE nwu kasumu kamuu baata Okpi Diisi Ofe Dii nwu ole ku ofiɛ asaaɔta ɔta di SAATE nwu oleɔta akyikye suoto, fɛ mmle di Ɔka Yosia labuɛ nii. 17 Israel batii ba niawɛ ni ninfa lale Okpi Diisi Ofe Dii nwu di obe nwu kamɛ. Baale kafɔɔ Bloblo wɔ Ninantaka ni Dii ayi akuɛnsĩ. 18 Diayɔ ni di ɔlabuɛtɛtɛ Samuel obe kamɛ yi, badile Okpi Diisi Ofe Dii le mmle okle banya; Israel baka kuonwii kafɔɔ diile Okpi Diisi Ofe Dii le mmle okle diidii, fɛ mmle di Yosia, olebatatɛ, Lewi batii, Yuda ku Israel omuu ba niawɛ ni ninfa ku Yerusalem batii lale nii. 19 Baale Okpi Diisi Ofe Dii le mmle di Yosia sɛka olebee lefosi lɛlɛɛ nɛnle kamɛ.

20 Di n-ya mmle amuu sɛmaa yi, di Yosia lalolaa asaa di olekatakɔ nwu aatɛ nii, ni di Egipte ɔka Neko lakata aakyɛ Karkemis di Eufrate sekle kotoko aalaakpɛ nɛ. Ninfɛ di Yosia ladie aalaakyakako nwɔ di kakpɛ kamɛ nɛ. 21 Kafɔɔ Neko lakpee batɔkyɛntɛ ɔkyɛ nɔɔ alɛ, "Oo Yuda ɔka, kamɛnlɔ ninsi di afɔ ku ami ntɛɛ? Diele afɔ kodieko di obe wɔ mmle kamɛ, kafɔɔ munko kale ka ninkpe ni kakpɛ. Yaa latɔkɔ mi alɛ mpɛsɛwa; nioso diɛ ɔtaka oyila di Yaa suoto, nnwɔ ninsikoe nii, se diele nkpo abawɔɔsa fɔ."

22 Kafɔɔ, Yosia ditakyɛ aadiɛ nwɔ, kafɔɔ aakyɛlɛnsa asaa di suoto nɔɔ alɛ ɔɔlaakpɛko nwɔ. Atakyɔɔ atoko di ɔlaa wɔ di Neko labuɛ ni di Yaa ɔlaa kanya, kafɔɔ aakyɛ aalaakpɛko nwɔ di Megido kasɔ lakataa suoto.

23 Ni di akplɔ bataatɛ lataa Ɔka Yosia nɛ, ni aatɔkɔ bakpɛtɛ banɔɔfotii nɔɔ alɛ, "Bikpaa mi bisifiko; batootika mi nkɔ osie kanya." 24 Nioso baakɛnkɛ nwɔ baadiki di keke nɔɔ kamɛ, baayɔ nwɔ baakpee di keke wɔ bamba aawɛ ni kamɛ, ni baakpaa nwɔ baawako Yerusalem nɛ. Ni aakpi, baakokaa nwɔ di bate nɔɔ sɛkya kamɛ, ni di Yuda ku Yerusalem omuu lawi nwɔ nɛ.

25 Yeremia lawola sikunu aata Yosia, diɛbadu ni mmiɛ dii le mmle yi, basuɔtɔ ku basanko sinu basantɛ nnyuma Yosia di sikunu se mmle ɔsa kamɛ. Nle mmle labakple ɔsaabla di Israel bɛɛkpana kafɔɔ beekpee di Sikunu kukũ kamɛ.

26 Yosia sɛka olebee sɛsaabla bamba ku kasumu nɔɔ sɛkpɛ, di lɛsaa le bɛɛkpana ni di SAATE nwu Kufiofa kamɛ kanya yi- 27 asaa ya aabla ni amuu, diayɔ ni di kasɔkakyekɔ dialaadu ni kayɛntɛkɔ yi, bɛɛkpana nya di Israel ku Yuda baka kukũ kamɛ.