1 Obe wɔ di Solomon laloo ni ɔkpɛ nwu omuu di SAATE nwu olekatakɔ ɔbla yi, ni aayɔ asaa ya amuu di ote Dawid lakleklesa ni- aale ni koto fututu ku koto sɛɛle ku olekatakɔ nwu asaa amuu- ni aayɔ nya aalaatɛ di SAATE nwu olekatakɔ asaa katɛkɔ nɛ.

2 Ninfɛ di Solomon lalɛɛ Israel batii banɔɔfo, ana nwu amuu banɔɔfo ku Israel ayo kamɛ baka aawako Yerusalem, alɛ bakatako SAATE nwu kanya ninii lɛlakaa nwu bakyeko Dawid okpoo kplɛ nwu, Sion bawako nɛ. 3 Ni di Israel batii bamuu lasi baawa ɔka nwu nfũ di Israel batii kɔwɛntɛ kuɛnsinle dii olebee kamɛ nɛ.

4 Di Israel banɔɔfo nwu bamuu lawa nii yi, Lewi batii lakɛnkɛ lɛlakaa nwu, 5 ni baakatako lɛlakaa nwu ku Lɛkpaayo le Mansi ni ku akleklesaa ya amuu ninsi nini kaamɛ baawako nɛ. Olebatatɛ ba niale ni Lewi batii niatuka nya; 6 ni di Ɔka Solomon ku Israel dikudi nwu nimuu niasi ni di ɔkyɛ nɔɔ layila di lɛlakaa nwu anu, baatɔɔta oleɔta ku bafoso ku banankyue kpinwu, batafuo lɛpɔ lɛma ɔkpana ɔtɛ ee baka ma nii.

7 Ninfɛ di olebatatɛ layɔ SAATE nwu kanya ninii lɛlakaa nwu baawako kayilakɔ nini di olekatakɔ nwu kamɛ, Kakleklekɔ, kaamɛ Kakleklekɔ nwu baabayɔ ni baase di bakerubim nwu afoko obo nɛ. 8 Bakerubim nwu lafukuti afoko lɛma di lɛlakaa lɛba nwu aatĩi lɛlakaa nwu ku sewoso se mantuka ni nii. 9 Sewoso se mmle latɛ siakaana alɛ sɛnya nisĩ lalaadu lɛlakaa nwu, nioso baatɔɔnya sĩ di olekatakɔ nwu kamɛ, kaamɛ sitũ. Kafɔɔ batatɔɔnya sĩ di Kakleklekɔ nwu kayi lɛkyɛ; nioso siakple site ninfa diabadu obe wɔ baakpana ni ɔlaa wɔ mmle. 10 Lɛsalɛsaa ditasiɛ di lɛlakaa nwu kamɛ diediki afuɔ nkyɛ nnyɔ be di Mose layɔ aakpee nini kaamɛ di Horeb lete, nfũ di SAATE nwu labla ni kanya ninii ku Israel batii di obe wɔ baadie ni di Egipte sɛmaa.

11 Ninfɛ di olebatatɛ nwu ladie di Kakleklekɔ nwu nɛ. Olebatatɛ nwu bamuu ba niawɛ ni ninfa lakleklesa suoto lɛma, batakpee kasɛ di akudi lɛma nwu kamɛ. 12 Lewi batii ba bamuu niale ni sinu basantɛ- Asaf, Heman, Yedutun ku babisuɔtɔbi lɛma ku banantii lɛma- layila di oleɔta akyikye nwu di kufĩ katunkɔ lɛkyɛ, baakpee akpeele fɛnɛnɛ biene, ni baatɔɔsa abɔɔsaa anɛɛkya, bakyitaa ku basanku nɛ. Olebatatɛ kɔlafa-afosi-anyɔ lawɛ ku mma baatɔɔfɛ akyukyoo. 13 Akyukyoo bafɛtɛ ku sinu basantɛ nwu nkyɛkyɛ mammufũ onu ku sɛlɔ sinwii, manta SAATE nwu katansa ku sɛfa ɔpɛ. Baatakatɛ sɛlɔ lɛma katoo ku akyukyoo, abɔɔsaa anɛɛkya ku asansaa bamba di katansa kamɛ baata SAATE nwu, ni baasa alɛ:

"SAATE nwu nlɛ;

lɛbɔmbɔ nɔɔ nkpe dinaa ni kaloo."

Ninfɛ di SAATE nwu olekatakɔ layii ku lelokonkyɛ nɛ, 14 nioso olebatatɛ nwu ditansinfuo kasumu lɛma ɔkpɛ ɔbla ta lelokonkyɛ nwu oso, diekye SAATE nwu lɛkpa layii Yaa olekatakɔ nwu.