1 Di alɛɛ afosi-anyɔ kayɛntɛkɔ, di obe wɔ kamɛ di Solomon latofo ni SAATE nwu olekatakɔ ku lɛkayo nɔɔ nimu yi, 2 Solomon lase sekpoenyii se di Huram latɔɔ ni ose dibudi, ni aata Israel batii lasiɛ sĩ kaamɛ nɛ. 3 Ninfɛ di Solomon lakyɛ Hamat-Soba aalaafũ nwu nɛ. 4 Aabudi kafɔɔ Tadmor di ɔfafuu kamɛ ku asaakatɛkɔ sekpoo kplɛ se simuu aabudi ni di Hamat. 5 Aase Bet-Horon Katoo ku Bet-Horon Kala dibudi fɛ sekpoo se baatofo seyoyiɛ baakyisa ni ku n-yoko ku abɔɔsaa, 6 diakyakaa ni ku Baalat ku asaakatɛkɔ sekpoo kplɛ nɔɔ simuu, ku sekpoo kplɛ simuu siɛta ni bakeke nɔɔ ba di bapɔnkɔ nnanfi ni ku bapɔnkɔ nɔɔ- ku lɛsaa lele aamiɛ alɛ ootofo ni di Yerusalem, Lebanon ku nsɔ be mmuu suoto aale ni sɛka kamɛ.

7 Batii ba bamuu niabu ni baakye ni Hiti batii, Amori batii, Perisi batii, Hawi batii ku Yebusi batii kamɛ (batii ba mmle ditale Israel batii), 8 mma niale banantii lɛma ba niabu ni di kasɔ nwu suoto di Israel batii ditawɔɔsa ni nɛ- mba mmle di Solomon layɔ aabla balanle nɔɔ ɔkpɛ sienle bablatɛ nɛ, fɛ mmle dite diɛbadu ni mmiɛ dii le mmle nɛ. 9 Kafɔɔ Solomon ditabla Israel batii balanle aata ɔkpɛ nɔɔ; aayɔ Israel batii aabla bakpɛtɛ nɔɔ, ku bakpɛtɛ nɔɔ banɔɔfo kanyabayilatɛ, ku kanyabayilatɛ di bakeke ba di bapɔnkɔ nnanfi ni ku bakatɛ nɔɔ. 10 Baale kafɔɔ Ɔka Solomon banɔɔfotii-nɔɔfo- banɔɔfotii alafa-anyɔ-afosi-anɔɔ ba niatoonyu ni batii ba niatɔɔbla ni sɛkpɛ.

11 Solomon lakpaa Farao obisankobi aakyeko Dawid Okpoo kplɛ nwu aawako lɛkayo le aatofo aatɔɔ nii, diekye aabuɛ alɛ, "Ɔsɔfɔ nii dilɔbasiɛ di Israel ɔka Dawid lɛkayo kamɛ, diekye abaya di SAATE nwu lɛlakaa ntoobuo ni lɛbla Klekle."

12 Di SAATE nwu oleɔta akyikye ya aapɛ ni di lɛkpata nwu anu yi, Solomon lata ofiɛ asaaɔta seleɔta aata SAATE nwu, 13 fɛ mmle kanya diakaatɛɛ diɛta ni dii biala asaaɔta wɔ di Mose latɛ aata ni Anyɛɛtɛyi, Awɛntɛ Fɔle ku lɛlɛɛ ɔkyaka ayi ole sitiɛ nwu- Bloblo wɔ Ninantaka ni Dii ole, Banawɔkyi Dii ole ku Akpanta Dii ole nwu. 14 Di mmle aale ni kufiofa ko di ote Dawid latɛ nii yi, Solomon lase olebatatɛ nwu akudi aata sɛkpɛ lɛma. Lewi batii male katũ di katansa sinu, mankyakaako olebatatɛ kafɔɔ di dii biala sɛsaabla kanya. Aadiki kafɔɔ n-yoko banyuntɛ di akudi kanya aase di n-yoko ateate kanya, diekye nkpo niale nle di Yaa otii nwu Dawid labuɛ aatɛ ni nɛ. 15 Batakyi kamaa di afiofa ya di ɔka nwu lakpee aata ni olebatatɛ ee Lewi batii di osuku kuninwii suoto, diakyakaa ni di ato-ntɛkɔ nwu.

16 Baaloo Solomon ɔkpɛ nwu omuu ɔbla, diayɔ ni di dii le baase ni SAATE nwu olekatakɔ lɛsɔse dialaadu ni obe wɔ baaloo ni nii. Nioso baaloo SAATE nwu olekatakɔ otofo.

17 Ninfɛ di Solomon lasifi Esion Geber ku Elot di Edom lekpo kotoko nɛ. 18 Ni di Huram lakyesee Solomon seklo kplɛ ku nnwɔɔ omu seklo kamɛ banɔɔfotii, batii ba niatofo ni lekpo kamɛ nwaa. Mba mmle ku Solomon batii lasiɛ seklo nwu baakyɛ Ofir baalaayɔ koto sɛɛle bakilo fɛ lefosi nkpe-nnɔɔ baawako, ni baayɔ kũ baawako Ɔka Solomon nɛ.