1 Ninfɛ di Yehosafat latɛ ɔnyɛɛ ku bate nɔɔ, ni baakokaa nwɔ ku mma di Dawid Okpoo kplɛ nɛ. Ni di obisuɔtɔbi nɔɔ Yehoram labayila nwɔ kaanya fɛ ɔka nɛ.

2 Yehoram lawɛ babilɛma-suɔtɔbi ba niale ni Yehosafat babisuɔtɔbi. Mma niale: Asaria, Yehiel, Sekaria, Asaria, Mikael ku Sefatia. Mba mmle bamuu niale Israel ɔka Yehosafat babisuɔtɔbi nɛ. 3 Ote lɛma lata ma koto fututu ku koto sɛɛle akyɛsaa kpinwu ku asaa ya niafũ ni kɔya, diakyakaa ni di Yuda sekpoo kplɛ siene, kafɔɔ aayɔ sɛka kalekɔ nwu aata Yehoram diekye nnwɔɔ niale nwɔ obisuɔtɔbi kasale nɛ. 4 Di Yehoram lase ni suoto nɔɔ kpinkpĩ di ote sɛka kalekɔ suoto yi, aalo babilɛma-suɔtɔbi bamuu ku Israel batii finle bawo. 5 Yehoram lafũ alɛɛ afosi-atiɛ-anyɔ fiɛ aabale ɔka, ni aale sɛka di Yerusalem alɛɛ anɛ nɛ. 6 Aakyɛ di Israel baka sisuku suoto, fɛ mmle di Ahab leyo kamɛ batii labla nii, diekye Ahab obisankobi aayɔ. Aabla dikpile di SAATE nwu anu. 7 Kafɔɔ, ta kanya ninii le di SAATE nwu labla ni ku Dawid oso yi, SAATE nwu ditamiɛ alɛ ɔɔwɔɔsa Dawid leyo kamɛ. Aabuɛ aatɛ alɛ abata kandiɛ n-wɛ anta nnwɔɔ ku banantii nɔɔ dinaa ni kaloo.

8 Di Yehoram obe kamɛ yi, Edom batii lataka baayila di Yuda suoto ni baase mma bamu ɔka nɛ. 9 Nioso Yehoram lakyɛ nfa ku banɔɔfotii nɔɔ ku bakeke nɔɔ ba di bapɔnkɔ nnanfi ni bamuu. Edom batii lamana nwɔ ku bakeke nɔɔ kanyabayilatɛ baakyi, kafɔɔ baataka ku kakyɛ baabuo ma kaamɛ baafe. 10 Nioso di Edom ntaka an-yila di Yuda suoto diɛbase bia miɛ nɛ.

Obe nwu onwii kamɛ di Libna okpoo lataka kuayila di Yehoram suoto nɛ, ta aasĩ ni SAATE nwu, bate nɔɔ Yaa oso. 11 Aatofo kafɔɔ ntakalekɔ di Yuda akpenkpe osi, ni aata Yerusalem batii layɔ suoto lɛma baata afiɔ osumu, ni aaleko kafɔɔ Yuda batii katũ baadiɛ SAATE nwu osumu nɛ.

12 Ni di Yehoram lafũ kukũ aakyeko ɔlaabuɛtɛtɛ Elia nfũ, kuabuɛ alɛ:

"Nnya ɔlaa wɔ di SAATE nwu, teefɔ Dawid Yaa, kobuɛ ni alɛ: ‘Fatakyɛ di teefɔ Yehosafat ee Yuda ɔka Asa sisuku suoto. 13 Kafɔɔ fɛɛkyɛ di Israel baka sisuku suoto, ni feeleko Yuda ku Yerusalem batii katũ bɛɛlayɔ suoto lɛma bɛɛta afiɔ osumu, fɛ mmle okle di Ahab leyo kamɛ batii labla nii. Feelo kafɔɔ afɔ omu babilee-suɔtɔbi, teefɔ leyo kamɛ batii, batii ba nialɛ ni nwaa baalenkee fɔ nii. 14 Nioso nunua yi, SAATE nwu nfɛ kamasafɔ batii lɛfɔ, babisuɔtɔbi lɛfɔ, basɔfɔ lɛfɔ ku lɛsaa biala le ninle fɔ ni lele ku lɛklɔɛklɔɛ nutule. 15 Afɔ omu lɛfɔ fababuo ofiɛ osie kanya, kafutu ofiɛ kamapɛ fɔ, ninaase di obe wɔ di ofiɛ nwu kamata sɛfɔtɔ lɛfɔ ndie nii.’ "

16 Ni di SAATE nwu lata Filisti ku Arab batii ba niasiɛ baakaako ni Etiopia batii lataka baayila di Yehoram suoto nɛ. 17 Baadieko Yuda, baafũ nwu, ni baayɔ asaa ya amuu baanya ni di ɔka lɛkayo kamɛ baasifiko nɛ. Baamufũ kafɔɔ basɔfɔ nɔɔ ku babi nɔɔ baasifiko. Obisuɔtɔbi kuonwii ditabu nwɔ dilenkee Ahasia, obisɔnle nwu.

18 Di n-ya mmle amuu sɛmaa yi, SAATE nwu lakpee Yehoram kafutu kamɛ ofiɛ kpile wɔ manamafuo ni kɔfa omiɛ. 19 Di obe owo kamɛ, di ofiɛ nɔɔ lɛlɛɛ nyɔɔfa kayɛntɛkɔ yi, sɛfɔtɔ nɔɔ ladie ta ofiɛ nwu oso, ni aakpi di dibuo kplɛ ɔnya kamɛ nɛ. Batii nɔɔ ditakutaa ɔtɔ kuonwii bakpee nwɔ dibu, fɛ mmle baabla baata ni bate nɔɔ.

20 Alɛɛ afosi-atiɛ-anyɔ di Yehoram lafũ fiɛ aabale ɔka, ni aale sɛka di Yerusalem alɛɛ anɛ nɛ. Aakpi, kafɔɔ kukpi nɔɔ ditabuo otii kuonwii suoto, ni baakookaa nwɔ di Dawid Okpoo kplɛ kamɛ nɛ. Kafɔɔ batakookaa nwɔ di baka sɛkya kamɛ.